Read idege ISIKẸLỤ 36 Bible Online

ISIKẸLỤ 36 - idege bible

ISIKẸLỤ 36

¹Ọngịnyị ehe ee, ya ẹrụ ọlẹ je ịgbọdọ nya ala Isirẹlụ ka byaa yẹkẹẹ: Ịgbọdọ nya ala Isirẹlụ! Anụ wo ala ịlẹ ka Ọngọlahị ya mẹẹ.

²Ọngọlahị Ohe Oluhye yẹkẹẹ, chajị nyọlẹ ka aluji nyanụ wẹẹ byinu ya nyị Ahaa! ịgbọdọ ịgbalẹ gbalẹ ịwẹ nyị ri nya ịwa,

³chajị nya ọọwa lẹ, yẹ ọmwụ ya Ọngọlahị Ohe Oluhye nyị yẹkẹẹ, bwula ọlẹ kịị họ ọpyị nya ala Isirẹlụ da uhuhwo bala ọ taa pyịpyị bwu ịkịka wuu gbee ka ala epwoja ịkịla ya ọpyị nya ala Isirẹlụ laa ọle kịị juwa hụlọ ẹhụ junu bala ọ kpanụ họ tụ odehe wuu da.

⁴Chajị nya ọọwa lẹ ịgbọdọ nya ala Isirẹlụ anụ wo ẹla ịlẹ ka Ọngọlahị Ohe Oluhye ya mẹẹ: Ọngọlahị Ohe Oluhye juwa yẹla ta ịgbọdọ bala ịba bala ikpokpo bala ẹgẹlẹ kịị tayireji tụ epweji ịlẹ ka-angịnyị rụ hi, ịlẹ kịị wang ịlụwa wụ ka alepweji ịkịla kaa hụlọ ẹhụ ju.

⁵Ọ yẹkẹẹ: ọwa nyị juwa yẹla ẹ-ẹpwụ nya ijiiji tanụ ala epwoja ịkịla bala ala Ẹdọm chajị nyọlẹ kanụ nụ ọpyị nyam la anụ juwa chị ọkẹkẹnị jọọwa bala ọ hum tẹbẹlẹ bwula edame nyam ịlẹ kanụ wụwụ.

⁶Chajị nya ọọwa lẹ,, yẹ ọmwụ ju ịgbọdọ bala ịba bala ikpokpo ịla Isirẹlụ yẹkẹẹ, Ọngọlahị Ohe Oluhye nyị ya ọwa nyị juwa yẹla ẹ-ẹpwụ nya ijiiji nyagbama nya ọọwa bwulọlẹ ka alẹpwụma ịkịla nyị doonu bala ọhwẹpẹpẹ junu.

⁷Chajị nya ọọwa lẹ Ọngọlahị Ohe Oluhye yẹkẹẹ: M myị ọnụ ọnyọọngịrị nyori epwoja ịlẹ kịị dagaga junu wẹ m ka chị oyoyi jwaa.

⁸Ma anụ igbọdọ nya ala Isirẹlụ, anụ ka bwu bwọ bala ọ nwụ egbe ha angịnyị nyam ala Isirẹlụ chajị ijuwa ka nya wẹpwa ahyaahị lẹ.

⁹Ịnyanụ m ri lẹ, m ka yẹ kaa jẹkpẹ nyanụ. Ị ka wung-ang ị ka ya egbe tọ ụwa.

¹⁰M ka họ iru ojuju nyanụ ka lụmẹ mwụba mwụba. Angịnyị ka kụ e-epweji nya ala Isirẹlụ wuu, ị ka ma ịgẹlẹ kịị ta ayịreji nwụ myịmyị.

¹¹M kahọ angịnyị bala iyo ileji nyanụ ka lụmẹ mwụba mwụba, iru ojuju nyanụ ka gụ ọọwa, anụ ka manyị lụmẹ-lụmẹ. M ka họ anụ ka kụ ịgẹlẹ jaabwọ kọ la ụka onyogo. M ka myịmyị hang ịnyịla hanụ gụ iwa wẹẹ. Ụkọwa lẹ anụ jẹ ya am a ri Ohe Oluhye lẹlẹ.

