Read idege ISIKẸLỤ 44 Bible Online

ISIKẸLỤ 44 - idege bible

ISIKẸLỤ 44

¹Ụka ọọwa lẹ, ọlẹng ọwa a kpam ka ọnang ọ lodehe nya ube ịgọgọ ọlẹ kọ jahị daka ọmwẹnụ-ụtụrụ lẹlẹ. Ọnang ọwa tuku.

²Ọọwa lẹ, ọngọlahị a bim yẹkẹẹ, ị ka tu ọnang ọlẹ ku piyọọ, ọngọhẹ a ka wụrwọọ ka. Ọngọngọhẹ a bwuwa ka ube ịgọgọ ka chajị Ọngọlahị Ohe Oluhye nya ala Isirẹlụ bwuwa lẹ. Chajị nya ọọwa a du kị ka tọọ ku lẹ.

³Adịrahụ ụbwọọmwụ a ka hụhụ ọnang ụ-ụwa nyọka riang ịlahị nya Ọngọlahị lẹlẹ. Adịrahụ ka bwu ọnẹẹkpa nya ọnang ọwa, ụwụwa ọ tị ka bwu kpehe ịnyịnyị lẹ.

⁴Ụka ọọwa lẹ, ọlẹng ọwa a kpam bwu ọnang ọlẹtẹ kịlahị nya ube ịgọgọ lẹlẹ. Ụka ọlẹ kam chehị kele, ogbo nya ijata ojiji nya Ọngọlahị myi ube ịgọgọ pwẹpwẹ, lẹ m ya ahị kurweji lẹlẹ.

⁵Ọngọlahị byim yẹkẹẹ, ọnyị nya ọngịnyị ẹla myẹla ịlẹ kam ka ya jeng chajị nya ehile ọkpakpa nya ube ịgọgọ nya Ohe Oluhye aa ju alịwa ẹjẹẹ ka kwẹhị yaa kpori-kpori katị ya ụrụ ba ẹla ịịwa. Aajẹ angịlẹ kii chịla nyọka ka ube ịgọgọ bala angịlẹ kị ka kụwa ka.

⁶A yẹla ta ala Isirẹlụ ii legbeju ịngịrị ịwẹ ya, Ọngọlahị Ohe Oluhye yẹkẹẹ, anụ ala Isirẹlụ ee, anụ kpụba la egbeju-ọngịrị ọlala nyanụ mẹ.

⁷Anụ kaa kpa angga angịlẹ kịị dụwụwụ ka warị wẹ ube ịgọgọ nyam, anụ kaa chị ube ịgọgọ nyam ịrị la ang oriri ịlẹ kanụ kaa kpa waam bala iya ọkịlaakịla nyanụ. Anụ bịrị iro nyam ọlẹ kam nwa tanụ bwula ang inyibyi nyanụ.

⁸Anụ a myị kpẹhị rịrị ọhaha ịgọgọ ọlẹ kii ka kpa wam ka ma, anụ chụ anga nyọka ku ọmwakpa nyanụ.

⁹Ọngọlahị Ohe Oluhye yẹkẹẹ, anga ịlẹ kii dụwụwụ ka kịtị juwa ẹpwarịrị nya angịnyị nyam ala Isirẹlụ a ka ju ka ube ịgọgọ nyam ka.

¹⁰Ma ala iLivayị ịlẹ kii rụ him juwa kpụ ijiga ụka ọlẹ ka ala Isirẹlụ hwahị him, m ka yaa akama.

¹¹Ịwa a ri angịmyẹrụ ham ụwa ẹga ịgọgọ bala ọ kpẹhị rịrị ọnang nya ube ịgọgọ bala ọ myị ẹrụ ham ụwa bala ọ nwụ iyo ikiliya bala ọ kiliya ha angịnyị bala ọ ka godayị nyọka myerụ haa lẹ.

¹²Ma chajị nyọlẹ kii gbịgba ha ijiga nyaa kii kpa ala Isirẹlụ chụchuu jụka ọhọbịrị ọhọhọ lẹ, am Ohe Oluhye cheje nyori ị ka yẹ akama lẹ.

¹³Ị ka myị ẹrụ ham nya angịkiliya lee ọ tu gu ịngịngịhyẹ nyam ịlẹ kii la ịgọgọ lee ọ ju ka ikwee ọlịgọgọ gụ wuu kaka. Ọwẹ a ri akama ọlẹ kam yaa chajị nya ang-ibyi ịlẹ kii họ lẹlẹ.

¹⁴Ma m hwaa nyọka kpẹhị rịrị ube ịgọgọ nyam. Ị ka kpẹhị rịrị angịịlẹ wuu kị ka họ ụwa.

¹⁵Angikiliya ịlẹ kii bwu ugbiyegu nya ịSadọkọ ịlẹ kii kpahị ju ẹpwụ nya ube ọgbịgba ham ụka ọlẹ ka ala Isirẹlụ hwahị him. Ị kaa jum chwẹẹ chajị kị ka myị ẹrụ bala okiliya ham. Ịnyị Ohe Oluhye a ya lẹ.

