Read idege ISIKẸLỤ 40 Bible Online

ISIKẸLỤ 40 - idege bible

ISIKẸLỤ 40

¹Ẹnụtụrụ iwo nya ẹka ohu kụrụ irụ nyọlẹ kị wuhi kparụ nya alagba nyẹwụ bala ẹpwụ nya ẹka iwo kụrụ ine nyọlẹ kịị kụrụ ala iJerusalẹm, ọngịrị nya Ohe Oluhye wẹ uhye nyam ọọwa lẹ, ọ kpam rụ lẹlẹ.

²Ụ-ụwa ẹpwụ nya ọyị ọyẹyẹ lẹhị nya olegu ọlẹ ka Ohe Oluhye mẹjẹm, ọ kpam ka ọpyị nya ala Isirẹlụ, ọọwa lẹ, ọ yam hụ uhye nya ọgbọdọ ọ luhye ọtụka-ọtụka lẹlẹ. Ụ-ụwa ọ ye nya edii nya ọgbọdọ ọọwa, m chẹhị kaa yẹ ịngịhyẹ kịị me angịịwa me epweji ọ me ụgụlọ ju.

³Ụka ká Ọngọlahị kpam tu ju ebe ịịwa chwẹẹ, m chehị kaa yẹ ọlẹng ọhẹ kọ hụ myịrị myịrị lala abang. Ọ kpa ori bala okoji ọ kpa maang ori ụwa ụbwọ ọ godayị ụwa ogirigba ọlẹ kịkaa bwu kele.

⁴Ọlẹng ọwa bim yẹkẹẹ: ọngịnyị ehe, aa yọyị kpẹẹkpẹẹ ka ke ụrụ dụmwọ bala ọ hu ọkịlẹtụ nyang nịrọ ang ịlẹ kam wẹẹ ka mẹjẹng. Chajị nya ọọwa a du kị kpang wẹ ẹgẹlẹ lẹ. Aa ya ang myị ang ịlẹ ka yẹ wuu je ala Isirẹlụ.

⁵M yẹ kị me ugulọ dagaga ju ube ịgọgọ nya Ohe Oluhye. Okoji ọ maang ori ọlẹ ka ọlẹng ọwa kpa ụwa ụbwọ nyamwụ la apatẹ iwo bẹhya. Ụka ọọwa lẹ ọ me ụgụlọ ọwa ori la okoji ọwa lẹlẹ. Uhye ọlala nya ugulọ la apatẹ iwo bẹhya, ụka ọchịchị nyamwụ la apatẹ iwo ba ẹhya ịnyịnyị.

⁶Ụka ọọwa lẹ ọlẹng ọọwa a kele ka ogirigba ọ ka ọmwẹnụ-ụtụrụ lẹ, ụka kọ wule ka uhye nyamwụ lẹ ọ me ọnang nya ogirigba ori lẹlẹ. Ori omeme nyamwụ la apatẹ iwo bẹhya.

⁷Apwụ nya ebe nya angịị gbeji juwa, ebe iwa ọnyị myị ọnyị la apatẹ iwo ba ẹhya ẹ-ẹpwụ ojuju bala apatẹ iwo ba ẹhya udiyo ọlala. Ụka ọchịchị nya ugulọ ọ lẹpwarịrị nyaa ri apatẹ ihikichu, ọnang nya ogirigba nya ọnụụkpa ọlẹ kọ jahị daka ube ịgọgọ la apatẹ iwo bẹhya.

⁸Ọlẹng ọọwa me ọnang nya ọnụụkpa ọlẹ kọ jahị daka ube ịgọgọ ori.

⁹Ọ kpori-kpori nyamwụ la apatẹ iwo kụrụ ine. Ịkpangọ ịlịkịka nyamwụ la apatẹ ịta bẹhya. Ọnẹẹkpa nya ọnang ọwa ji be ube ịgọgọ ba.

¹⁰Ebe nya angịị gbeji la ịta ụpa ọhẹ bala ụpa ọkịla nya ogirigba ọla ọmwẹnụ-ụtụrụ, ebe ịịwa wuu a lụmẹ gu awụlẹ ka, ịkpango nya ebe ịwa wuu la mememe ịnyịnyị.

