Read idege ISIKẸLỤ 7 Bible Online

ISIKẸLỤ 7 - idege bible

ISIKẸLỤ 7

¹Ọngọlahị ya ẹla tam yẹkẹẹ,

²“Ọngịnyị ehe ee, am Ọngọlahị Agụgụ byi ala Isirẹlụ yẹkẹẹ, Ụka họ cheju am ịkịka ine nyọpyị nya ala Isirẹlụ wuu lẹ.

³Isirẹlụ, ụka myị lẹ, m ka ju agbama tanụ lẹ, am ka lanụ eje jaabwọ ọlẹ ka ụkụrwọ nyanụ la. M tị ka yẹnụ akama chajị nyang ibyi ịlẹ kanụ họọ wuu.

⁴Ẹhị nyam a juwa chị Ọngọngọhẹ da ka lee am ọ-ka yẹ ahyẹẹrwẹrwa nyanụ ka, am ka yẹnụ akama chajị nyang inyibyi ịlẹ kanụ họ. Ụka ọọwa lẹ anụ ka jẹ yẹkẹẹ, am a ri Ọngọlahị Ohe Oluhye lẹlẹ.”

⁵Ọngọlahị Ohe Oluhye yẹkẹẹ, Ayịreji ọtata wẹẹ tụ awụlẹ da wẹ chịnụ ọgụ.

⁶Ang wuu cheju lẹ. Ọ myịmyị nyang wuu a lẹẹ lẹ, akama wẹ uhye nyanụ lẹ.

⁷Anụ angịlẹ kanụ kwaam ị-Isirẹlụ, ayịreji nyanụ pweji lẹ, ụka ọwa pweji lẹ, ụka ọwa ju chwẹẹ wuu lẹ, ụka ọwa ri ụka kanụ ka juhi ma ụka nya uya ọyaya juwa kpụ ijiga uhye nya ịgbọdọ ka.

⁸Ọ nọ chẹẹ, m̀ ka kpa agbama nyam jahị danụ. M̀ ka yẹnụ akama chajị nya ang ịlẹ kanụ họ, kam ka nwụnụ uri nya ang inyibyi ịlẹ kanụ họ wuu.

⁹Ḿ ka yẹnụ lẹhị nya ahyẹẹrwẹrwa lee ọ chị ọngọngọhẹ da ka, am ka yẹnụ akama jaabwọ ọlẹ ka abwẹla nyanụ la bala uhye nya angị ibi ịlẹ kanụ ka họ. Ụka ọọwa lẹ anụ ka jẹ yẹkẹẹ, am Ọngọlahị Ohe Oluhye a yẹnụ akama wẹlẹ.

¹⁰Yẹ mẹ, ẹnụtụrụ ọwa pwụ eji lẹ, ayịreji ọtata nyanụ dọmwụ lẹ, ẹla ọ-họ kịrọrọ ju apwụ lẹ ọbọọchẹ tị nwụ egbe lẹ.

¹¹Ẹla ojigi-jigi nwa kaa ri ọkwọ ọlala lẹ, ọngọngọhẹ a ka hi kpong-kpong ka. Ụdụ ọkpụkpụ nyaa bala angị ịlala chịba-chịba nyaa bala ogbo ọlala nyaa a ka hi ka.

¹²Ụka ọwa pweji lẹẹ, anụ angịlẹ kanụ kaa raang anụ chị ọkẹkẹnị ka, anụ angịlẹ kanụ tị juwa yang ra anụ tị bwahiji ka chajị ịkẹjẹ awụrụ ọwa juwa chịnụ ọgụ wuu lawụlẹ.

¹³Ọngọ da ọhị ọhẹ-lọhẹ a ka jẹ-ẹ̀ myịmyị hịị luduyo kpụ ọjẹka wu ịlọmwụ abwọ jaabwọ kọ la ene-ene kaka chajị ịkẹjẹ awụrụ nya Ohe Oluhye juwa uhye nyaa wuu. Ọhịhị nya ọngọngọhẹ a ka chịda ka chajị nya ịhọbịrị ịlẹ kị họ.

¹⁴Ị chị ẹkụrwẹ lẹ, ị tị nwụla ang myị ang nya ẹwụ nọ wuu lẹ ma ọngọngọhẹ à tị́ ka ẹwụ myị ka chajị ịkẹjẹ awụrụ nyam juhye nyaa wuu.