¹²M ka họ ala Isirẹlụ angịnyị nyam ka kụrụnụ ọọwa lẹ, ị ka yanụ la lẹlẹ. Anụ ka ri ang ugu nyaa, anụ a ka naa anyị kparụ myịmyị kaka.

¹³Ọngọlahị Ohe Oluhye yẹkẹẹ, Ọ ri nya ịlẹhị angịnyị kaa yẹla rụnụ nyori anụ kaa wu angịnyị ri bala ọ-nụ ẹpwụma ịkịla anjwo nyaa kparụ.

¹⁴Ma ọbwọlẹlẹ anụ a ka wu angịnyị ri lee o-nu anjwo nya alẹpwụma ịkịla kparụ kaka. Ịnyị Ọngọlahị Ohe Oluhye a yalẹ.

¹⁵M ka họ anụ ka wo ido idodo nya ẹpwụma ịkịla lee ọ huẹpẹpẹ junu lee ọ ka họ ka ẹpwụma nyanụ ka chụchụ kaka. Ịnyị am Ohe Oluhye a yalẹ.

¹⁶Ọngọlahị Ohe Oluhye yẹla tam yẹkẹẹ,

¹⁷Ọngịnyị ehe ee, ụka ọlẹ ka ala Isirẹlụ kwaam ọpyị nyaa lẹ, ị chọpyị nyaa ịrị bwula abwẹla bala angịlẹ kịkaa họ. Ịhịbịrị nyaa ịwa ịịlahị nyam lala ọnyang ọla cheri-cheri ka ụka ọlẹ kọ juwa ẹpwa nya umobi nyamwụ.

¹⁸Ọọwa lẹ, M wagbama taa chajị nya ịwọ nya angịnyị ịlẹ kịị chị cheji bala ọ chịpyị ịrị bwula ijiga ọkpụkpụ nyaa lẹlẹ.

¹⁹Chajị nya ọhịhị nyaa bala abwẹla nyaa ịlẹ kịkaa họ lẹ m nyaa epepe tụ epwoja wuu da lẹlẹ.

²⁰Ma epwoja ọnyị myị ọnyị ịlẹ kịị ka, ị hwoyoyi ju ẹnyị ịgọgọ nyam. Chajị nyọlẹ ka angịnyị kaa yẹla bala ya, Angịlẹ nyị ri angịnyịnya Ohe Oluhye ma nyị tị ruhi ọpyị nyaa lẹ.

²¹Ma ẹla nya enyị nyam ọlẹ ká ala Isirẹlụ hwẹpẹpẹ ju ẹpwụ nya ẹpwụma ịkịla ịlẹ kị ka rim ẹla.

²²Chajị nya ọọwa lẹ byi ala Isirẹlụ ya am Ohe Oluhye nyị yẹkẹẹ: Angọlẹ kam wẹka họ ari chajị nyanụ ala Isirẹlụ ka ma chajị nya ẹnyị ịgọgọ nyam ọlẹ kanụ huẹpẹpẹ ju ẹga myị ẹga ịlẹ kanụ ka.

²³Ụka ọlẹ kam chịgọgọ ju ẹnyị ọtụka nyam ẹnyị ọlẹ kanụ huẹpẹpẹ ju ụwa ẹpwụma ịkịla, ọọwa lẹ, ịka jẹ ya am Ọngọlahị Ohe Oluhye nyaa wẹẹ yẹla lẹlẹ. Bwulanụ m ka mẹnyị ịgọgọ nyam jaa lẹ.

²⁴M ka gbanụ kpehe bwu ẹpwụ nya ẹpwụma bala epwoja ịlẹ kanụ ji tịrẹkpẹ wẹ ọpyị nyịlọnụ.

