Read idege ISIKẸLỤ 37 Bible Online

ISIKẸLỤ 37 - idege bible

ISIKẸLỤ 37

¹Ọngịrị nya Ohe Oluhye wẹ uhye nyam ọọwa lẹ, olegu nyamwụ a kpam kele kaa hụhụ ụwa ikpokpo ọlẹ kọ mịla ekpinegu lẹlẹ.

²Ọ kpam ga tụ ikpokpo da wuu. M yẹ nyori ekpinegu ịịwa jwiru lụmẹ ịtị nwonwu chụwa wuu kangba.

³Ụka ọọwa lẹ ọ tọm wo yẹkẹẹ: ọngịnyị ehe, ekpinegu ịlẹ ka jẹ-ẹ̀ hii wẹẹ? Ọọwa lẹ, m wọọ yẹkẹẹ, “O, Ọngọlahị Ohe Oluhye ahụ a jẹlẹ.”

⁴Ọọwa lẹ, Ohe Oluhye a byim yẹkẹẹ: Yẹ ọmwụ ju ekpinegu ịwẹ ka byaa yẹkẹẹ, anụ ekpinegu ịnwọnwụ anụ nyị wo ẹla ọlẹ ka Ohe Oluhye nyị ya.

⁵Ọngọlahị Ohe Oluhye byinu ekpinegu ịnwọnwụ yẹkẹẹ, ọwa nyị ka họ ịhụ ọdada nyịka juka ẹpwụ nyanụ anụ nyị ka myịmyị lọhịhị.

⁶Ọwa nyịka ya ekpiiji bala iyo nya ịnyịrọ junu, ọwa nyịka ya ụgba nya ịnyịrọ kụrụnụ bala ọ yẹ ịhụ ọdada jụka ẹpwụ nyanụ chajị kaanụ nyịka hị. Ọọwa lẹ, anụ nyaka jẹ ya ọwa nyaa ri Ohe Oluhye lẹlẹ.

⁷Ụka ọọwa lẹ m yẹ ọmwụ jaabwọ ọlẹ kị byim lẹlẹ. Ụka ọlẹ kam ya ẹla lẹ m wo kị juwa hiru kurokuro lẹ ọọwa lẹ, ekpinegu a juwa tụ gu awụlẹ lẹlẹ.

⁸Ụka ọlẹ kam juwa kwẹhị yaa, m yẹ nyori ekpiiji bala ahwiyo bala ugba nyịnyịrọ kele kaa kụrụ ekpinegu wuu ma ịhụ ọdada a tị juwa ẹpwụ nyaa ka.

⁹Ụka ọọwa lẹ Ọngọlahị a bim yẹkẹẹ, ọngịnyị ehe, yẹ ọmwụ ka byi igbachịwụ yẹkẹẹ, igbachịwụ Ọngọlahị nyịya ahụ nyị da bwu ịkịka ine kaa kụrụ egu ịwẹ chajị ka ọhịhị nyaa nyị nya tịrẹkẹ.

¹⁰M yẹ ọmwụ jaabwọ kị bim ọọwa lẹ, ịhụ ọdada a nya tịrẹkpẹ kepwụ nyaa lẹ ị hị lẹlẹ. Ụka ọlẹ kịị wuleji godayị kọkọ lẹ ịri iru nya ịsọja lụmẹ-lụmẹ lẹlẹ.

¹¹Ohe Oluhye bim yẹkẹẹ, ọngịnyị ehe, ekpinegu ịwẹ lala angịnyị nya ala Isirẹlụ ị yẹkẹẹ: ekpinegu nyịwa nyị nwọnwụ lẹ, ịwa nyị lẹhị ọrịrịịrịrị kaka. Ịnyịwa nyị myi gbang gbang lẹ.

¹²Chajị nya ọọwa lẹ yẹ ọmwụ ka byaa yẹkẹẹ: Jaabwọ ka Ọngọlahị Ohe Oluhye nyị ya nyiri anụ angịnyị nya ọọwa ọwa nyị juwa ka wụrụ iworu nyanụ kọwa nyịka gbanụ kpehe ọọwa lẹ, ọwa nyaka kpanụ nya tịrẹkpẹ ka ọpyị nya ala Isirẹlụ lẹlẹ.

¹³Anụ angịnyị nyam, ụka ọlẹ kam wụrụ iworu nyanụ kam gbanụ kpehe bwuwa lẹ anụ ka jẹ ya am ari Ọngọlahị Ohe Oluhye lẹlẹ.

