Read idege ISIKẸLỤ 4 Bible Online

ISIKẸLỤ 4 - idege bible

ISIKẸLỤ 4

¹Ọọwa, Ohe Oluhye à byi iSikẹlụ yẹkẹẹ, Ọngịnyị ehe-e, hu ịbịlọọku ọhẹ nọ ịlahị nyang ká gba ihwoto nya epwẹji nya iJerusalẹm bọọ mẹ.

²Họ jaabwọ kị ka bwu be iJerusalẹm ẹpwa, ká họ ang o-me ụtụjẹ bala ugbudu bala ang ọ-kpa be ugulọ ene ịnyịnyị dagaga ju ihwoto nya iJerusalẹm ọwẹ mẹ.

³Hu oje ọpapịla ọhẹ ká ya rịrị kọkọ lala ugulọ apewa nya ịlọng bala epweji mẹ. Jahị da epweji ọwẹ kpakpaakpa ka họ lala ịnyaa juwa ka mwẹla tọọ lẹ mẹ. Ahụ kpangga a tịị wẹẹ ka boo ẹpwa lẹ. Ọwẹ ka ri ang-ẹjẹẹ ha ala Isirẹlụ.

⁴Ụka ọọwa lẹ, ká hị nọnọ ya ịkịla nya upipila nyang beji mẹ. Ọọwa, m̄ ka ya abyị nya ala Isirẹlụ nịrọng lẹlẹ. A ka nọ ụ-ụwa juwa yẹ akama chajị nya ang onyobyi ọhọhọ nyaa jịra ẹnụtụrụ ohu ịta da iwo ihikichu.

⁵Am chị ẹnụtụrụ ohwiwo da ohwirụ kụrụ ohwine da iwo hang ịlẹ kị kwọmwẹkpẹ nya ẹka ịlẹ kị họ ang onyobyi kaka yẹ akama chajị nya ịhọbịrị nyaa.

⁶Ụka ká ẹnụtụrụ ịwẹ a cheju a ka myịmyị ji ịchịcwọ nya ụpwụrịrị da kaka yẹ akama wọnụ nya ịhọbịrị nya ala iJuda ju ẹnụtụrụ ohwiye ịnyịnyị, ẹnụtụrụ ọnyị myị ọnyị ku ọmwakpa nya ẹka ịlẹ kị họbịrị.

⁷Ya ehị nyang rịrị epweji nya iJerusalẹm ọlẹ kị dagaga ju wẹ kpakpaakpa ka nịra ụbwọ nyang kpaa kele luhwo-luhwo ka yẹ ọmwụ jwoo mẹ.

⁸Am ka chịng ori chajị ka ka jẹ-ẹ̀ jikpata myị ka gbee pwụka ọlẹ kaka họ ẹnụtụrụ ịlẹ kam cheju.

⁹Chajị nya ọọwa lẹ, aa chụ ajẹ nya ịbalị bala iwiiti bala achị bala ilentis bala aanaa bala ispet ka rwaa ju lawụle chajị ka haa akama ịlẹ kaka kpari ẹpwụ nya ẹnụtụrụ ohwo da ohwirụ kụrụ ohwine kwịriwo ịlẹ kaka nune ya ịchwichwọ beji wẹ mẹ.

¹⁰Aka me ang oriri ọlẹ kaka ri ori ẹnụ myị ẹnụ, ọkala Ichekel ohu chiriri, ang oriri ọwaà tị́ka kpang daka ahị ọpyẹpyẹ ọkịla lẹlẹ.

¹¹A tị́ ka me enyi ọnwanwa nyang ori ukoku imiiye nwa ẹnụ myị ẹnụ ịnyịnyị, ụka ọlẹ kam chịnọ hang a ka nwa lẹ.

¹²Aka kpa ịmyị nya angịnyị ehe tilaju, uhye nya ịla ọwa a ka họ ang oriri nyang lẹ, aa tụ ila ọwa ju gede-gede ka ọngọ myị ọng a yẹng wuu.

¹³Ọngọlahị yẹkẹẹ, “Ịwịwẹ ala Isirẹlụ a ka ri angị riri ịchịrị ụwa ẹpwụma ịlẹ kị ka wa kpaka lẹlẹ.”

¹⁴Ụka ọwa lẹ m wẹ yẹkẹẹ, “Ọ kalịnyị ka Ọngọlahị Ohe Oluhye. Bwụka ọlẹ kam ri onjwo gbee daalẹ, m rang oriri ọ-chịrị ẹnẹnẹhẹ lẹka, lee ọ ri iyo ogbugbu lee ọlẹ ka iyo ịnyịngịrị ịlẹpwụmẹ nwụ ka.”

¹⁵Ụka ọọwa lẹ, Ọngọlahị a byim yẹkẹẹ, “M ka bahing kaka kpa ịmyị nya ịgọdọ hang oriri nyang ọkọkọ nyọlẹ kaka kpa ịmyị nya ọngịnyị ehe lẹ.”

¹⁶Ọ myịmyị ya ẹla tam yẹkẹẹ, “Ọngịnyị ehe, m ka họ ọlẹ ka ang ọriri ka kwamwụ am iJerusalẹm angịnyị ịlẹ kị jam wuu ka bwahiiji bala hụkpakpaakpa ụka kị juwa mang oriri nyaa bala enyi ọnwanwa nya ẹpwụ ine kị ka ri bala nwanwa.

¹⁷Ụka ká ang oriri bala enyi ọnwanwa a kwamwụ, ọ ka la angịnyị ẹbyẹbyị, ị ka chẹhị-ẹhị kaka yẹ awụlẹ, ọọwa lẹ, ị ka juwa ta ayịreji chajị nya ịhọbịrị nyaa lẹlẹ.”