Read idege ISIKẸLỤ 39 Bible Online

ISIKẸLỤ 39 - idege bible

ISIKẸLỤ 39

¹Ọngọlahị Ohe Oluhye yẹkẹẹ: ọngịnyị ehe, yẹ ọmwụ tụ Igog ọlegbeju ọkpẹhị rịrị ịMẹchẹkị bala iTubalụ pyịpyị ka byoo ya ẹla nyamwụ nyị wụmẹjẹ.

²M ka jing kpata, m ka kpang bwu edii pyịpyị warị kaa dẹwụ ọ-ọgbọdọ nya ala Isirẹlụ.

³M ka nụng uda nyang deeji bwu ụbwọ ụpụpịla bala ọ nụng ịcha cheji bwu upwuriri nyang.

⁴Ahụ bala angịị dẹwụ nyang tuu angịlẹ wuu kịị juwa tang ka ta ayịreji ụwa uhye nya ịgbọdọ nya ala Isirẹlụ. M ka yaa ẹgụ nyanụ ha ịchịnụ iluhye bala iyo ịlẹpwamẹ ri.

⁵Anụ ka gbu chụwa ẹ-ẹpwamẹ, ịnyị am Ohe Oluhye a yalẹ.

⁶M ka du ịla chị ala ịMagọgụ bala angịlẹ kị huwa keem nyaa ọnenyi ogu, ụkọwa lẹ ịka jẹ ya am a ri Ohe Oluhye lẹlẹ.

⁷M ka họ ala Isirẹlụ ka jẹ enyị ịgọgọ nyam, m ka myị ọngọngọhẹ ka hu ẹpẹpẹ ju ẹnyị nyam myịmyị kaka: Ụka ọọwa lẹ ala ẹpwoja wuu a ka jẹ ya am a ri Ongọlahị, ọngọ ịgọgọ nya ala nya ala Isirẹlụ lẹlẹ.

⁸Ọngọlahị Amkpaa yẹkẹẹ, Ẹnụtụrụ ọlẹ kam ya ẹla rụ juwa ka wẹ ahyaahị.

⁹Ụka ọọwa lẹ angịlẹ kị kụwa epweji nya ala Isirẹlụ a ka go akụmada bala ẹda bala ịcha bala ịkpachị nyaa lẹ ịka ya ju ila lẹlẹ. Ịka kpa tu ila ju ẹka irwiye.

¹⁰Ọ ka baba ịka kele ka ẹpwamẹ nyọka pịlahị nya iiwu lee ọ tụrụ ekeji iipinu ene kaka chajị, ang-abwọ nyẹwụ ịwa ịka kpa tu ila ju lẹlẹ. Ị ka nwulang bala ọ wang nya angịlẹ kịị nya angịlẹ kịị nulang bala ọwang nyaa wuu kwiwa. Ịnyị Ọngọlahị Ohe Oluhye a yalẹ.

¹¹Ọngọlahị yẹkẹẹ: Ẹnụtụrụ ọọwa, m ka ya ọpyị ọlẹ kịị ju Igog eji họọ I-Isirẹlụ, ụwa ikpokpo ọlẹ kị wụrụ “Itraveler” koye nya ọmwẹnụ-ụtụrụ nya Ihu ọlẹ kọ kaa mwụ ka ẹga ọọwa ị ka ju ịGọọgụ bala iru nya alẹwụ nyamwụ eji wuu lẹ. Ọọwa lẹ, ị ka wụrụ ụwa nya ikpokpo nya iHamon-gọọgụ lẹlẹ.

¹²Ala Isirẹlụ ka ju egu nyaa eji gbee eepwụ nya ẹka irwiye ine ka ẹga kajẹ la cheri-cheri.

¹³Ala Isirẹlụ wuu ka yụbwọ da egu ịịwa ju eji. Ọọwa ka ri ihi haa ẹnụ kam ka kụrụ haa. Am Ọngọlahị Amkpaa-à ya ịnyị lẹ.

¹⁴Ụka ka ịya irwiye-é kam kpá, ị ka chụ angịhyẹ kị ka ga tụ ẹga myị ẹga da go akịrakpa ịlẹ kị ka hi chị ụ-ụwa odehe ju eji, chajị ká ọpyị ka la charị-charị.

¹⁵Ụka ká angị pịlahị nya egu a yẹ ekpinegu nya angịnyị chụwa odehe ẹ-ẹgẹgẹhẹ, ị kaa ju ẹga ọọwa ẹjẹẹ chajị ka angị wu iworu ka kele kaa gyaa kpa kaa ju eji ọ-Ọkpọọ nya Angịdẹwụ nya ịGọọgụ.