¹⁴M ka ya olegu nyam junu ẹ-ẹpwụ bala ọyanụ kụwa ọpyị nyanụ, ụkọwa lẹ anụ ka jẹ ya ẹla ịlẹ kam Ọngọlahị ya lẹ, m ka haa lẹlẹ.

¹⁵Ọngọlahị yẹla tam yẹkẹẹ,

¹⁶Ọngịnyị ehe ee, hu eku nya okoji ka dụpwụ bọọ ya ala iJuda bala ala Isirẹlụ nyị yẹ julawụlẹ, ka hu eku nya okoji ọkịla ka dụpwụ bọọ, iJosẹfụ ọlẹ kori okoji nya iFurem bala ala Isirẹlụ wuu nyị ye julawụlẹ.

¹⁷Aalẹ a ya ekeji imiiye iwa yi awụlẹ ụbwọ nyang chajị kị ka lala okoji okpokpo mẹ.

¹⁸Aalẹ ụka ọlẹ ka angịnyị nyang a tongwo yẹkẹẹ, a ka ya jehi ẹtụ nya angịlẹ ka aliwẹ ri kaa.

¹⁹A waa ya Ọngọlahị Ohe Oluhye nyị yẹkẹẹ, ọwa nyị juwa ka hu okoji nya iJosefu ọlẹ kori ụbwọ nya Ifurem bala onegbe nya ala Isirẹlụ ịkịla julaa ọọwa lẹ, ọwa nyaka hu okoji nya iJuda hịlọọ lẹ ịwa imimiiye nyakari okoji okpokpo ụ-ụbwọ nya ọọwa lẹlẹ.

²⁰Aa kpa ekeji imiiye ịlẹ ka dang ba ụwa ụbwọ nyang chajị ka angịnyị wuu a yaa.

²¹Byaa ya Ọngọlahị Ohe Oluhye nyị yẹkẹẹ, m juwa ka gba angịnyị nyam kpehe bwu epwoja ịlẹ wuu kịị rụka, m ka taa guru ọọwa lẹ, m ka kpaa nya wẹ ọpyị nyị laa lẹlẹ.

²²M ka yaa julaụlẹ chajị kị ka ri ẹpwụma okpokpo ụwa uhye nya igbọdọ nya ala Isirẹlụ: Adịrahụ okpokpo a ka kpẹhị rịraa wuu lẹ. Ị ka myịmyị chịlaa ebwo ri ẹpwụma imiiye, lee ọpyị adịrahụ imiiye kaka.

²³I ka myịmyị-ị̀ chịlaa ịrị bwula ịhọhọ nyaa kaka. M ka gba kpehe bwu ugbẹhị nya ọhọbịrị nyaa ịlẹ kịkaa họ bala ẹkpẹ ọlẹ kịkaa ji dam. M ka hụaa ịka la cheri-cheri. Ị ka ri angịnyị nyam m tịka ri Ohe Oluhye nyaa.

²⁴Ọnchẹ nyam iDevidi a ka ri adịrahụ nyaa lẹ, ịwa wuu ka la ọngọ gbịkpịlọ okpokpo ị ka kpa ehile nyam bala ọna ọdada nyam wuu kpẹẹkpẹẹ.

²⁵Ị ka kụ ụwa ọ-ọpyị ọlẹ kam ya ha ọnchẹ nyam iJekobụ, ẹgẹlẹ ka adaa igogo anyị kụ. Ịwa bala anyị nyaa bala anyị ịtụma nyaa ka kụwa pyịyọọ. Ọnchẹ nyam iDevidi ka ri adịrahụ nyaa gboyi myị oyi.

²⁶M ka nwa iro nya okpunyi taa, iro ọwa ka ri iro ọ gbe oyi myị oyi, m ka wahị kụraa m ka họ ịka lụmẹ mwụba mwụba. M ka họ ube ịgọgọ nyam ka juwa ọ-ọpyị nyaa gbe oyi myị oyi.

²⁷Igele kam ka kụ ka juwa balaa, m ka ri Ohe Oluhye nyaa, ịka ri angịnyị nyam.

²⁸Ụka ká ube ịgọgọ nyam a juwa taa gbe oyi myị oyi lẹ, angịnyị wuu a ka jẹ ya am Ọngọlahị Ohe Oluhye nyị chịgọgọ ju ala Isirẹlụ lẹlẹ.