Read idege ISIKẸLỤ 47 Bible Online

ISIKẸLỤ 47 - idege bible

ISIKẸLỤ 47

¹Ọlẹng ọwa kpam tịrẹkpẹ ka ẹga ọlẹ kị kaa bwu ka ube ịgọgọ. M yẹ ka enyi juwa mwụ bwu ekpeleji nyụwa koye nya ọmwẹnụ-ụtụrụ. (ọmwẹnụ-ụtụrụ ube ịgọgọ a jahị daka lẹ) enyi ọọwa mwụ bwu ekpeleji nya edii nya ube ịgọgọ lalala bwu ekpeleji nya edii nya ogidi.

²Ọlẹng ọwa kpam kpehe bwu ọnang ọla edii ọọwa lẹ, ọkpam dagaga ju kaa bwu ọnang ọlẹ kọ jahị daka ọmwẹnụ-ụtụrụ. Enyi juwa mwụ bwu oye nya edii.

³Ọ ka oye nya ọmwẹnụ-ụtụrụ lang ọ kpa mang ori nyamwụ ụụbwọ. Ọ me ori lala ẹhya ọhata nya ịmalị kele kịlahị ọọwa lẹ, ọ kpam bwu ẹpwụ nya enyi kaa pwụwa lẹlẹ enyi ọọwa jim idikiribi nya ata.

⁴Ọ myịmyị mori ẹhya ọhata nya ịmalị kele kịlahị, enyi ọọwa myị kaa jim a-arụụ. Ọ mori ehya ọhata nya ịmalị kịlahị myịmyị ẹnyi ọọwa myị kaa jim ọọhị.

⁵Ọ myịmyị mori ẹhya ọhata nya ịmalị kele kịlahị, enyi ọọwa myị gbee m jẹ jẹdịyẹ bwu ẹpwụ nyamwụ myị kaka. Awa ọdada kẹnẹ-kẹnẹ ị ka jẹ-ẹ̀ kpa kpoye nyamwụ lẹlẹ.

⁶Ọ bim yẹkẹẹ: ọngịnyị ehe, a yang ọwẹ lẹẹ? Ụka ọọwa lẹ, ọ kpam nya tịrẹkpẹ bwu ọnụụka nya ihu ọọwa lẹlẹ.

⁷Ụka ọlẹ kam nyaa tịrẹkpẹ, m chẹhị ka yẹ iru nya ekeji lụmẹ-lụmẹ ụwa ụpa imimiiye nya enyi ọọwa.

⁸Ọ bim yẹkẹẹ: enyi ọlẹ mwụ jahị daka oye nya ọmwẹnụ-ụtụrụ, ọ ka mwụ bwu ikpokpo nya ịJọdan kaa jụka ẹpwụ nya ihu ọmwụmwụ ka. Ụka ọọwa lẹ ihu ọmwụ mwụ ka a ka dọmwụ nyọka la ọhịhị lẹlẹ.

⁹Ẹga myịga ka eyi ọwẹ a mwụ ka iyo bala iyenyi ka juwa ịịga ịwa, ẹga myị ẹga ka enyi ọwẹ a mwụ ka ọ ka họ ihu ọmwụmwụ ka ka la ọhịhị chajị nya ọọwa lẹ ẹga myi ẹga kọ mwụ ka wuu ọ ka kpa ọhịhị ka ẹga ịịwa.

¹⁰Angị da urwenyi ka juwa ọ-ọnụụka nya Ihu Ọlịma-ịma juwa da urwenyi bwu Agbụ nya enyi ịla Engedi lalaala kaka ju ka Enegilayim. Ị ka ya abagala nyaa pà ọ-ọnụụka nyọka chị ọhụ. Ụma nya iyenyi datị-datị ka juwa Ihu Ọlịma-ịma jaabwọ kị ji Ihu nya iMeditareniya.

¹¹Ma enyi ịlẹpwụ nya ụwa bala enyi ịlẹ kị chịrịrị ọ-ọnụụka wuu a ka há ọnwanwa kpong-kpong ka. Ị ka ri ẹmwụ nya ịma.