¹⁶(Epweji ọhẹ ka juwa ụ-ụwa ká ẹnyị nyamwụ ri ịHamona.) Ịịwẹ, ọpyị ọlẹ à ka bwu la charị-charị myịmyị lẹlẹ.

¹⁷Ọngọlahị Amkpaa byim yẹkẹẹ, ọngịnyị ehe ee, wụrụ ịchịnụ bala iyo ụma ọnyị myị ọnyị kị warị bwu ẹga myị ẹga kaka ri iya ọlẹ kam lẹẹ nwụlanọ gbaa ị-ịgbọdọ nya Isirẹlụ mẹ. Ị ka ye iyo ri bala o-ye ịwọ nwa ịnyịnyị.

¹⁸Anụ ka ri iyo nya ịsọja ịlịngịrị ịtụka bala ọ nwịwọ nya adịrahụ ịkpẹhị rịrị ala odehe, lala ori anụ juwa ri ịmwụ bala ẹna i-ju eyo.

¹⁹Ụka ọlẹ kam nwụ angịlẹ hanụ lala iya ọkịlaa kịla wẹẹ, anụ ka ri eyo nya angịnyị kpụrụ hi anụ tịka nwa iwo nya angịnyị gbee kanụ ka ya.

²⁰Anụ ka ri iyo nya anyịrẹ bala ịnya ịsọja bala ịnya ọgẹwụ nyaa gbee kanụ ka wẹpwụ. Ịnyị am Ọngọlahị Ohe Oluhye a yalẹ.

²¹M ka mẹ ịgọgọ ọlala nyam jẹ angịnyị, ịtị ka jẹ akama ọlẹ kam ka yaa ụka ọlẹ ka ụbwọ nyam a ka uhye nyaa.

²²Bwu ẹnụtụrụ ọwa kịlahị, ala Isirẹlụ ka jẹ ya am a ri Ọngọlahị Ohe Oluhye nyaa lẹ.

²³Ala ẹpwụma ịkịla wuu tị ka jẹ ya angịnyị nyị kụrụ ala Isirẹlụ ẹ-ẹwụ bala ọwaa kparụ chajị nya ịhọbịrị ịlẹ kịị nyị họ bọwa. Chajị nya ọhọbịrị ịwaa nya tị tu kọwa nyịị ya ehị nya ọọwa kpịbaa hyaa bala ọ yaa ju aluji nyaa ụbwọ kịị nyị kụrwaa ẹẹwụ lẹ.

²⁴M yaa akama chajị nya ọla cheri-cheri ka bala ọhọbịrị nyaa, m myịmyị ya ẹhị nyam kpịbaa hiaa.

²⁵Chajị nya ọọwa lẹ Ọngọlahị Ohe Oluhye yẹkẹẹ: m ka tịrị iwe-ahụrụ nya iJekobụ ẹkpẹ kaa la jaabwọ ọlẹ kọla ene, m ka yẹ ahyẹẹrwẹrwa nya ala Isirẹlụ wuu. M ka la ijiiji chajị nya enyị ịgọgọ nyam.

²⁶Ụka ọlẹ kịị juwa ọ-ọpyị nyaa lokpunyi lọngọngọhẹ ọ jwaa uhihi kaka lẹ, ị ka deeri jaabwọ kịị hu oyoyi jwaa bala jaabwọ kịị jẹkpẹ nyaa dam lẹlẹ.

²⁷Ụka ọlẹ kam kpaa nya tịrẹkpẹ bwu epwoja ịlẹ kịị ji wuu bala ọtaa guru bwu ọpyị nya aluji nyaa. Bwulaa m ka chị enyị ịgọgọ nyam ehe ịịlahị nya ẹpwụma lụmẹ-lụmẹ lẹ.

²⁸Ụka ọọwa angịnyị nyam ka jẹ ya am a ri Ọngọlahị Ohe Oluhye nyaa lẹ. Ang odudu ri yẹkẹẹ: M ya ẹga da alẹpwụma ịkịla kụrwaa ẹ-ẹwụ, ịwaa kparụ ma m tịraa ẹkpẹ nya wẹ ọpyị nyaa, ọngọngọhẹ a hii ka.

²⁹M ka ya olegu nyaam kụrụ ala Isirẹlụ, alẹẹ m ka myịmyị ya ẹhị nyaam kpịbaa hiaa kaka.