Read idege ISIKẸLỤ 45 Bible Online

ISIKẸLỤ 45 - idege bible

ISIKẸLỤ 45

¹Ụka ọlẹ kii ga ọpyị nya ala Isirẹlụ ha imwawụ nyaa wuu, Ị ka ya ụpa nya ọpyị ọhẹ dụwa ha Ọngọlahị. Udiyo nya ọpyị ọwa ka la ịmalị iwo ẹpwụ ojuju nyamwụ ka ri ịmalị ineku ọpyị ọwa wuu ka la ịgọgọ.

²Ẹ-ẹpwụ nya ọpyị ọwa, ị ka chigehe da kị ka ma ube ịgọgọ ụ-ụwa, ẹpwụ ojuju bala udiyo nyụwa ka la mememe. Ị ka la apatẹ ohu ihikichu da ohwiye ụwa ụpa ọnyị myị ọnyị nyamwụ epwụ ojuju nya ọpyị ọlẹ kọ ka hi dagaga ju ube ịgọgọ ka la apatẹ ohwine da ine.

³Ị ka mori ịmalị iwo luduyo bala ịmalị ine ẹ-ẹpwụ ojuju bwu opyị oligọgọ ọwa chajị kị ka nwụ ube ịgọgọ nya Ohe Oluhye ọlẹ kọ la ịgọgọ gụ wuu ụwa.

⁴Ụpa nya ọpyị ọlịgọgọ ọwẹ ka rinya angịkiliya ịlẹ kii kaa myị ẹrụ ha Ohe Oluhye ụwa u-ube ịgọgọ nyamwụ, ịgọọwa ịka nwụ ẹpwa nyaa bala ọ nwụ ube ịgọgọ nya Ohe Oluhye lẹ.

⁵Ị ka ya une ohihi ọkịla nya ọpyị ọlịgọgọ ọlẹ kọ la imalị iwo uuduyo bala imalị ine ẹ-ẹpwụ ojuju dụwa ha ala ugbiyegu nyangị kiliya ịlẹ kị kaa họ ukụrwọ u-ube ịgọgọ nya Ohe Oluhye chajị kị ka nwụ ẹpwa ịlẹ kị ka kụ ụ-ụwa.

⁶Une nya ọpyị ọlẹ kọ ka ba ọpyị ọlịgọgọ ba ka ri ọpyị ọlẹ ka ọng myị ọng ọlẹ kọọ họọ ụwa ọpyị nya ala Isirẹlụ ka kwẹpwa. Udiyo nya ọpyị ọwa ka la ịmalị iwo, ẹpwụ ojuju nyamwụ ka la imalị imiiye.

⁷Ọngọ gbeji ka la ọpyị ụpa imimiiye, upwa ọhẹ ka jika oye nya ọpyị ọlịgọgọ, ụpa ọkịla ka jika ọpyị ịlẹ kii ga ha angịnyị kii kwẹẹpwa. Udiyo ọlala nya ọpyị ọwa ka emwọnọbi ka pwụ ihu ọ-lẹgbẹgbụ. Udiyo ọlala nyamwụ ọla ọmwẹnụ-ụtụrụ ka ụpa nya ọpyị ọlịgọgọ ka la udiyo kaa pwụ iga ka oyii nyọpyị nya ala Isirẹlụ ba.

⁸Ọpyị ọwa a ka ri ọpyị ọlẹ kị ka ga ha ịdịrịhụ igbeji Isirẹlụ chajị kị ka tụ angịnyị pyịpyị nyọka niaa ọpyị kaka lẹlẹ. Ị ka tụụbwọ hi ịpyị nyaa haa chajị ka imwawụ ọnyị myị ọnyị ka lịnyaa.

⁹Ọngọlahị Ohe Oluhye yẹkẹẹ: anụ ịdịrịhụ igbeji ịla Isirẹlụ ee, ọhọbịrị ịhọhọ nyanụ nwa lẹ, anụ kpụba lọ họ angịnyị agbụrụ bala ọ taa pyịpyị mẹ. Anụ họ angịlẹ kii la kpakpa bala ọla kpẹkpẹẹ mẹ, anụ hịnyọ lọ ku angịnyị nyam rụ hi ọpyị nyaa mẹ. Ịnyị Ọngọlahị Ohe Oluhye a yalẹ.

¹⁰Anụ ka kpa ang ọkpa mang ẹpwụ ịlẹ kịla kpẹẹkpẹẹ.

¹¹Ẹpha ọlẹ kịkaa kpa mang ọlọrụ ẹpwụ bala Ibath ọlẹ kịkaa kpa mang ọlẹnyị lenyi ẹpwụ ka la mememe. iBati okpokpo ka ri ẹhya iwo nya ihoma. Ẹpha okpokpo ka ri ẹhya iwo nya ihoma ịnyịnyị. Ihoma a ri ang amang ẹpwụ ọlẹ ka angịnyị wuu ka myị ju lẹ.

¹²Ịgẹrahs ohu chiriri ka ri Ichẹkeli okpokpo. Ichẹkeli ohwita ka ri ịmịna okpokpo.