²⁵M ka nyenyi ocheri-cheri hụnụ chajị kọ ka hụụnụ bwẹpwụ nya ịjiga ịkpụkpụ bala ang myị ang ịlẹ kị du kanụ cheri.

²⁶M ka ya ọkịlẹtụ onyewe bala olegu onyewe junu ẹpwụ. M ka hu ọkịlẹtụ nyẹjwọ nyanụ kparụ m ka ya ọkịlẹtụ nya ahwiyo hanụ.

²⁷M ka ya olegu nyam junu ẹpwụ m ka họ anụ ka kpa ehile bala ọna idada nyam.

²⁸Ụka ọọwa lẹ anụ ka kụwa ọpyị ọlẹ kam ya ha adanụ igogo, anụ ka ri angịnyị nyam lẹ, m ka ri Ohe Oluhye nyanụ lẹlẹ.

²⁹M ka chịnụ da bwẹpwụ nyang ịchịrị wuu. M ka dangiriri ehile kị ka ji lụmẹ-lụmẹ chajị ka uhii a ka myịmyị ji kaka.

³⁰M ka họ ka egbe nya ekeji bala ang oriri ịlẹrụ ka dịda chajị ka alẹpwụma ịkịla a ka myịmyị hwẹpẹpẹ junu chajị nya imyi ọnwụnụ nwụ kaka.

³¹Ụka ọọwa lẹ anụ ka kpịtịya abwẹla ịtịpyọ bala ang inyibyi nyanụ ịlẹ kanụ họ lẹ ọhọbịrị nyanụ a ka lanụ oyoyi lẹlẹ.

³²Ọ chajị nyanụ ala Isirẹlụ adu kam wẹ ka hangiiwẹ ka, anụ aa jowa mẹẹ, m tịtọ kanụ ka lịlọnụ oyoyi chajị nya ọhọbịrị nyanụ. Ịnyị am Ohe Oluhye a yalẹ.

³³Ọngọlahị Ohe Oluhye yẹkẹẹ, ẹnụ kam hụụnụ cheri-cheri kpa bwẹpwụ nya ọhọbịrị nyanụ, m ka họ anụ ka nẹpwa ụwa epweji nyanụ myịmyị anụ ka nwụla ang nyanụ ịlẹ kịị bịrị.

³⁴Ị ka wu ọpyị nyanụ ọlẹ kọda uhuhwo ẹrụ, ọ ka myịmyị riga ohideji ahi nya angịlẹ kịkaa yọọ ụka kịị juwa chịpwụrụ kaka.

³⁵Angịnyị ka yẹkẹẹ, ịnọ ịbịrị ịgẹlẹ wuu ine, ma ọyẹ kaka la lalaa iku nya iden lẹẹlẹ lẹ. Epweji ịlẹ kịị bịrị wuu kịị da uhuhwo angịnyị tị kuwa wuu ịmyịmyị me egwalẹ dagaga jwọọ lẹ.

³⁶Ụka ọọwa lẹ, ẹpwụma ịlẹ kịị hi wuu dagaga jung a ka je ya am a ri Ohe Oluhye ọlẹ kam nwụla ịgẹlẹ kịị bịrị bala ọ ya egbe tọ ẹgẹlẹ kọ dụwa ododu lẹlẹ. Am Ọngọlahị Ohe Oluhye a ya ịnyị lẹ m tị ka họ ịnyị lẹ.

³⁷Ọngọlahị Ohe Oluhye yẹkẹẹ: M ka myịmyị yiwe da ka ala Isirẹlụ ka byim kam ka họ liru ojuju nyaa ka lụmẹ mwụba mwụba lala ogu nya ịkpịlọ.

³⁸Epweji ịlẹ kịị tayireji wuu wẹ ka myịmyị myịlangịnyị jaabwọ ọlẹ ka iJerusalẹm kaa mịla ịkpịlọ ịlẹ kịkaa kpa kaa kịliya ụka nyẹka ogugu. Ụka ọọwa lẹ ịka jẹ ya am a ri Ohe Oluhye lẹlẹ.