Read idege ISIKẸLỤ 43 Bible Online

ISIKẸLỤ 43 - idege bible

ISIKẸLỤ 43

¹Ụka ọọwa lẹ, ọlẹng ọwa a kpam ka ọnang ọlẹ kọ jahị daka ọmwẹnụ-ụtụrụ lẹlẹ.

²Ọọwa lẹ, m yẹ ụmụmẹ nya ijata ojiji nya Ohe Oluhye kọ juwa warị bwu ọmwẹnụ-ụtụrụ lẹlẹ. Omyi nyamwụ tụ ịru lala enyi ọmwụmwụ. Ẹga ọọwa wuu hụ kpangkpang chajị nya ahịgboo nyamwụ.

³Ọyị ọlẹ kam yẹ lụka ọlẹ me ọyị ọlẹ kam yẹ ụka ọlẹ ka Ohe Oluhye warị kaa biri ube ịgọgọ nyamwụ bala ọyị ọlẹ kam yẹ ụka ọlẹ kam juwa ọọnụ nya Ihu nya Ikeba. Ụka ọọwa lẹ, m hi daka eji lẹ, m yahị kụrụ eji lẹlẹ.

⁴Ụmụmẹ nya Amkpaa-à hu u-ube ịgọgọ bwu ọnang ọlọmwẹnụ-ụtụrụ lẹlẹ.

⁵Ụka ọọwa lẹ, ọlegu nya Ohe Oluhye a hum kpa ka ube ọlẹpwụ lẹ, ogbo nya ijata ojiji nya Ohe Oluhye a myị ube ịgọgọ nya Ohe Oluhye lẹlẹ.

⁶Ụka ká ọlẹng ọọwa godayị ụwa ịkịka nyam, m wo ka ọngọhẹ juwa yẹla taam bwu ube ịgọgọ nya Ohe Oluhye.

⁷Ọọwa ọ ya ẹla tam yẹkẹẹ, ọngịnyị ehe, ịpyị adịrahụ nyam bala ẹga oya atta rịrị nyam a lẹlẹ lẹ, m ka kwaam ẹpwarịrị nya ala Isirẹlụ gbe oyi myị oyi. Ala Isirẹlụ a ka myịmyị-ị̀ị chị enyị ịgọgọ nyam ịrị kaka. Lee ịwa bala ịdịrịhụ nyaa ọ chị ẹnyị nyam ịrị ọnang nyaa kaka.

⁸Ị chị ọnang ọ-ya ata rịrị kị ka ka ube nyaa da ba ịnyam ba bala ọ chị ọnang nyaa gu ịnyam gu. Ugulọ kẹnẹ-kẹnẹ a chịhị ebwo hi awụlẹ lẹlẹ. Ụka ọlẹ kịị juwa hang ịlẹ kịkaa wumẹjẹ wẹẹ ọ ri ọchị ẹnyị nyam ịrị. Ụka ọọwa lẹ, m ju agbama taa lẹ, m taa ayịreji lẹlẹ.

⁹Chajị nya ọọwa lẹ, a byaa kịị hịnyọ la ijaga ịkpụkpụ kii go egu nya ịdịrịhụ nyaa kparụ hwee him mẹ aalẹ, m ka ku taa gbo moyi lẹ.

¹⁰Ọngịnyị ehe ee, chabwọ nya ube ịgọgọ je ala Isirẹlụ, chajị kị me ori nyamwụ. Ọhọbịrị ịhọhọ nyaa a laa oyoyi mẹ.

¹¹Ori ka ihibiri ịhọhọ nyaa a laa oyoyi lẹ, aa wụlẹ jiaa chajị nya irya omeme nya ube ịgọgọ bala abwụma ọlẹ kọ ka la bala ẹga obwu kụwa tu ịgele kị ka bwu kpehe bala jaabwọ kịka nwọọ bala ang myị ang ịlẹ kị nwụlanọ nyọ ka họhọ ụwa bala ehile ịlẹ kịị ka kpa. A daang ịlẹ wuu haa chajị kị ka je jaabwọ kaang myị ang ịlẹ wuu la bala ọ ka kpa ehile ịlụwa wuu kpẹkpẹẹ.

¹²Ehile nya ube ịgọgọ ri-yẹkẹẹ, imwawụ ọluhye nya ọgbọdọ ọlẹ kọ juwa dagaga ju ube ịgọgọ nya Ohe Oluhye wuu ka la ịgọgọ pii lẹ.

¹³Ị kpa okoji ọlẹ kị kpa mang ori bwu ọmwọmwụ me ogidi ori, lẹ ịịlẹ ori ọmeme nyamwụ a lalẹ. Mwu nya Ogidi dagaga ju wuu kịlọlọ la insis ohu kụrụ okpokpo, epwụ ojuju nyamwụ la insis ohu kụrụ okpokpo ịnyịnyị. Ugboonu omwurumwuru nyamwụ lahyẹ insis ihikichu.

