Read idege ISIKẸLỤ 48 Bible Online

ISIKẸLỤ 48 - idege bible

ISIKẸLỤ 48

¹Ẹnyị nya imwawụ nya ala Isirẹlụ bala ọpyị ọlẹ kị ka la a lẹẹlẹ: imwawụ nya ịDan ka la ọpyị ọlẹ ká oyi nyamwụ ji hwẹ̀ẹẹ ẹ-ẹtẹ. Oyi nyamwụ jẹ bwu ụgbẹyị nya iHetilọn kele ká ẹga Ọchịpwụ bwu ọla ịHamatị ene kọọ yẹgẹmwụ ka epweji nya ịHasaa-ẹnan ọlẹ kọ ji oyi nya ịDamasịkọsị yụbwọ la ịHamatị beji koye nya ẹtẹ. Ọpyị nya ịDan juwa tụ ọpyị nya Isirẹlụ da bwu ọmwẹnụ-ụtụrụ kele ka ju ka ọmwẹnụ-obyi nyamwụ.

²Ọpyị nya Achẹẹ ji koye edii nya ịnya ịDan. Ọ jẹ bwu ọmwẹnụ-ụtụrụ kele ka ọmwẹnụ-obyi ịnyịnyị.

³Ọpyị nya ịNafụtali ji koye nya edii nya ịnya Achẹẹ. Ọ jẹ bwu ọmwẹnụ-ụtụrụ kele ka ọmwẹnụ-obyi ịnyịnyị.

⁴Ọpyị nya imwawụ nya ịManasẹ ba ịnya ịNafụtali ba koye nya edii. Ọ jẹ bwu ọmwẹnụ-ụtụrụ kele ka ọmwẹnụ-obyi ịnyịnyị.

⁵Ọpyị ọ-ba ịnya ịManasẹ ba koye nya edii ri nya Ifurem.

⁶Ịnya iRubẹn ba ịnya Ifurem ba,

⁷ene ká imwawụ nya iJuda ka la gu ịnya iRubẹn gu. Ọpyị nya imwawụ ọnyọnyọọnyị juwa bwu ọmwẹnụ-ụtụrụ lalaala ka ju ka ọmwẹnụ-obyi.

⁸Ị ka chị une nya ọpyị ọkịla ọlẹ kọ bọọba da dụwa nya ịlọmwụ-ịlọmwụ. Epwụ ojuju nyamwụ ka ri ịmalị irwiye. Ọ tị ka la udiyo ta ọpyị ọlẹ kị ga ha imwawụ meme. Ẹ-ẹgẹwẹ ị ka ya Ube nya Amkpaa rịrị lẹ.

⁹Une nya ọpyị ọlẹ kọ ka ri nya Amkpaa ka la ịmalị ineku ba eku nya udiyo ọlala. Ẹpwụ ojuju nyamwụ la ri ịmalị ịta.

¹⁰Ị ka be ọpyị ha angịkiliya ẹ-ẹga ọlịgọgọ ọwẹ. Ori omeme nya ọpyị nyaa ka ri ịmalị ineku ba eku nya udiyo nyamwụ. Ẹpwụ ojuju nyamwụ ka ri ịmalị ịta ba eku nya ẹpwụ ojuju. Ẹgẹwẹ ị ka ya Ube nya Amkpaa rịrị lẹ.

¹¹Ẹga ọlịgọgọ ọwẹ ka ri nya angịkiliya ịlẹ kị ri anyị ịtụma nya ịSadọkọ. Ịwa myị ẹrụ ham kpẹẹkpẹẹ. Ị́ yẹjula ala Isirẹlụ ịkịla tụ ala iLivayị ịkịla họ ang onyobyi ka.

¹²Une nya ọpyị ọlẹ kịị be ha ugbiyegu nya iSadọkọ bwu ọpyị ọlịgọgọ ọlẹ ka ba ọpyị nya alugbiyegu nyangị kiliya ba, ọọwa à tị́ ka la ịgọgọ gụgụ wuu lẹlẹ.

¹³Ala ugbiyegu nya angị kiliya ka la ọpyị ba ọpyị nyangịkiliya ba. Udiyo nyamwụ ka la imalị iwo, ẹpwụ ojuju nyamwụ ka la imalị ine.

¹⁴Ị ya ọpyị ọọwa ra lee ọ ya nyẹ ọngịnyị la ịngịngịhyẹ ka. Ọngọhẹ a tị ka tụ hyoo ha ọngọkịla ka.

¹⁵Ụpa nya ọpyị ọlịgọgọ ọlẹ kọ hi laa imalị iwo, udiyo, epwụ ojuju nyamwụ la imalị imiiye. Ọpyị ohihi ọlẹ a la ịgọgọ kaka. Ori iga ọlẹ ka ọng myị ọng ọlẹ kọ họọ ka nẹpwa. Ị ka nwụ epweji nya uche wuu ruwa ẹ-ẹpwarịrị nyụwa.

¹⁶Ori ọmeme nya epweji ọọwa ka lịlẹ: oye nya ẹtẹ ka hipinyẹ kọ ka la imalị, okpokpo ịnyịnyị emwẹnụtụrụ bala ọmwẹnụ-obyi bala edii anyị a ka la wuu ịnyịnyị lẹ.

¹⁷Epweji ọọwa ka la umẹ wuu dagaga ju. Ụmẹ ọọwa ka la apatẹ ụnọ da ohu kụrụ iwo da irwiye ụpa ọnyị myị ọnyị nyamwụ dagaga ju.