¹⁵Ẹma nya ẹwụ juwa odehe, ẹdụrụ ọjụjụ bala imyi ọnwụnwụ tị jam u-ube. Ọngọngọhẹ ọlẹ kọ kpehe hi epweji ẹma nyẹẹwụ ka ryọọ, angịlẹ kị tị hi hụhụ ẹ-ẹpwa ẹdụrụ bala imyi ọnwụnwụ ka ta ayịreji.

¹⁶Ọngọngọhẹ ọlẹ kọ be rụ ka uhye nya ọgbọdọ lala enewulo ịlẹ kị kaa jwaa uhihi bwu ikpokpo. Angịịwa wuu ka juwa bida chajị nya ihibịrị ịlẹ kịhọ.

¹⁷Abwọ wuu ka chaa pyẹpyẹ bala adịrẹ nyaa ka waa gbẹdẹ gbẹdẹ lala enyi.

¹⁸Ịwa wuu ka ya awụrụ nya ida obaba kụrụ, ejiri ka waa, ị ka pwịnyị hi egbeju nyaa wuu bala oyoyi ka juwa ọtụka-ọtụka.

¹⁹Ị ka go okpokpo onyoowuru bala okpoko ịgọm nyaa chịka ụgbẹyị lala ang ịlẹ kị haka, chajị ikpoko onyoowuru bala okpoko ịgọm nyaa a ka chaa da bwu ẹpwụ nya agbama nya Ohe Oluhye myị ka. Ị ka jẹ-ẹ̀ họ ịbaba nyaa haa myị lee ị ka họ ịjẹka wu ẹpwụ ka. Chajị ikpoko ịgọm bala ikpoko inyiiwuru ịwẹ a ju ọmwụ nyahị ọhụhụ nyaa lẹ.

²⁰Ị kaa hi ọbọọchẹ ju ang idoomyi bala angị idabwọ nyaa, angịịwa tị ka kpa họ ekpeku nya ijiga nyaa lẹ chajị nya ọwa a du ka Ọngọlahị ka ya ala angị ibi haa lẹ.

²¹Ọngọlahị yẹkẹẹ, am ka ya iwe da angga ka bwu ẹga ịkịla kaa gaa kparụ alọkwọ ka go ụdụ nyanụ wuu ị ka chaa ịrị.

²²Am ka jahị kpata hyaa chajị kị ka hu ẹpẹpẹ ju ẹga ọlịkẹjẹ nyam. Alagbụrụ ka jukuwa ka chụwa iri.

²³Aa họ agbịyẹ mẹ chajị ẹga myị ẹga mịla ịwọ ọchịchị nya uguru ẹla lẹ, agbụrụ ọhọhọ tị jiga myị ẹga am epweji wuu lẹ.

²⁴Am ka ya iwe da ha epwụma ịlẹ kị lọkwọ gụ wuu chajị kị ka wẹ kaa nu ẹpwa hyanụ, ọbọọchẹ ogidogbo nya angịlẹ kị lọngịrị ẹ-ẹpwụ nyanụ ka cheju ụka ọlẹ kị hu ẹpẹpẹ ju ẹga ịlẹ kanụ kaa gbịgba.

²⁵Ụka nya ẹrụ ọmwụmwụ juwa warị ịka tịtọ nya okpunyi ọlala ma ịtị ka yọọ ka.

²⁶Ang ojụjụ ọhẹ ka tụ ang ojụjụ ọkịla da, oja onyobyi ọhẹ ka dịrẹ oja onyobyi ọkịla, ị ka ka ẹga nya alọmwụ ma ọmwụ ọyẹyẹ a ka ji ka bala ẹla ọmẹjẹ ka rụ hiirya nya angịgbahị.

²⁷Adịrahụ ka bida, ọkịlẹtụ ka kpụ anyị alẹng nya adịrahụ enyi. Abwọ nya angịnyị ilepweji wuu ka hụ kpakpaakpa ọ-ọluhi, am ka họnụ jaabwọ ọlẹ ka abwẹla nyanụ la, am tị ka lanụ eje jaabwọ ka eje ọlala nyanụ la, ụka kọ lịnyị lẹ anụ ka jẹẹm am nya ri Ọngọlahị Agụgụ lẹlẹ.