Read idege ISIKẸLỤ 38 Bible Online

ISIKẸLỤ 38 - idege bible

ISIKẸLỤ 38

¹Ụka ọọwa, Amkpaa ya ẹla tam yẹkẹẹ,

²Ọngịnyị ehe ee, yẹ ọmwụ tụ ịGọọgụ adịrahụ ọgbẹgbịlẹ nya ala ịMẹchẹkị bala iTubalụ ịlọpyị nya ịMagọọgụ pyịpyị ịịlẹ wẹẹ:

³Ahụ ịGọọgụ ee, am Ọngọlahị Amkpaa ri oluji nyang lẹ.

⁴M̀ ka tụng tutu, jing kpata, ya ọkụja jung a-abarụ lẹ, m̄ ka gbileng bala iru nya angịdẹwụ nyang kpa rụ lẹlẹ. Angịdẹwụ nyang ị-kụ anyịrẹ lakụmada bala oge nyaa a-abwọ ju iru kpẹẹ.

⁵Ala iPechiya bala Itiyopyiya bala iLibya juwa ẹ-ẹpwụ nya angịdẹwụ nyang ịnyịnyị lakụmada bala okpo ịkụrụ egbeju nyaa.

⁶Angịdẹwụ nya ala iGomẹẹ bala ịBẹtị-ịtogama ịlẹ kị bwu ẹtẹ hwẹ̀ẹẹ bala alẹpwụma ịkịla juwa ịnyịnyị.

⁷Ahụ ịGọọgụ ee, aa nwụlanọ nya ẹwụ bala angịdẹwụ nyang wuu mẹ.

⁸Ẹka lụmẹ-lụmẹ ị-ịlahị m ka tụnụ guru kanụ ka dẹwụ tala ẹpwụma ọlẹ kịị kpa angịnyị nyaa nya bwu ẹpwụma ịdatị-datị ẹga ka alẹwụ waa kparụ ka. Ọ-ọpyị ọlẹ ka angịnyị tuguru lụmẹ-lụmẹ ụwa uhye nya ọgbọdọ nya ala Isirẹlụ ọlẹ kọda uhuhwo iniine. Ọlẹlẹ nyọlẹ kịị kpangịnyị nyaa nya lẹ ị kụwa wuu lokpunyi lẹ.

⁹Ahụ bala ịsọja nyang bala alẹpwụma ịkịla ịlẹ wuu kịị juwa tang ka juwa kele tuuu lala ịgbachịwụ ọtụka, anụ ka kụrụ ẹga wuu lala amwụ.

¹⁰Ọngọlahị Ohe Oluhye yẹkẹẹ: Ụka ká ẹnụtụrụ ọwa a warị a ka juwa dọmwụ nyọka me irya onyobyi ẹ-ẹpwụ nyọkịlẹtụ nyang.

¹¹A ka yẹkẹẹ, ọwa nyịka kele kaa dẹwụ ta epweji ọlẹ kịị nyị hwalẹ keem lokpunyi nyaa. Epweji ọlẹ kịị nyị me egulọ jwaa lee ọla ogirigba ka.

¹²Anụ ka kele chajị ọ ri irya nyanụ nyọka wang wu bala ọnwụla ang nya angịlẹ kịị kụrwa ọ-ọpyị ọlẹ kịị tayireji ẹnẹhẹ lẹ kparụ. Angịịwa nyaa bwu ẹpwụma ịkịla datị-datị kaa tuguru. Ọlẹlẹ ịla iyo ịlẹpwa bala ang-abwọ datị-datị, ịtị kụwa epwarịrị nya odehe.

¹³Ala ịChẹba bala ala ịDẹdan bala alọhị bwu epweji ịla iSipeen ka tọng wo yẹkẹẹ, À tụ angịdẹwụ nyang guru nyọka be ẹpwụ kaka wụ ang-ụdụ wụ kpa rụ lẹ-ẹ́? À tịtọ nyọka go okpoko onyoowuru bala okpoko ịgọm bala iyo ileji bala ang ịlala nya angịnyị kpa rụ-ụ́?

¹⁴Ahụ ịGọọgụ ee, am Ọngọlahị Amkpaa jẹ nyori ụka ká ala Isirẹlụ angịnyị nyam-ḿ juwa lokpunyi, à ka gu ịlọng achwọ,

¹⁵hu ang bwu ọpyị nyang ọlẹtẹ hwẹ̀ẹẹ liru nya angịdẹwụ ịlọngịrị bwu ẹpwụma lụmẹ-lụmẹ lanyịrẹ kwangkwang juwa warị.

¹⁶À ka wẹ tuuu lala igbachịwụ ọtụka-à yịrị ẹga yịrị kaka mwẹla ta ala Isirẹlụ angịnyị nyam. Ị-ịlahị, m̀ ka dung ahụ ịGọọgụ kaka be ọpyị nyam ẹpwa chajị ká ẹpwụma datị-datị ka jẹ ọngọlẹ kam ri. M̀ ka chị ịgọgọ ọlala nyam ehe bwula ang ịlẹ kam ka kpang họ.

¹⁷Am Ọngọlahị Amkpaa jam bying ahụ ịGọọgụ yẹkẹẹ, ahụ a ri ọngọlẹ kam yẹla rụ ụka onyogo bwọnụ nya ọnchẹ nyam ọlọmwụ nya ala Isirẹlụ nyọ rẹkẹ m ka kpanụ kaa dẹwụ tala Isirẹlụ kaa?

¹⁸Ọngọlahị yẹkẹẹ: Ụka ká ala Igog a ka wẹka dẹwụ tala Isirẹlụ, agbama nyam ka wuleji.

¹⁹M juwa ya jeng ẹ-ẹpwụ nya ijiiji bala ẹepwụ nya ikẹjẹ-awụrụ nyam yẹkẹẹ: ẹnụtụrụ ọwa ịpyị ọhụ jigi jigi ka ji aam Isirẹlụ.

²⁰Iyenyi ịlẹpwụ nya ihu ịtụka bala ịchịnụ ịlụhye-ọgba bala iyo ịlẹpwụmẹ bala angịịlẹ kịkaa wụlọ e-eji wuu tụ angịnyị ịlẹ kịị jam odehe ọlẹ wuu ka juhi nyẹhị nyam. Ịgbọdọ ka chabwọ. Ajwọ ịlẹ kịị kụ awụlẹ uuhye wuu ka ri chikeji, egwalọ wuu ka tụrụ.

²¹Ọngọlahị Ohe Oluhye yẹkẹẹ: M ka du angịnyị kaa dẹwụ ta ala Igog ụwa uhye nya ịgbọdọ nyam. Angịnyị nyamwụ ka jahị da awụlẹ.

²²M ka yala ịGọọgụ akama la ẹdụrụ bala igu ogbugbu. M ka du ukpenyi ọtụka-ọtụka bala ọ da ajwọ bala ịla kụrụ ịGọọgụ bala ịsọja nyamwụ bala angịlẹ wuu kịị juwa tọọ.

²³Ugbeyị ọwẹ m ka mẹ ụmụmẹ bala ịgọgọ ọlala nyam jẹ ẹpwụma ịkịla lẹ. Ụka ọọwa lẹ ịka jẹ ya am a ri Ohe Oluhye lẹlẹ.