¹⁸Udiyo ọlala nya ọpyị ọlịgọgọ ọlẹ kọ hi la imalị ine koye nya ọmwẹnụ-ụtụrụ ọmyịmyị la imalị ine koye nya ọmwẹnụ-obyi, iga ọọwa angịlẹ kii kụrwa epweji nya aluche a ka wu ẹrụ nyaa lẹ.

¹⁹Ọng myọng ọlẹ kọ nẹpwa epweji nya aluche ka wu ẹrụ ụwa ọọrịrị kọọ bwu imwawụ ọnyị myị ọnyị nya ala Isirẹlụ.

²⁰Ọpyị ọlẹ wuu kị ka be da ka la imalị iwo chiri dagaga ju. Ọwaà tị́ri une nya ọpyị ọlịgọgọ tụ ịnya epweji nya aluche lẹlẹ.

²¹Ọpyị ịkịla ịlẹ kii hi ụwa ịkịka nya ọpyị ọlịgọgọ ka ụpa ọnyị myị ọnyị bala ịnya ala epweji nya alụma ka ri nya adịrahụ ọpyị ọọwa ka la imalị iwo chiriri bwu ọpyị ọlịgọgọ kele ka ọbaba ọla ọmwẹnụ-ụtụrụ. Ọ ka myịmyị la ịmalị iwo chiriri bwụwa kaa pwụ ọbaba ọla ọmwẹnụ-obyi. Ọpyị nya adịrahụ ọọwa ka juwa ịkịka ọ kpụrụrụ nya ọpyị nya alinẹẹgba nya ala Isirẹlụ ọpyị ọlịgọgọ bala ube ịgọgọ nya Ohe Oluhye ka juwa ẹ-ẹpwarịrị.

²²Ọpyị nya ala ugbiyegu nyangi kiliya bala ịnya epweji nya alụma ka juwa ẹ-ẹpwarịrị nyọpyị ọlẹ kori nya adịrahụ. Une nya ọpyị nya adịrahụ ọọwa tị ka juwa ẹ-ẹpwarịrị nya imwahụ nya ala iJuda bala ịnya iBenjamin.

²³Ịịlẹ ọgaga nyọpyị nya imwawụ ihihi a ka la lẹ: Imwawụ nya iBenjamin ka la une nyọpyị okpokpo. Ọ ka luduyo bwupa ọla ọmwẹnụ-ụtụrụ kaa pwụ ọbaba ọla ọmwẹnụ-obyi.

²⁴Imwawụ nya iSimyọn ka la une nyọpyị okpokpo ogwoyi nya iBenjamin gu bwupa ọla ọmwẹnụ-ụtụrụ lalala kele ka ọmwẹnụ-obyi.

²⁵Imwawụ nya iSaka ka la une nyọpyị okpokpo ọ gwoyi nya iSaimon gu bwupa ọla ọmwẹnụ-ụtụrụ lalala kele ka ọmwẹnụ-obyi.

²⁶Imwawụ nya iSebulọn ka la une nyọpyị okpokpo ọ gwoyi nya iSakaa gu bwupa ọla ọmwẹnụ-ụtụrụ lalala kele ka ọmwẹnụ-obyi.

²⁷Imwawụ nya ịGadị ka la une nya ọpyị okpokpo ogwoyi nya iSebulun gu bwupa ọla ọmwẹnụ-ụtụrụ lalala ka ọmwẹnụ-obyi.

²⁸Oyi oledii nya ọpyị nya ịGadị jẹ bwu ịTamaa kele ka ẹmwụ-enyi nya iMeriba-ịkadẹchị. Ọ bwu ụwa lalaala ka pwụ oyi nya ala Ijipiti bala Ihu nya iMeditareniya.

²⁹Ọpyị ọlẹ ka ka gwene ha imwawụ nya ala Isirẹlụ a wẹ lẹlẹ. Ọ tị ka ri ang ọlala nyaa. Ịnyị Ohe Oluhye a ya lẹ.

³⁰Ịlẹẹ a ka ri iga ibwu ka epweji lẹ. Ọ ri ọmeme nya ụpa ọlẹtẹ gu ịmalị okpokpo.

³¹Igirigba ịla ẹtẹ la ịta, irii ogirigba nya iRubẹn, Ogirigba nya iJuda bala ịnya Ugbiyegu nyangị kịliya. Ị ka ya ẹnyị nya igirigba ịịwa wụrụ imwawụ nya ala Isirẹlụ.

³²Ori omeme ọla ụpa nya ọmwẹnụ-ụtụrụ gu imalị okpokpo, igirigba nya iBenjamin bala ịnya Ida.

³³Ori omeme ọla upa nya edii gu imalị okpokpo, igirigba ịlụwa la ịta. Irii ogbirigba nya iSimyọn bala ogirigba nya iSakaa bala ịnya iSebulọn.

³⁴Ori omeme ọla oye nya ẹmwonuobi gu imalị okpokpo. Igirigba ịlụwa la ịta. Irii ogirigba nya ịGadị ogirigba nya Achẹẹ bala ịnya ịNafụtali.

³⁵Ori omeme nya epweji wuu dagaga ju ka la la ịmalị ịrwọnyẹ. Bwu ụka ọọwa kịlahị, ẹnyị ọlẹ kị ka wụrụ epweji ọọwa ka ri yẹkẹẹ, “Amkpaa ji ẹgẹlẹ[2]”