¹¹Ọlẹng ọọwa mori nya ụgbẹyị ọlẹ kịị ka bwu ẹpwụ ojuju nyamwụ la apatẹ iwo kụrụ irwiye bẹhya, udiyo nyamwụ la apatẹ ohu kụrụ ịta.

¹²I me egwalọ ibẹdẹ ịhyẹ ịịlahị nya ebe nya angịị gbeji ọnyị myị ọnyị. Uhye ọlala nya ri insis ohu. Ebe ịịwa la apatẹ iwo ba ẹhya dagaga ju.

¹³Ọ me ori nya ube bwu ọchị mworu ọhẹ kele ka ọchị mwọrụ ọla ụpa ọkịla, ẹpwụ ojuju nyamwụ ri apatẹ ohwiye kụrụ ine.

¹⁴Ọ me ori nya ube ọ la ọbaba ọlẹ kịị kaa bwu ka ube ọtụguru, ẹpwụ ojuju nyamwụ la apatẹ ohu kụrụ iwo da irụ.

¹⁵Udiyo ọlala bwu odehe nya ịgẹlẹ kịị kaa bwu ka ube kaka pwụ ọbaba nyamwụ ọlẹpwụ la apatẹ ohwiye kkụrụ irwiye bẹhya.

¹⁶Ebe nya angịị gbeji bala ịịkpango nya ebe tụ ọnụụkpa nyamwụ wuu la iwondo ụwa ẹ-ẹpwụ, ị kọ arụrụ nya igbirii bahị ị ya ba ụwa uugulọ ịlẹpwụ.

¹⁷Ọlẹng ọwa kpam ka ube ọtụguru ọlodehe, ime apwụ nya ebe ohu kụrụ iwo gu ugulọ nyamwụ. I ya ajwọ baa wuu rẹrẹrẹ

¹⁸daga ju ube otuguru ajwọ ịlẹ kịị ya baa ịwa la bẹdẹ weji.

¹⁹Ọ me ori nya udiyo nya ọnang ọlodehe ka jụka odehe nya ube otuguru. Ọ la apatẹ ohu ineku kụrụ iwo da irụ.

²⁰Ọlẹng ọwa me ori nya udiyo bala ẹpwụ ojuju nya ọnang ọlẹtẹ ọlẹ kọ da jụka ube ọtuguru olodehe.

²¹Ebe nya angịị gbeji ịta ịlapa imimiiye bala ịịkpangọ nya ube bala ọnẹẹkpa nyaa la mememe bala ịnya ọnang oloye nya ọmwẹnụ-ụtụrụ. Udiyo nyamwụ la apatẹ ohwine kụrụ irwiye bẹhya, epwụ ojuju nyamwụ la apatẹ ohu iye kụrụ ine.

²²Ọnẹẹkpa nyamwụ bala iwondo bala arụrụ nya ịgbịrị-ịbahị ịlẹ kịị gba baa wuu la mẹmẹmẹ bala ịnya oloye nya ọmwẹnụ-ụtụrụ. Ang ọ ya ẹta rịrị wule kuhye nyamwụ la irwiye kele kuhye nya ọnang. Ọọwa lẹ, ọnẹẹkpa nya ube a juwa ẹ-ẹpwụ lẹlẹ.

²³Ọnang ọlẹtẹ da jụka ube ọtuguru ọlẹpwụ jaabwọ ka ọla ọmwẹnụ-ụtụrụ la. Ọlẹng ọọwa mori nya udiyo nya ọnang ọ lodehe kaa jụka ọnang ọ lẹpwụ, ọ la apaptẹ ohu ineku kụrụ iwo da ịrụ.

²⁴Ọlẹng ọọwa kpam koye nya edii, ọnang ọkịla juwa ịnyịnyị, ụka kọ mori nyamwụ ịkpango nya ube bala ọnẹẹkpa nyamwụ ọlụwa bala ịla ụpa ịkịla wuu la mememe.

²⁵Iwondo juwa wuu dagaga ju ụwa ọnẹẹkpa ọla edii lala ịla iga ịkịla. Udiyo nya ọnẹẹkpa ọwa ri apatẹ ohu ine kụrụ irwiye bẹhya, ẹpwụ ojuju nyamwụ la apatẹ ohwiye kụrụ ine.