¹⁶Iwa a ka jụka ẹga ọgbịgba ham bala ọ jụm chụee ị-iteburu nyam chajị kii ka myị ẹrụ ham lẹ. Ịwaà tị́ ka kpẹhị rịrị ube ịgọgọ nyam lẹ.

¹⁷Ụka ọlẹ kii jụka ọnang nya ube otuguru ọlẹpwụ ị ka kụrụ ịwụrụ icheji cheji nya ịpwụ iwulewule. Ọngengehe nyaa a ka kụrụ ịwụrụ nya igodogodo ụka ọlẹ kịị juwa gbịgba ham ụ-ụwa ọnang nya ube ọtuguru ọlẹpwụ lee ẹpwụ nyụwa ka.

¹⁸Ị ka ya ịpwụ iwulewule daba rị egbeju bala ekpeleji nya angịlẹ kii kụrụ chajị kị ka bwinwu ka.

¹⁹Ụka ọlẹ kii kpehe ka ube otuguru ọla odehe iga ka angịnyị ji, ị ka pwọ ịwụrụ icheji cheji nyaa ịlẹ kii kụrụ kpa gbịgba haam guru ẹ-ẹpwụ nya ube ọlịgọgọ gu wuu. Ị ka go iwurụ ịkịla kụrụ chajị ka iwuru ịlịgọgọ nyaa a ka họ angịnyị ịngịngịhyẹ ka.

²⁰Ị ka pwọ inyi nyaa ka, ị tị ka kpa inyi nyaa ị lụmẹ ka. Ị ka chị inyi nyaa eku.

²¹Ọngọ kiliya ọhẹ-lọhẹ a ka nwa ere ụka ọlẹ kii jụka ube otuguru ọ lẹpwụ ka.

²²Ị ka ye ahwogu lee ọngịnyị ọlẹ kii rwọru ẹnẹhẹ lẹ ka angịlẹ kii ri ịyẹẹnọ lee ahwogu nya angịkiliya keem ị ka ye lẹ.

²³Angị kiliya ka me ọdatị nyang ọlịgọgọ bala angịlẹ kii la ịgọgọ ka tụ angịịlẹ kii la cheri-cheri bala angịlẹ kii chị ịgọgọ jụka jẹ angịnyị nyam.

²⁴Ụka ká angịnyị a yẹla ju awụlẹ, ị ka leje ha angiiwa. I ka cheje dịrẹ ọgụ nya ehile nyam. I ka kpa ehile bala angii mẹjẹ nyam wuu ụke nya oyaya ọnyị myị ọnyị. Ị tị ka chị ịgọgọ ju Ẹnụtụrụ Ọhịnyọ Lụkụrwọ nyam

²⁵Angị kiliya a ka tụ ju egu chwẹẹ ịka chịlaa iri ka. Kẹnẹkẹnẹ ori ka egu ịịwa ari nya angịị maama lee ịnya ọnyị nyaa lee ịnya ọnyịnaa ọlẹng bala anyang ịrwọrụ lẹka mẹẹnyị.

²⁶Ụka ọlẹ kii họ kịla cheri-cheri kpa, ị ka godayị ẹnụtụrụ irwiye

²⁷ẹnẹlẹ kị ka ẹpwụ nya be ọlịgọgọ ụwa ube otuguru ọlẹpwụ, nyọka gbịgba ham ị ka kịliya chajị nya ọhọbịrị nyịlaa. Ịnyị Ọngọlahị Ohe Oluhye a ya lẹ.

²⁸Aang ugu ọlẹ kori ịnya angị kiliya ri am Ohe Oluhye lịmọm. Ị ka ya ịngịngịhyẹ jwaa ụụbwọ ọ-ọpyị nya ala Isirẹlụ ka chajị am Ohe Oluhye a ri ang ọlẹ kịị la lẹ.

²⁹Ị ka ya ọhaha nya ugbe ịlẹ kii kpa kaa-ha bala iya olila kila chajị nya ọhọbịrị bala iya ọkịla kila ọye egbeju nya angịnyị bala ihaha ịlẹ kịị chị-ịgọgọ ju wuu ri.

³⁰Egbe ịlẹ ịi hagụ wuu ẹpẹpwụ nye egbe nya ọgbanyẹ nyanụ lee ịnyang myị ang ịlẹ kanụ ya ha ọhaha ham wuu ri nya angịkiliya. Ụka myụka kanụ họ ikaa, anụ ka ya ebe nya ikaa nya ọgbanyẹ-ọgbanyẹ ha Ọngọkiliya chajị ka ahị ọwawa ka juwa ẹ-ẹpwa nyanụ pyịyọọ.

³¹Angịkiliya a ka ri iyo nya ịngịngịhyẹ ọlẹ kọ gbugbu lịlọmwụ lee iyo ọnwọọnwụ ka.