Read idege ISIKẸLỤ 41 Bible Online

ISIKẸLỤ 41 - idege bible

ISIKẸLỤ 41

¹Ọlẹng ọwa myịmyị kpam ka ẹpwụ nya ube ọlẹ kịị wụrụ ube ọlịgọgọ gu wuu, ọ me ịkpanggọ nyamwụ ori, ẹpwụ ojuju nyamwụ ụpa ọhẹ bala ụpa ọkịla la apatẹ iwo behya ụpa ịmimii-ye nyaa wuu.

²Ẹpwụ ojuju nya iga ọbwu kele la apatẹ iwo kụrụ irwiye bẹhya, ẹpwụ ojuju nya ugulọ ọlịga kị kaa bwu kele la apatẹ ihikichu ụpa ọnyọọnyị nyamwụ. Udiyo nya ube ọlịgọgọ gu wuu la apatẹ ohwita kụrụ iwo, ẹpwụ ojuju nyamwụ la apatẹ ohu kụrụ iwo da ịrụ.

³Ụka ọọwa lẹ, ọlẹng ọwa a jụka ẹpwụ nya ube ọlịgọgọ gu wuu lẹ ọ me ori nya ịkpango nyamwụ lẹlẹ. Ụpa ọhẹ bala ụpa ọkịla nyamwụ la apatẹ ịta ba ẹhya ẹpwụ ojuju. Epwụ ojuju nya ọnang la apatẹ iwo behya. Ugulọ ọ gu ọnang gu ju ẹpwụ gụ apatẹ iwo kụrụ imiiye.

⁴Ọ me ori nya ube ayịdang ọ la apatẹ ohu kụrụ iwo da irụ ụpa ọhẹ bala ụpa ịkịla nyamwụ wuu. Ọọwa lẹ, ọ bim yẹkẹẹ, ube ọlẹ a ri ube ọlịgọgọ gụ wuu lẹ.

⁵Ọọwa lẹ, ọ me ori nya ụka ọchịchị nya ugulọ nya ube ịgọgọ nya Ohe Oluhye lẹlẹ. Ọ la apatẹ iwo bẹhya, ebe ịlịkịka nya ube ịgọgọ nya Ohe Oluhye ju apwụ apatẹ irwiye. Ịnyịnyị ebe ị-la ịkịka nya ube ịgọgọ ala wuu dagaga ju lẹ.

⁶Ebe ịlịkịka nya ube ịgọgọ nya Ohe Oluhye ịịwa ri ube ịluhye ị-la apwụ ịta. Ube ọnyị myị ọnyị nyaa wuu la apwụ ohu kụrụ iwo ẹ-ẹpwụ nya ube Oluhye ọnyị myị ọnyị la pwuoo e-eji, apwụ ịluhye ịlẹ kịị me hụrụ ileji la hengbe chajị kịị ka jẹ-ẹ̀ hụrụ apwụ ileji nyaa pwọọ.

⁷Apwụ nya ebe ịịwa ju apwụ gụ ọwọwọọ-wa bwu ẹ-ẹpwụ oleji ka jụka ẹ-ẹpwụ ọla ube-oluhye. Ị dang ọlẹ kịị kaa wule bwu ẹ-ẹpwụ nya ube oleji ka ẹ-ẹpwụ nya ube-oluhye bwu ẹpwarịrị nya apwụ nya ebe iluhye iiwa kele ka uhye-ọgba.

⁸M yẹ ịnyịnyị nyori ị ju omwiji nya ube ịgọgọ nya Ohe Oluhye kutu-u dagaga ju wuu. Ori ọlẹ kịị me nya ụka ọchịchị nya ọmwiji nya apwụ nya ebe ịla ịkịka nya ube igọgọ la apatẹ iwo bẹhya.

⁹Ụka ọchịchị nya ugulọ ị lodehe nya ebe ịlịkịka nya ube ịgọgọ nya Ohe Oluhye la apatẹ ihikichu. Epwarịrị nya ebe ịlịkịka nya ube ịgọgọ nya Ohe Oluhye.

¹⁰Ebe ịkịla ịlẹ kị nwụ dagaga ju ugulọ nya ọdọda ọlẹpwụ ju ẹpwụ lala apatẹ iwo ịta kụrụ ịrụ. Ịịwẹ ị tị la dagaga ju Ube Ịgọgọ wuu le.

¹¹Ube nya angịkiliya dụwa luhwo-luhwo. Ẹpwụ ojuju nyaa la apatẹ ohu kụrụ iwo ịrụ. Ọ lịnyị dagaga ju ube ịgọgọ nya Ohe Oluhye wuu.