¹²Ekeji ụma ọnyị myị ọnyị ịlẹ kị ka kpa hang iriri ka bwu ụwa ụpa imiiye nya ọnụụka nya Ihu ọwa. Apwụ nya ekeji iiwa a ka gbu ka ịtị ka wo chiirụ ka ịnyịnyị. Ị ka juwa nwụ egbe inyewe ẹ-ẹpwụ nya ọya ọnyị myị ọnyị chajị enyi nyaa mwụ bwu ube ịgọgọ. Egbe nya ekeji iiwa ka ri ang iriri ịtị ka kpa apwụụ nyaa họ utoji.

¹³Ọngọlahị Amkpaa yẹkẹẹ, Ịịlẹ a ri oyi nya ọpyị ọlẹ ka ka ga ha imwawụ iwo kụrụ imiiye nya ala Isirẹlụ lẹ. Imwawụ nya iJosẹfụ ka la ebwo nya ọpyị ọgaga imimiiye ụbwọọmwụ.

¹⁴M myị ọnụ ọnyọọngịrị ha adanụ igogo ya ka ya ọpyị ọlẹ haa nyang ugu, lẹẹ a gọọ haa wuu mememe.

¹⁵Oyi nya ọpyị ọlẹtẹ dọmwụ bwu Ihu nya iMeditareniya kaka bwu epweji nya iHetilọn lalaala ka pwụ ẹga Ọchịpwụrụ bwu ọla ịHamatị gbee ka pwụ ịSẹdadị.

¹⁶Ọ ka bwu iBerota bala iSibirayim ịlẹ kị ji apewa nya oyi nya ịDamasịkọsị bala ịHamatị lalaala ka pwụ epweji nya ịHasẹẹ-ịhatịkọn o-oyi nya ịHawụran.

¹⁷Lẹẹlẹ, oyi ọlẹtẹ jẹ bwu Ihu nya iMeditareniya yahị da ka ọmwẹnụ-ụtụrụ kele ka epweji nya Ẹnọn ọlẹ kọ ba ịDamasịkọsị bala ịHamatị ka oye nya ẹtẹ nyamwụ ba.

¹⁸Oyi ọlọmwẹnụ-ụtụrụ dọmwụ bwu edii ẹ-ẹgẹhẹ nya apewa nya epweji nya ịDamasịkọsị bala ịHawụran. Ihu ịJọdan à ri ọbaba nyamwụ ọlapewa nya ọpyị nya Isirẹlụ ka ọmwẹnụ-obyi bala iGiliyadị koye nya ọmwẹnụ-ụtụrụ lalaala ka pwụ epweji nya ịTamaa ọ-ọnụ nya Ihu Ọlịma-ịma.

¹⁹Oyi oledii jẹ yahị ka ka ọmwẹnụ-obyi bwu ịTamaa kele ka ẹmwụ-enyi nya iMeriba-ịkadẹchị. Ọ bwu ụwa tụ oyi nya Ijipiti da kele ka ju ka Ihu nya iMeditareniya.

²⁰Ihu nya iMeditareniya a ri oyi ọlọmwẹnụ-obyi lẹ. ọ bwu ụwa yahị da ka ẹtẹ gbee ka pwụ ẹgẹhẹ kọ ji ọmwẹnụ-obyi nya ẹga Ọchịpwụ bwu ọla ịHamatị.

²¹Aa ga ọpyị ọwẹ ha imwawụ nya ala Isirẹlụ wuu mẹ.

²²Ọpyị ọwẹ ri ang ọlala nyanụ gbe oyi myị oyi lẹ. Angga ịlẹ kị kụ am̀ ị-ịnyanụ, kpụ kị wẹẹ ma anyị am̀ ẹgẹlẹ tịtị ka la ọpyị nyaa ịnyịnyị ụka kanụ ka ga ọpyị. Anụ ka kpaa lala anyị ịlọpyị nya Isirẹlụ. Ị ka la ọpyị nyaa ịnyịnyị bwu ẹpwụ nya ọpyị ọlẹ kị wẹẹ ka ga ha ala Isirẹlụ.

²³Angga ịlẹpwụ nyanụ ka la ọpyị ta alimwawụ nya ala Isirẹlụ ịlẹ kị kụ ta. Am Ọngọlahị Amkpaa-à ya ịnyị lẹ.