Read idege ISIKẸLỤ 5 Bible Online

ISIKẸLỤ 5 - idege bible

ISIKẸLỤ 5

¹Amkpaa byim yẹkẹẹ, “Ọngịnyị ehe ee, hu oge ọlẹ kọ liri weriweri, ká kpa pwọ ịlọng inyi bala ịchwọ mẹ. Aa me inyi ịlẹ ka pwọ ẹpwụ lang ọ-kpa me ilo ọlala nya ang ori, ká chaa ebwo ịta mẹ.

²A ka chị ebwo nyaa ọhẹ ịla ụwa ẹpwụ nya epweji ụka ọlẹ ka ẹnụtụrụ ọdagaga jwọọ a cheju, hu ebwo ọkịla chajị ka kpa ẹma chaa eku kpikpiikpi tụ epweji epweji wuu da, hu ebwo ọhata ka ya nyi epepe chịka uhye-ọgba. Ụka ọọwa lẹ m ka kwaa lẹma nyam lẹlẹ.

³A chụ inyi ịhyẹ hi pyịnyẹng ka ya chori ụwa ụgbono nyapwụ nyang.

⁴Ẹpwụ nya inyi ịlẹ kaya chori wẹẹ, aa chịhyẹ pyịnyẹng ju ka epwila chajị kị wuru, ụka ọọwa lẹ ịla a ka wuru tụ ẹpwụma nya Isirẹlụ wuu da lẹlẹ.”

⁵Ọngọlahị Amkpaa yẹkẹẹ, “Anụ yẹ iJerusalẹm wẹẹ, m yọọ kụ ẹpwarịrị nya ẹpwụma ilodehe wuu lẹpwụma ịkịla dagaga jwoo.

⁶Ọ tị bịrị ehile nyam, mwọọgịlẹ họ ang onyobyi gụ ẹpwụma ịkịla ịdagaga jwoo. Ọ pwa ehile nyam ọkpakpa gbanggbang.

⁷Chajị nya ọọwa lẹ, Ọngọlahị Ohe Oluhye yẹkẹẹ, chajị nyọlẹ kanụ họ ang onyobyi gụ ẹpwụma ịkịla ịlẹ kị dagaga junu wuu, kanụ myị kpa ehile nyam ka ọkọkọ nya ọọwa lẹ kanụ lọhịhị gbịla alẹpwụma ịkịla ịlẹ kị dagaga junu wẹlẹ,

⁸Am Ọngọlahị Amkpaa lịlọm juwa ka chịnụ ọgụ am tị ka lanụ eje ịlahị nya ala epwoja wuu.

⁹Chajị nya ang inyibyi ịlẹ kanụ họ wẹ lẹ am ka họnụ ụma nyang ọlẹ kam họnụ ẹnẹhẹ lẹka lee ọ ka họnụ ang ọlịnyị myịmyị kaka.

¹⁰Anụ yẹ mẹẹ angịlẹ kị manyị ka wanyị nyaa ri, anyị tị ka wu angị maama ri ịnyịnyị. M ka yẹnụ akama ma angịlẹ kị hi m ka nyaa epepe tụ ẹga myị ẹga wuu da.

¹¹Chajị nya ọọwa lẹ, m̀ jam ya nya ịlẹhị-ịhẹhị nyori jaabwọ kam Ọngọlahị Amkpaa juwa hịhị lẹ, ḿ ka jujwo nyanụ kpong-kpong kaka, chajị anụ ju Ube Ịgọgọ nyam ibyi bwula ijiga ịkpụkpụ bala ang inyibyi ịlẹ wuu kanụ họ.

¹²Ẹdụrụ bala imyi ka nwụ ẹhya ọhata nyanụ, ị ka nwụ ẹhya ọhata ịkịla lẹma nyẹẹwụ, am ka nyii ẹhya ọhata nyanụ ihihi epepe tụ ẹga myị ẹga wuu da ọọwa lẹ m ka juwa lẹma nyẹẹwụ nyam lẹlẹ.

¹³“M ka ju agbama tanụ pwụ ọbaba gbee kọ ka nwam, ụka kọ lịnyị lẹ, anụ ka jẹ yẹkẹẹ, am Ọngọlahị a ya ẹla tanụ chajị nyọlẹ kam wẹẹjẹ tanụ lijiji uhye-ọgba nya ịhọbịrị nyanụ lẹ.

¹⁴Ọgụgụ wuu, am ka họ ẹpwụma nyanụ ka da uhuhwo bala ọhọ ẹpwụma wuu tụ angịlẹ kị chịpwụrụ bwẹgẹlẹ ka hụlọ ẹhụ junu.

¹⁵“Ụka kam yẹnụ akama ẹpwụ nya agbama bala ịkẹjẹ awụrụ nyam, ọ ka wu angịnyị wuu ejiri bala ọmẹla jaa bala ọ laa ẹbyẹbyị. Ị ka junu ẹpẹ bala ọ chịịnụ arụ.

¹⁶Am ka da ịcha nya imyi ọnwụnwụ ọtụka-ọtụka kaka chịnụ, ịcha nya imyi ọnwụnwụ ọọwa ka tanụ ayịreji, am ka họ uhii ọtụka-ọtụka ka wẹ chịnụ ọgụ gbee kaang oriri nyanụ ka myị gbanggbang.

¹⁷Am ka du imyi ọnwụnwụ bala iyo ịnyịngịrị ịlẹpwụmẹ kaka nwụ anjwo nyanụ, am ka myịmịyị-ị̀ du ẹdụrụ bala ẹwụ ọdada kaa tanụ ayịreji, ịnyị am Ọngọlahị Ohe Oluhye a ya lẹ.”