Read idege ISIKẸLỤ 46 Bible Online

ISIKẸLỤ 46 - idege bible

ISIKẸLỤ 46

¹Ọngọlahị Ohe Oluhye yẹkẹẹ, ị ka tụ ọnang ọ la ọmwẹnụ-ụtụrụ ọlẹ kịkaa bwu ka ube otuguru ọlẹpwụ ku ẹ-ẹpwụ nya ẹnụtụrụ ịrwọnyẹ ịlẹ kị kaa họ ụkụrwọ. Ma ị ka wụrwọọ Ẹnụtụrụ Ọhịnyọ Lụkụrwọ bala ụka nya ụya ọyaya nya ọya onyewe.

²Adịrahụ ka jụka ube ịgọgọ bwu ọnẹẹkpa nya ọnang kaa godayị ịịga nya ọweji nya ọnang. Ọngọkịliya ka kiliya ojwila bala iya nyọ họ laulẹ ọọwa lẹ, ọ ka hirikpẹẹ nya ịgba ọgbagba lẹ ọ ka kpehe lẹlẹ. Ị ka tụ ugbeyị ọọwa ku ka gbee kaa pwụ alobyi.

³Ẹnụtụrụ Ọhịnyọ Lụkụrwọ bala ụka nya ụya ọyaya ọnyị myị ọnyị angịnyị wuu ka hirikpẹẹ nyịgba ọgbagba ụwa ịlahị nya ọnang.

⁴Ẹnụtụrụ Ọhịnyọ Lụkụrwọ, adịrahụ ka kpa ịkpịlọ ịrwọnyẹ bala omilodo okpokpo kaa kiliya ịlẹ ka ịngịngịhyẹ a ka haa ka, warị ka kiliya o-ju ila ha Ọngọlahị.

⁵Ọ ka ya ẹpha nya ajẹ nyang ba ọmilodo ọlẹ kọ ka kpa kele. Ọ tị ka kpa ọhaha nya egbe lụmẹ-lụmẹ jaabwọ kọ la ọngịrị kaa ba, ba ịkpịlọ ịlẹ kọ ka kpa kaa kiliya. Ọ ka myịmyị kpa ihin nya ida ba ẹpha ọnyị myị ọnyị ọlẹ kọ kpa kele.

⁶Ụka nya ụya ọyaya nya ọya onyewe, adịrahụ ka kpa ẹna bala ịkpịlọ ịrwọnyẹ bala omilodo ịlẹ ka ịngịngịhyẹ a haa ka kaa họhaha ha Ohe Oluhye.

⁷Ọ ka kpa ẹpha nya ajẹ nya ang ba ẹna bala omilodo, ọ ka ya ẹpha nya ajẹ nyang ba ọnyọ nyọọnyị nyaa. Ọ ka ya ẹpha nya ajẹ nyang ba ịkpịlọ ịlẹ kọ kpa kaa họhaha lụmẹ-lụmẹ jaabwọ kọ lọngịrị kaa ba. Ọ ka ya ihin nya ida ba ẹpha ọnyị myị ọnyị ịlẹ kọ ya họhaha wuu.

⁸Ụka ká adịrahụ a ka jụka ẹpwụ nya ube ịgọgọ, ọ ka bwu ọnẹẹkpa nya ọnang kele. Ịga ọwa ọ tị ka bwu kpehe ịnyịnyị lẹ.

⁹Ụka nya ụya ọyaya ọ lụka ọhẹ-lọhẹ ọlẹ ka angịnyị ka warị kaa gbịgba ha Ohe Oluhye, angịlẹ kii jụka ube ịgọgọ wuu bwu ọnang ọlẹtẹ, ịka kpehe bwu ọnang ọla edii, ọngọlẹ kọ tị bwu ọnang ọ la edii jụka ube ịgọgọ, ị ka kpehe bwu ọnang ọlẹtẹ. Ọngọngẹhe a ka tịrẹkpẹ bwu ọnang ọlẹ kọ bwu jụka ube ịgọgọ ka. Ọngọ bwu ọnang ọhẹ ọ ka kpehe kpụrụrụ bwu ọnang ọkịla.

¹⁰Ụka ká angịnyị a jụka ube ịgọgọ adịrahụ ka baa ka ube ịgọgọ ịnyịnyị. Ụka ọlẹ kii kpehe bwu ube ịgọgọ ọ ka kpehe bwuwa ịnyịnyị.

¹¹Ụka nya ụya ọyaya lee ụka nya ẹka ọgugu ọnyị myị ọnyị ọ ka ya ẹpha nya egbe nyang ba ụgba nya ẹna, ọ ka myịmyị ya ba omilodo ịnyịnyị. Jaabwọ myabwọ ọlẹ kọ lọngịrị kaa ba ọ ka ya ẹpha nya egbe nyang ba ịkpịlọ ịlẹ koka ya họhaha lẹ. Ọ ka ya ihin nya ida ba ẹpha nya egbe nyang ọnyị myị ọnyị ịlẹ kọ kpa kaa họ haha.