²⁶Ang ọ ya ẹta rịrị wule kuhye nyamwụ la irwiye. Ọnẹẹkpa nyamwụ juwa ịlahị nyamwụ. Ị ya ịgbịrị-ịbahị ịlẹ kị kọ ba ii-kpango nya ube upa ọhẹ bala ọkịla.

²⁷Ọnaang ọhẹ juwa u-ube ọ tuguru ọlẹpwụ, ọlẹng ọọwa mori nyamwụ bwu ọnang ọhẹ kaa jụka ọkịla. Ori apatẹ ohwineku kụrụ iwo da ịrụ.

²⁸Okpam bwu ọnang ọla edii ka ube otuguru ọlẹpwụ, ọ mori nyamwụ. Ọwa bala inya ube otuguru olodehe mememe.

²⁹Ẹpwụ nya ebe nya angịị gbeji tu ịịkpanggọ nya ube bala ọnẹẹkpa nyaa wuu la mẹmẹmẹ iwondo juwa dagaga ju ọnang bala ọnẹẹkpa nyamwụ wuu. Udiyo nyamwụ la apatẹ ohwineku kụrụ iwo da irwiye behya ẹpwụ ojuju nyamwụ la apatẹ ohwiye kụrụ ine.

³⁰Ọnẹkpa juwa ọnang ọlẹpwụ wuu dagaga ju, udiyo nyaa la apatẹ ohwiye kụrụ ine, ẹpwụ ojuju nyaa la-la apatẹ ihikichu.

³¹Ọneekpa nyamwụ ji ahị da wẹ ẹpwụ nya ube otuguru ola odehe. Ị ya arụrụ nya ịgbịrị-ịbahị ba iikango nya ube ọlẹpwụ wuu, ang ọ ya ata rịrị wulẹ kuhye nyamwụ la ineku.

³²Ụka ọọwa lẹ, ọ kpam ka ube otuguru ọla ọmwẹnụ-ụtụrụ lẹlẹ, ọ me ọnang nya ụwa ori. Ọla jaabwọ ka ịkịla la ịnyịnyị.

³³Ọ me apwụ nya ebe nya angịị gbeji bala ịịkpango nya ube bala ọnẹẹkpa nya ube otuguru ori, ị la jaabwọ ka ịkịla la ịnyịnyị. Ọ la iwondo dagaga ju wuu bala ụwa ọnẹẹkpa nya ụwa. Udiyo nyamwụ ri apatẹ ohwine kụrụ irwiye bẹhya. Ẹpwụ ojuju nyamwụ la apatẹ ohwiye kụrụ ine.

³⁴Ọ nẹẹkpa nya ube otuguru ọ la ọmwẹnụ-ụtụrụ jahị daka ube otuguru ọ la odehe. Ị ya arụrụ nya igbiri ịbahị ba ịịkpango nyamwụ dagaga ju. Ang iya ata rịrị wule kuhye nyamwụ la ineku.

³⁵Ọlẹng ọwa kpam ka ọnang ọla ẹtẹẹ, ọ mọọ ori ọwa bala ịkịla la mememe.

³⁶Ẹpwụ nya ube nya angịị gbeji tu iịkpanggọ nya ube bala ọnẹẹkpa nyaa wuu la mememe, ịwondo juwa dagaga ju ọnang bala ọnẹẹkpa nyamwụ wuu, udiyo nyamwụ la apatẹ ohwineku kụrụ iwo da irwiye behya. Ẹpwụ ojuju nyamwụ la apatẹ ohwiye kụrụ ine.

³⁷Onẹẹkpa nyamwụ ji ahị da wẹ ẹpwụ nya ube otuguru ola ọdehe. Ị ya arụrụ nya ịgbịrị-ịbahị ba iịkpanggọ nya ube ọlẹpwụ wuu, ang ọ ya ata rịrị wule kuhye nyamwụ la ineku.

