Read idege ISIKẸLỤ 42 Bible Online

ISIKẸLỤ 42 - idege bible

ISIKẸLỤ 42

¹Ọlẹng ọwa kpam ka ube ọtuguru ọla odehe ọlẹ kọ ji ka upa nya ẹtẹ, ọọwa lẹ, ọkpam ka ẹga nya ebe ịlẹ kịị juwa ịkịka nya ube ịgọgọ lẹlẹ. Ịkịka nya ube ịwa jika ọye nya ẹtẹ.

²Udiyo nya ube ọwa la apatẹ ohwineku kụrụ iwoda ịrụ, ẹpwụ ojuju nyamwụ la apatẹ ohwine kụrụ irwiye bẹhya.

³Ịga ọhe dụwa pwọọ ẹ-ẹpwarịrị nya ube ọwa bala ube ịgọgọ. Udiyo nya ẹga ọọwa la apatẹ ohukụrụ iwo da ịrụ, ọ jahị daka ube otuguru ọ la odehe ọlẹ kịị yang ba ugulọ nyamwụ wuu. I mọọ kuru kuhye, ọ luhye gụ awụlẹ kpiri kpiri apwụ ịta kuhye.

⁴Ẹgẹhẹ juwa kị ka bwu ụwa ịlahị nya ube ọwa bwu ụpa nya ẹtẹ ẹpwụ ojuju nya ụwa la apatẹ iwo kụrụ irwiye ba ẹhya udiyo nyamwụ la apatẹ ohu ineku kụrụ iwo da ịrụ. Ụ-ụwa ụgbẹyị ọ bwu ka ube ọwa a ji lẹ.

⁵Apwụ nya ebe ị luhye-ọgba tụpịrị gụ apwụ ileji chajị angịịlẹ kịị me kwaa ye ẹga ịlẹ kị ka me apwụ iluhye rịrị. Apwụ nya ebe ịla ube oleji bala ube ọ ba oleji ba jẹpwụ gụ ẹpwụ nya ube-oluhye ọgba.

⁶Ebe ịịwa la apwụ ịta kụ awụlẹ kuhye-ọgba, ịịla ọ weji jaabwọ ka ebe ịtuguru ịịlodehe la ka. Chajị nya ọọwa a du ka ẹpwụ nya ube-oluhye ọgba tụpịrị gụ apwụ ileji chajị kọ ka jẹ-ẹ̀ hụrụ uhye nya ẹpwụ iileji lẹ.

⁷Ugulọ ọhẹ juwa kịị me kpụrụrụrụ, ụwa ịkịka nya ebe ịịwa. Udiyo nyamwụ la apatẹ ohwine kụrụ irwiye bẹhya.

⁸Udiyo nya ebe ịlịga nya ube otuguru ọlodehe la apatẹ ohwine kụrụ irwiye bẹhya. Ebe ịlẹ kịị juwa ịkịka nya ube ịgọgọ la apatẹ ohwineku kụrụ iwo da irụ.

⁹Ụgbẹyị ọhẹ da bwu ọmwẹnụ-ụtụrụ chajị ka angịnyị ka bwu ụwa ka ube otuguru olodehe.

¹⁰Ẹpwụ ojuju nya ẹga ochipwụrụ bwu ka gụ ụgulọ nya ẹga otuguru. Ebe ịhyẹ juwa ịkịka oye nya edii nya ube ịgọgọ.

¹¹Iga ọchịpwụrụ bwu chụwa ịịlahị nyaa, ebe iiwa bala ebe ịla oye nya ẹtẹ, maulẹ. Udiyo bala ẹpwụ ojuju nyaa tụ ọnang bala ekpileku nyaa wuu la mememe.

¹²Ugbeyi ọlẹ kị kaa bwu ka ebe ịla oye nya edii iwẹ da kpwọkụwa kpụrụrụ dịre ugulọ ibwu ụpa nya ọmwẹnụ-ụtụrụ.

¹³Ụka ọọwa lẹ, ọlẹng ọwẹ a bim yẹkẹẹ, ebe ịla ẹtẹ bala ịla edii ịlẹ kịị wẹ ụpa ọkịla nya iga ọlẹ kọ dụwẹ hwọọ we la ịgọgọ ụ-ụwa ọngọkiliya ọlẹ kọ kaa kịlahị nya Ohe Oluhye a ka ri ia ọkịla kịla ọlịgọgọ lẹ. Ụ-ụwa ịka kpa iya ịkịla kịla nya egbe nyang bala inya ohu ọhọbịrị kparụ bala iya ọye egbeju nya ọngịnyị gụru lẹ.

¹⁴Ụka ká ọngọ kịla iya a jụka ẹpwụ nya ube ọlịgọgọ, ọ ka pwọ ịwụrụ ịlẹ kọ kụrụ ụwa cheji ine kọ ka kpehe wẹpwụ nya ube otuguru ọlẹ ka angịnyị ji. Chajị ịwụrụ ịlẹ kọ kụrụ kpa kịliya la ịgọgọ. Ọ ka kụrwaa kpa ka ẹga nya angịnyị ododu ka.

¹⁵Ụka ká ọlẹng ọwẹ me ori nya ẹpwụ nya ube ịgọgọ nya Ohe Oluhye kpalẹ, ọ kpam kpehe bwu ọnang ọla ọmwẹnụ-ụtụrụ lẹ ọ me ori nya ụmẹ ọlala nya ube ịgọgọ wuu dagaga ju lẹlẹ.

¹⁶Ọ me ori nya ụpa nya ọmwẹnụ-ụtụrụ la okoji ọ kpa mori, ọ la apatẹ ụnọ imiiye da ohwita kụrụ iwo da ịrụ.

¹⁷Ọ me ori nya ụpa nya ẹtẹ, ọ la apatẹ ụnọ imiiye da ọhwita kụrụ iwo da ịrụ.

¹⁸Ọ ji kpata kaa me ori nya ụpa ọla edii ọ la apatẹ ụnọ imiiye da ohwita kụrụ iwo da ịrụ.

¹⁹Ọ myịmyị rụ ka ụpa ọka ọmwẹnụ-obyi, ọ me ori nyamwụ, ọ la apatẹ ụnọ imiiye da ohwita kụrụ iwo da ịrụ ịnyịnyị.

²⁰Ọọwa lẹ, ọ me ori nya ugulọ ọlẹ kịị me dagaga ju ube ịgọgọ lẹlẹ, ẹpwụ ojuju bala udiyo nyamwụ nyamwụ mememe. Ịla apatẹ ụnọ imiiye da ohwita kụrụ iwo da ịrụ. Ụgụlọ ọwa a chị iga ọlịgọgọ ebwo hi iga ọlịgọgọ ka lẹ.