¹²Ube ọhẹ juwa oye nya ọmwẹnụ-obyi kọ ji ahị daka ube ọtuguru ọla ube ịgọgọ nya Ohe Oluhye. Ẹpwụ ojuju nya ube ọwa la apatẹ ohwịrwọnyẹ da imiiye bẹhya. Ụka ọchịchị nya uguglọ nyamwụ la apatẹ ihikichu. Udiyo ọlala nyamwụ la apatẹ ohwirwiye kụrụ irwiye behya.

¹³Ọlẹng ọwa me ori nya udiyo ọlala nya ube ịgọgọ nya Ohe Oluhye. Ọ la apatẹ ohwineku kụrụ iwo da irụ. Ube otuguru bala ube ọlamọlam tu ugulọ wuu la apatẹ ohwineku kụrụ iwo da ịrụ.

¹⁴Ẹpwụ ojuju nya ịlahị nya upa ọlọmwẹnụ-ụtụrụ bala ube otuguru ọlụwa la apatẹ ohwineku kụrụ iwo da ịrụ.

¹⁵Ọlẹng ọwa me ori nya udiyo nya ube ọlẹ kọ jahị daka ẹga otuguru ọlọmwẹnụ-ụtụrụ bala ịnyang ịlẹ kịị me kwọọ ịka imimiiye. Udiyo nyamwụ ri apatẹ ohwineku kụrụ iwo da ịrụ. Ẹga ọlẹ kị wụrụ ẹga ọlịgọgọ bala ẹga ọlịgọgọ gu wuu bala ọnẹẹkpa nya ịgọgọ,

¹⁶ị ya ekeji baa wuu pyẹpyẹ pye bwu ịpyị lalala kaa jụka iwondo nyaa, ịya ekeji ba ugulọ nya ube ịgọgọ nya Ohe Oluhye bala ọnang nyamwụ. Ị yang kụrụ iwondo nyaa.

¹⁷Ị gba arụrụ nyang ba ugụlọ nya ube ịgọgọ bwu eji kaa jụka uhye nya ọnang bala ube ọlẹpwụ bala odehe nyamwụ wuu.

¹⁸Arụrụ nyang ịlẹ kịị gba rinya igbiri bahị bala iCherubim, igbiri ibahi juwa ẹ-ẹpwarịrị nya Icharubim. ICherubim ọnyọọnyị ju epwahi imiiye.

¹⁹Ahị nyamwụ ịhyẹ ri nya angịnyị, ọ jahị ịịwa daka ịgbịrị-ịbahị ịla ụpa ọhẹ, ahị nyamwụ ịla ụpa ọkịla me ahị nya ụgba nya ugẹbẹ, ọ ji ahị ịịwa daka igbiri ịbahị ịla ụpa ọkịla.

²⁰I ya arụrụ nya iCherubim bala igbiri ịbahị ịịwa ba bwu oyeji kaa pwụ uhye-ọgba nya ọnang.

²¹Ụpa ọnyị myị ọnyị nya ọnang nya ube ịgọgọ ọlẹ kịị wuru, ẹga ọlịgọgọ la mememe wuu. Ụ-ụwa ịlahị nya ẹga ọlịgọgọ ịngịhyẹ juwa kọ mẹ.

²²Ogidi ọlẹ kịị kọ la okoji uhye ọlala nyamwụ gụ apatẹ ịrụ ẹpwụ ojuju nyamwụ lala apatẹ ịta. Ị kọọ ịchịchụọ bala ịkịka nyamwụ wuu la ekeji. Ọọwa lẹ, ọlẹng ọwa a bim yẹkẹẹ, iteburu ọlẹ iya da ịlahị nya Ọngọlahị lẹlẹ.

²³Ịga ọlịgọgọ bala ẹga ọlịgọgọ gụ wuu ọnyọọnyị nya la ekpileku ịwụrụ ka upa imimiiye.

²⁴I je kaa wụrụ ekpileku ịịwa ẹ-ẹpwarịrị daka ụpa ọhẹ bala ụpa ọkịla.

²⁵Ị gba arụrụ nya igbirị ịbahị bala iCherubim ba ekpileku nya ẹga ọlịgọgọ jaabwọ ọlẹ kịị họ uhye nya egwalọ. Ị nwụ ịngịhyẹ la ekeji rụwa ịlịlahị nya ọnẹẹkpa olodehe nya ube ịgọgọ.

²⁶I wondo juwa ọka ọhẹ bala ọka ọkịla nya ube ịlịkịka ọla ọnẹẹkpa. I gba arụrụ nya ịgbịrị-ịbahị baa wuu.