¹³Ọhaha ọlẹ kanụ ka hụha ka lịlẹ: ẹ-ẹpwụ nya ihoma nya iwiti ọnyị myị ọnyị anụ ka hu ehya oharwọnyẹ nya ẹpha họ haha. Ẹ-ẹpwụ nya ihoma nya ibalị ọnyị myị ọnyị anụ ka hu ehya oharwọnyẹ nya ẹpwa họhaha ịnyịnyị.

¹⁴Jaabwọ kanụ ka họhaha nya ida ri: ẹ-ẹpwụ nya ịịkọ ọnyị myị ọnyị anụ ka ya ẹhya ọharwọnyẹ nya iBati họ haha (ịịko bala ihoma mememe, iBati iwo cheriri a juwa ẹ-ẹpwụ nya ịịkọ okpokpo lẹ).

¹⁵Ẹ-ẹpwụ nya ogu nya ịkpịlọ ohwiwo ịlẹ kị juwa kpari ụwa edamẹ ọ-ọpyị nya ala Isirẹlụ. Ị ka ya ọkpịlọ okpokpo ha bwepwụ nyaa. Ọwẹ a ri ọhaha ọkịliya nya egbe nyang bala iya ojwila bala iya ọkịla kịla nyọ họlaulẹ chajị nyọka hu ihibiri nya ala Isirẹlụ lẹ. Ịnyị Ọngọlahị Ohe Oluhye a ya lẹ.

¹⁶Angịlẹ kịị ri ala Isirẹlụ wuu ka họ haha ọlẹ ha Adịrahụ nya ala Isirẹlụ.

¹⁷Adịrahụ nya ala Isirẹlụ a ka kpa iyo okiliya ojwila bala iya ọkịlaakịla nya ere wọnụ nya ẹpwụma nya ala Isirẹlụ wuu ju ụka nya ụya ọyaya nya ọya onyewe bala ụtụrụ omwịnyọ bala ụya ọyaya ịkịla ịlẹ kị kaa họ ọ-ọpyị nya ala Isirẹlụ lẹ. Ọwa-à ka kpang ịlẹ kị ka ya kiliya ọ hu ọhọbịrị bala ịnya egbe nyang bala iya ọkịla kịla ojwila bala ịnyọ họlaulẹ chajị nyọka hụ ọhọbịrị nya ala Isirẹlụ lẹ.

¹⁸Ọngọlahị Ohe Oluhye yẹkẹẹ: ẹnụtụrụ ọhọhẹ nya ọya ọhọhẹ anụ ka ya ẹna ọlẹng ọlẹ ka ịngịngịhyẹ a họọka kịlịya chajị nya ube ịgọgọ ọ ka la cheri-cheri.

¹⁹Ọngọkịliya ka kpa iwo nya iya ọkịlaakịla nyọka hu ọhọbịrị ọlẹ kaa chị ọnang nya ube ịgọgọ bala ịchwichwọ ine nya ogidi bala ị weji nya ọnẹẹkpa nya ube otuguru ọlẹpwụ.

²⁰Ẹnụtụrụ ọharwiye nya ọya, a ka ma ịwọ ọ chang ọwẹ họ chajị nya angịlẹ kị hịbịrị lọjẹjẹ ka lee ọ gwoja gwo họ ang onyobyi ka. Ụka kịị họ ịnyị lẹ, ube ịgọgọ nya Ohe Oluhye a ka la cheri-cheri lẹlẹ.

²¹Anụ ka họ ụya ọyaya nyọngọriri ọchịpwụrụ ẹnụtụrụ iwo kụrụ ine nya ọya ọhọhẹ. Ọng myọng wuu ka ri ịkaa ojumwu ka ẹpwụ nya ẹnụtụrụ rwiye.

²²Ẹnụtụrụ ọwa adịrahụ ka kpa ụgba nya ẹna chajị kọ ka ya kiliya ohu ọhọbịrị wọnụ nyilọmwụ bala ala Isirẹlụ ju.

²³Ẹ-ẹpwụ nya ẹnụ myị ẹnụ jịra ẹnụtụrụ irwiye ịwẹ, ọ ka kpa agba nya ẹna irwiye bala ịmilodo irwiye ịlẹ ka ịngịngịhyẹ a haa ka kaa kiliya ọ juila ha Ohe Oluhye. Ọ ka kpa ẹmwụ ọlẹng ka kiliya ọ hu ihibiri ẹnụ myị ẹnụ jịra ẹ-ẹpwụ nya ẹnụtụrụ irwiye ịịwa ịnyịnyị.

²⁴Ụka nya iya ọkịlaakịla nya egbe nyang, ọ ka ya ẹpha okpokpo ọkpokpo ba ẹna bala omilodo ịlẹ kọ ka ya kiliya. Ọ ka ya ihiin nya ida ba epha ọnyọ myị ọnyị.

²⁵Ẹka nya Ọhụhụ nya Adáa ọlẹ kọ dọmwụ ẹnụtụrụ wo kụrụ irụ nya ọya ọharwiye. Ẹ-ẹpwụ nya ẹnụtụrụ irwiye ịịwa wuu adịrahụ ka yang ọịnyịnyị ha nyọka ya kiliya ọhu ọhọbịrị bala iya ojwila bala iya nya egbe nyang bala ida.