¹⁴Ọ bwu eji kaa pwụ obaba nyamwụ ọlẹ kọ la bẹdẹ gu wuu la apatẹ ịta bẹhya, ẹpwụ ojuju nyamwụ la insis ohu kụrụ okpokpo. Ọ bwu ọbaba oleji kaa pwụ obaba nyamụ ọlẹ kọ luhye gu wuu la patẹ irwiye. epwụ ojuju nyamwụ la insis ohu kụrụ okpokpo.

¹⁵Epwarịrị nya uhye-ọgba nya ogidi ẹga kii kaa kịlịya luhye apatẹ irwiye. Ị me ịkịka nyamwụ ine kuhye lala achụ nya iyo.

¹⁶Epwarịrị nya uhye-ọgba nya ogidi la ịkịka ine ịkịka ịịwa wuu mememe. Udiyo nyaa la apatẹ ohu kụrụ ọkpokpo ẹpwụ ojuju nyamwụ la apatẹ ohu kụrụ okpokpo epwụ ojuju nyamwụ la apatẹ ohu kụrụ okpokpo ịnyịnyị.

¹⁷Epwarịrị nya uhye-ọgba bala eji nyamwụ la ịkịka ine ịkịka iiwa wuu la mememe ịnyịnyị. Ọ la apatẹ ohu kụrụ ine ịkịka ọnyọnyọọnyị, epwụ ojuju nya ụgbọọnụ nya ụwa la apatẹ iwo bẹhya. Eji nya ụwa la insis ohu kụrụ okpokpo dagaga ju. Ịga kịkaa bwu kpụ uhye nyamwụ ji koye nya ọmwẹnụ-ụtụrụ.

¹⁸Ụka ọọwa lẹ, ọ bẹkọ wụrụm ya yẹkẹẹ, ehile ịlẹ kam da chajị nya ogidi a lẹẹlẹ, ụka ọlẹ kii me ogidi kpa kii ka kiliya o-ju ila uhye nyamwụ bala ọ ka nyi iwo hwọọ.

¹⁹Anyị nya ịSadọkọ ịlẹ kii bwu imwawụ nya angịkiliya ụbwọọmwụ a kawẹ ịlahị nyam kaa kiliya ham lẹ, ịnyị Ọngọlahị Ohe Oluhye a ya lẹ. Anụ ka ya ẹna ọlẹng haa chajị kị ka ya kịla iya ọ hụ ọhọbịrị.

²⁰Anụ ka ya iwo nyamwụ yẹju ẹ-ẹpwụ nya ang ọlẹ kọ me achụ nya iyo ine ịịlẹ kii me kụ ogidi bala aang ọla epwarịrị nya uhye-ọgba bala eji nyamwụ tụ ụgbọọnụ nyamwụ wuu. Ọgụ ọwẹ anụ ka họ ogidi a ka la cheri-cheri ọwa anụ ka chị ịgọgọ jwoo lẹ.

²¹Ị ka hu ẹna ọlẹ kị ya kiliya ọ hu ọhọbịrị kpa kaa chịla ẹ-ẹgẹhẹ ọlẹ kanụ ka chụ ụwa odehe nya ịgọgọ.

²²Ahị ọpyẹpyẹ ọkịla ị kpa ẹmwụ ọlẹ ọlẹ ka ịngịngịhyẹ a họ ka kaa kiliya ọ hu ọhọbịrị, ị ka hụ ogidi cheri-cheri lịwọ nyamwụ jaabwọ kị kpa iwo nya ẹna ka ogidi la cheri-cheri.

²³Ụka ọlẹ kii họọ ịnyị kpa wuu lẹ, ị ka hu ẹna bala ugba nya ọmilodo ịlẹ ka ịngịngịhyẹ a họ ka

²⁴kpa wam Ohe Oluhye lẹlẹ. Ọọwa lẹ, Ọngọkịliya a ka ya ịma kụrwaa uuhye wuu lẹ, ọ ka yaa kiliya ham lẹlẹ.

²⁵Ẹnụ myị ẹnụ gbee jịra ẹnụtụrụ irwiye, ị ka ya ẹmwụ bala ẹna bala omilodo kiliya ọ hu ọhọbịrị. Ịngịngịhyẹ a ka họ ọhẹ-lọhẹ nya iyo iiwa ka.

²⁶Gbee jịra ẹnụtụrụ irwiye angịkiliya ị ka họ ogidi ka la cheri-cheri ọlẹ kị ka nwụlọọ nọ gbe iya ọkịla kịla ọ lụka ọkịla.

²⁷Ụka ká ẹnụtụrụ iiwa a chịpwụrụ wuu lẹ, ọngọkiliya a ka kpa iya okịla kịla ọ juila bala inya oholaulẹ nyanụ wẹ uhye nya ogidi lẹ, m ka yẹnụ lẹlẹ. Ịnyị Ọngọlahị Ohe Oluhye a yalẹ.