¹²Ụkolẹ ka adịrahụ a họhaha ọ bwu irya nyamwụ ha Ọngọlahị, ọhaha ọlịnyị ka ri ọhaha nyọ họlaulẹ lee ịnya ojwila. Ị ka wụrụ ọnang ọ loye nya ọmwẹnụ-ụtụrụ ọ jụka ube otuguru ọọlẹpwụ họọ. Ọ ka họ ọhaha nyamwụ ọọwa lọ gwogu ọlẹ kọ họ ẹnụ nya Ẹnụtụrụ Ọhịnyọ Lụkụrwọ. Ụka ọlẹ kọ họọ kpa wuu kọ kpehe lẹ ị ka tụ ọnang ku lẹlẹ.

¹³Ọngọlahị yẹkẹẹ: adịrahụ ka kpa ọkpịlọ ọ gwẹka okpokpo ọlẹ ka ịngịngịhyẹ a họọ ka kaa kiliya ojwila ha Ọngọlahị ẹnụtụrụ wuu.

¹⁴Ọ ka kpa ọhaha nya egbe nyang baa ẹnụ myị ẹnụ lụtụrụ wuu. Ọhaha nya egbe ịịwa ka la ehya ọharwọnyẹ nya ẹpha nya ajẹ nyang bala ẹhya ọhata nya ihin nya ida ọlẹ kị ka ya wọ ọrụ nya umwu. Ọwa-à ri ọhaha nya egbe nyang ọlẹ kị ka hu ha Ọngọlahị lẹlẹ. Ị ka kpa ehile ọwẹ gbe oyi myị oyi.

¹⁵Ị ka kpa ịkpịlọ bala egbe nyang bala ida kaa họhaha ha Ọngọlahị ẹnụ myị ẹnụ lụtụrụ gboyi myị oyi.

¹⁶Ọngọlahị Ohe Oluhye yẹkẹẹ, ọ ri ka adịrahụ a be ọpyị gahị ọnyị ọlẹng nyamwụ ọhẹ-lọhẹ, aalẹ ọpyị ọọwaka ri ang ugu nya anyị nyọngọọwa gboyi moyi.

¹⁷M ori ka adịrahụ a be ọpyị gahị ọnchẹ nyamwụ ọpyị ọọwa ka ri nya ọnchẹ nyamwụ ọọwa gbee pwụ ụka ọlẹ ka ọnchẹ ka lịlọmwụ ine kọ ka yẹri inya adịrahụ. Anyị ịlẹ keem ka adịrahụ a ma a ka yang ịlẹ ka adịrahụ ya ga haa la nyang ugu nyaa lẹ.

¹⁸Adịrahụ a ka nu ọngọngọhẹ aang ugu nyamwụ ka. Ọ ka ya ang ugu ha anyị alẹng nyamwụ bwẹpwụ nyang nya ịlọmwụ chajị kọ ka tụ angịnyị nyam ọhẹ-lọhẹ pyịpyị nyọka nịọọ ang ịlẹ kịla ka.

¹⁹Ụka ọọwa lẹ, ọlẹng ọwa a kpam bwu iga ọ bwu ka ube ọla ịkịka nya ọnang nya ube ịlịgọgọ nya angị kiliya ịlẹ kị jahị daka ẹtẹ lẹlẹ, ụkọwa lẹ m chehị ka yẹ ịgẹhẹ ụwa ọbaba pẹtẹẹ ọmwẹnụ-obyi lẹlẹ.

²⁰Ọ bim yẹkẹẹ: iigẹwẹ angị kiliya a ka kpụ iyo nya iya okịla kịla nyọka hu ọhọbịrị bala iya ọkịla kịla nya eje ọ wu angịnyị bala ọ ka họ ikaa nya ọhaha nya egbe nyang. Chajị kị ka kpa ang ịgọgọ ka ube otuguru ọ la odehe kaa họ angịnyị aang ka.

²¹Ọọwa lẹ, ọ kpam kpehe ka ube otuguru ọla odehe lẹlẹ, ọ kpam ka ịkịka ine nyamwụ. Iga otuguru ịchiche ịkịla juwa ịkịka ọnyọ myị ọnyị nyaa wuu.

²²Udiyo nya iga otuguru ịla ịkịka nya ube ịịwa la apatẹ ohwita kụrụ iwo. Ẹpwụ ojuju nyaa ri apatẹ ohwiye kụru imiiye behya. Ori omeme nya ịkịka ine nya ube ọwa wuu la mememe.

²³Ụwa ẹ-ẹpwụ nya iga ituguru ine ịịwẹ ị ya ajwọ ịtụka tụka dagaga ju ịgẹlẹ kị kaa tụ ịla ju.

²⁴Ọlẹng ọwa bim yẹkẹẹ: ịgẹwẹ a ri iga ikpaang ịlẹ ka angịlẹ kii gbịgba u-ube ịgọgọ ka kpụ iyo nya iya ọkịlaakịla lẹlẹ.