³⁸Ẹpwụ nya ube ọhẹ juwa ka ọnang nyamwụ jahị daka ọnẹẹkpa nya ọnang ọlẹpwụ. Ịga ọwa ri ẹga ọlẹ kị kaa hu iyo ịlẹ kịị nwụ nyọka ya kịliya.

³⁹I ya iteburu imiiye chụwa ụpa ọhẹ bala ụpa ọkịla nya ọnẹẹkpa nyamwụ ẹga kị kaa nwụ iyo ikiliya ọ juila bala iya nya ọhọbịrị bala iya oye egbeju nya ọngịnyị.

⁴⁰Iya iteburu ine chụwa odehe nya ube. Iyaa imimimii-ye chụwa ụpa ọhẹ bala ụpa ọkịla nya ọnẹẹkpa nya ọnang ọ la ẹtẹ.

⁴¹Iteburu ịlẹ kị ka nwụ iyo ikiliya wuu la ineku. Iteburu ine chụwa ẹpwụ ube, iteburu ine ịkịla chụwa u-ube olodehe.

⁴²Iteburu ine ịlẹ kịị kaa la ajwọ chụwa, ịlẹ kị kaa kpa ụka nya iya ọkịlaakịla ọ juila. Udiyo nyaa la apatẹ ịta, apwụ ojuju nyaa tị la apatẹ ịta ịnyịnyị, uhye ọlala nyaa ri apatẹ imiiye. Angị kiliya kaa ya ang-abwọ ịlẹ kị kaa kpa nwụ iyo ikiliya guru uhye nyaa.

⁴³I yịngịhyẹ wu uhye nya egwalọ kwa, ang ịịwa la udiyo lala insisi ịta. Ị ya iyo ikiliya wuu guru uuhye nya iteburu.

⁴⁴Ụ-ụwa odehe nya ẹpwụ ọlẹpwụ, ẹpwụ nya eba nya angịleje chụwa ẹpwụ ọhẹ juwa iga nya ọnang ọlẹtẹ, ọ jahị daka edii, ọkịla juwa iga nya ọnang ọla edii, ọ jahị daka ọnang ọlẹtẹ.

⁴⁵Ụka ọọwa lẹ ọlẹng ọwa a bim yẹkẹẹ, ube ọlẹ kọ jahị daka edii ri nya ọngọkiliya ọlẹ kọ kaa myị ẹrụ u-ube ịgọgọ.

⁴⁶Ẹpwụ nya ube ọlẹ kọ jahị daka ẹtẹ ri nya ọngọkiliya ọlẹ kọ kpẹhị rịrị iya ọkilaa kịla. Angịkiliya ri anyị ịtụma nya ịSadọkọ. Ịwa ubwaa a ri ala ọnẹgba nya angịkiliya ịlẹ kịị ju Ọngọlahị chwẹẹ nyọka kiliya họọ lẹ.

⁴⁷Ọlẹng ọwa me ori nya ube otuguru ọla ube ịgọgọ nya Ohe Oluhye, udiyo nyamwụ ri apatẹ ohwineku kụrụ iwo da iru, ẹpwụ ojuju nyamwụ ri apatẹ ohwineku kụrụ iwo da irụ inyịnyị, ogidi ọhẹ juwa ịlahị nya ube igọgọ nya Ohe Oluhye.

⁴⁸Ọ kpam ka ọnẹẹkpa nya ube ịgọgọ nya Ohe Oluhye, ọ me ịkpanggọ nya ugulọ nyaa ori, udiyo nyaa ila ụpa ọhẹ bala ụpa ọkịla la apatẹ ihikichu-ihikichu. Epwụ ojuju nya ọnang nyamwụ la apatẹ ohu kụrụ ine behya, ugulọ nya ịnang ụpa imimii-ye la apatẹ ịrụ-rụ.

⁴⁹Udiyo nya ọnẹẹkpa la apatẹ ohu kụrụ iwo kụrụ ịrụ ẹpwụ ojuju nyamwụ la apatẹ ohu kụrụ okpokpo. Ang ịyata rịrị wule kuhye nyamwụ la apatẹ iwo. Iya oweji wụụ ụwa ọkaa nya ugulọ ọhẹ ji ka ụpa nya ọnang ọhẹ bala ọnang ọkịla.