Read idege ISIKẸLỤ 6 Bible Online

ISIKẸLỤ 6 - idege bible

ISIKẸLỤ 6

¹Ọngọlahị ya ẹla taam yẹkẹẹ,

²Ọngịnyị ehe ee, hu ẹhị nyang hwaa ka uhye nya ọgbọdọ nya ala Isirẹlụ ka yẹ ọmwụ jwaa yẹkẹẹ,

³Anụ ịgbọdọ nya ala Isirẹlụ, anụ wo ẹla ọlẹ ka Ọngọlahị Ohe Oluhye ya mẹẹ, Ọngọlahị byinu anụ ịgbọdọ bala ịba bala ikpokpo yẹkẹẹ, am lịlọm juwa du ẹma nya ẹwụ chịnụ ọgụ, ị ka ta ẹga myị ẹga ịlẹ kị ka kpụ ijiga uhye nyanụ ayịreji.

⁴Ị ka tụrụ ọgidi ịlẹ kị kaa kpụ ijiga bala uhye nya ẹgẹlẹ kị kaa kịla iya ichoru kwọkwọ uhye-ọgba nyanụ ayịreji. Ị ka nwụ angịlẹ kị kaa kpụ ijiga ịwa chụwa ịlahị nya ijiga nyaa.

⁵Am ka nyi egu nya ala Isirẹlụ epepe chụwa ịlahị nya ijiga nyaa, am ka myịmyị nyi ekpinegu nyaa epepe dagaga ju ogidi ikpyiijiga nyaa.

⁶Ị ka bịrị epweji nya ala Isirẹlụ wuu bala ogidi ịkpụ ijiga nyaa bala ekpeku nya ijiga nyaa ịnyịnyị ị ka baa ene yịgẹ-yịgẹ. Ị ka nyi ogidi ọkịliya oju oru nyaa epepe, ang myị ang ịlẹ kị kpa ụbwọ nyaa họọ ka ta ayịreji.

⁷Ẹpwụ nya angịlẹ kị nwụ ka chụwa pata pata ịlahị nya angịlẹ kị gbu ka, ụka ọọwa lẹ anụ ka jẹ ya am a ri Ohe Oluhye lẹ.

⁸Am ka họ langịhyẹ ka be igu nya ẹma nya ẹwụ ọlẹ kam ka nyaa epepe tụ odehe da wuu.

⁹Ọng myị ọng ịlẹ kị be myị ka kpịtịya nyam ụwa epweji ịlẹ kịị waa kpa ka. Ịka kpịtịya jaabwọ kọ gum ọkịlẹtụ chajị nya ọchịla ọhu ọkịlẹtụ ha ka nyaa ọlẹ kodu kị chẹhị rụ hiim bala ọ jahị nyaa kpata ka ẹga nya ijiga. Ụka ọọwa lẹ ị ka wụ ịlaa ẹjẹ chajị nyang ịtịpyọ bala ang ipwokụka ịlẹ kị họ lẹlẹ.

¹⁰Ụka ọọwa lẹ ị ka jẹ ya am a ri Ọngọlahị lẹ, am tii ka ju angịnyị uhihi ọọnụ keem ka.

¹¹Ọngọlahị Ohe Oluhye yẹkẹẹ, chabwọ iigo ka yata cheji ka cheko ya nyị “Chahoho” chajị nya ịhọbịrị bala abwẹla inyibyi nya ala Isirẹlụ, ẹma nya ẹwụ bala imyi ọnwụnwụ bala ẹdụrụ ka ta ayịreji.

¹²Ẹdurụ ka nwụ angịlẹ kị juwa ẹ-ẹga ịlụrụ ẹma nyẹẹwụ ka ri angịlẹ kiji juwa ọnaabwọ, angịlẹ kị chịda bwepwụ nyangịịwẹ imyi ọnwụnwụ ka ta ayịreji. Ọgụ ọwẹ m ka du agbama nyam chaa ọgụ lẹlẹ.

¹³Egu nya angịnyị ka nyi epepe pata pata chụwa ẹ-ẹga nya ijiga bala ogidi ikiliya nya ijiga bala ụwa uhye nya igbọdọ bala ekpeleji nya ekeji ilukpo-lukpo bala ọmwụ nya ekeji ịtụka bala ụ-ụwa ẹga myị ẹga ịlẹ kị kaa kpụ ijiga, ụka ọọwa lẹ ọng myị ọng a ka jẹ ya am a ri Ọngọlahị lẹ.

¹⁴M ka nịra ụbwọ nyam kpaa ka taa ayịreji am ka họ epweji nya ala Isirẹlụ ka da uhuhwo lala bwu ugbileji wuu ju ka iRibla. Ẹga myị ẹga ịlẹ ka ala Isirẹlụ a kụ m ka chụwa da ka. Uka ọọwa lẹ ị ka jẹ ya am a ri Ọngọlahị lẹlẹ.