Read idege ISIKẸLỤ 8 Bible Online

ISIKẸLỤ 8 - idege bible

ISIKẸLỤ 8

¹Ẹnụtụrụ ọharụ nya ọya ọharwọnyẹ nya ẹka ịrwọnyẹ nyọlẹ ka alẹwụ wuhi kparụ, m hụhụ ụwa ẹpwa nyam bala angịgbahị nya ala Isirẹlụ ịlẹ kị warị kaa hu taam, ọọwa lẹ ọngịrị nya Ọngọlahị a wẹ uhye nyaam lẹlẹ.

²Am hu ehị hwaa ka uhye lẹ, am yẹ ịngịhyẹ ọlẹ kọ me abwụma nya ọngịnyị ehe lẹlẹ, o-bwu ekilo nyamwụ wuu keji lala ila, ọ bwu ekilo nyamwụ kele ka uhye juwa hụ pịrịpịrị lala ịla nya oje-ịbịrọnsị.

³Ọ nịra ịngịhyẹ ọlẹ kọ me ụbwọ kpaa lẹ, ọọwa lẹ ọya chịm inyi lẹlẹ, ụwa ẹpwụ nya ọyị ọyẹyẹ ọọwa lẹ olegu nya Ohe Oluhye a hum hwaa kpa ka uhye lẹ ọ kpam ka ka ju ka iJerusalẹm lẹlẹ. Ọ kpam ka ọnang nya ụgbẹyị ọlẹ kị da ju ka ube ọtụguru ọlẹ kọ jahị daka oye oluhye ẹga ọlẹ ka ukpeku nya ojiga ọlẹ kọ wụ Ohe Oluhye ẹjẹ ji.

⁴Ụka ọọwa lẹ, am myịmyị yẹ ogbo ọlala nya Ohe Oluhye nya ala Isirẹlụ jaabwọ ọlẹ kam yẹ ene-ene ụwa ikpokpo lẹlẹ.

⁵Ohe Oluhye byim yẹkẹẹ, ọngịnyị ehe, chị ehị kele koye oluhye wẹ, ụka ọlẹ kam chẹhị kele lẹ, am yẹ ukpeku ọlẹ kọ wụ Ohe Oluhye ẹjẹ ụwa ọnang ọlẹ kị kaa bwu ka ẹga nya ogidi oloye oluhye lẹlẹ.

⁶Ohe Oluhye byim yẹkẹẹ, ọngịnyị ehe, a yẹ, a yang ibi ịlẹ ka ala Isirẹlụ họ ẹgẹlẹ chajị kị ka kum rụ hi ube ịgọgọ nyam lẹ? Aka dọmwụ yang ịtịpyọ gụ ịwẹ gụ wẹẹ.

⁷Ọ kpam kaka ju ka ọnang nya ẹpwụ nya ube ọtụgụru ọọwa lẹ m chẹhị kaka yẹ ugulọ kọ bwuru iwa lẹlẹ.

⁸Ọ byim yẹkẹẹ, ọngịnyị ehe, wu ugulọ ọwẹ mẹ, ụka ọlẹ kam wu ugulọ ọwa lẹ, ọnang a da bwuwa lẹlẹ.

⁹Ọ byim yẹkẹẹ, bwu ịgẹwẹ kele kaka yẹ ang ịtịpyọ ịlẹ ka ala Isirẹlụ kaa họ.

¹⁰Ụka ọlẹ kam kele lẹ m yẹ kị gba ipwoto nyiyo ịkpa apwụ gbileji ụma ọnyị myị ọnyị wuu ba ugulọ bala ịnya iyo ịlẹ kị chịrị bala ekpeku ịlẹ ka ala Isirẹlụ kaa gbịgba ha.

¹¹Angịgbahị ohwita kụrụ iwo nya ala Isirẹlụ godayị ụwa ịlahị nyaa, iJaasaniya ọnyị nya ịChafan godayị ụwa ẹpwarịrị nya angị gbahị ịwẹ. Ịwa wuu kpa ẹja ọya iya ochoru kwọkwọ ju ụbwọ nyaa la ịmwụ ọnyị nyị nya iya ọ ju oru ọwa juwa rụ ka uhye-ọgba.

¹²Ọọwa lẹ Ohe Oluhye a bẹkọ wụrụm yẹkẹẹ, ọngịnyị ehe, a yang ịlẹ ka angịgbahị nya ala Isirẹlụ wẹ họ iwiba lẹ, ọng myị ọng nyaa wuu la ube nya ijiga chajị ị yẹkẹẹ, Ọngọlahị nyị ya ịwa ka, nyị deeri hiiwa lẹ.

¹³Ọọwa lẹ Ọngọlahị a myịmyị byim yẹkẹẹ, a ka myịmyị yẹ angị inyibyi ị gụ ịwẹ gụ ịlẹ kị ka họ.

¹⁴Ụka ọọwa lẹ ọ kpam ka ọnang oloye oluhye ọlẹ kị kaa bwu ka ube ịgọgọ nya ohe Oluhye lẹ, ọ mẹ anyang ịhyẹ jẹm kị juwa bida chajị nya ojiga ọlẹ kị wụrụ Ịtammusi lẹlẹ.

¹⁵Ọọwa lẹ ọ byim yẹkẹẹ, ọngịnyị ehe a yẹ ang ọwẹ lẹ, a ka myịmyị ye ang inyibyi ịgụ ịwẹ gụ wẹẹ.

¹⁶Ụka ọọwa lẹ ọ kpam ka ẹpwụ nya ube ọtụguru olube ịgọgọ nya Ọngọlahị ọ mẹ alẹng ohu kụrụ ịrụ ịhyẹ jẹm ọnang ọ jụ ka ube ịgọgọ nya Ọngọlahị ụwa ẹpwarịrị nya ogidi ọkịliya bala ọnẹkpa nya ube ịgọgọ. Angịịwa jẹkpẹ nyaa da ube ịgọgọ nya Ọngọlahị ọọwa lẹ ị juwa kpẹtẹji jahị da ka ọmwẹnụ-ụtụrụ ha ẹnụ ọlẹ kọ juwa kpehe lẹlẹ.

¹⁷Ụka ọọwa lẹ Ọngọlahị a tọm wọ yẹkẹẹ, ọngịnyị ehe a yang ọwẹ lẹ? Ọ tịpyọ lụmẹ nyang ịlẹ ka ala iJuda wẹ họ ẹgẹlẹ kaa? Ị ka myịmyị kịlahị lọ hu agbama jum lọ warị kaka hang ịlịnyịnyị ám̀ u-ube ịgọgọ? A yẹ jaabwọ kịị wẹ pẹ okunyi nyaa apa wẹẹ.

¹⁸Chajị nya ọọwa lẹ, am ka hẹla taa lagbama, ẹhị nyam à tị́ ka chị ọngọngọhẹ da lee ọ yẹhị ahyẹẹrwẹrwa nya ọngọngọhẹ ka. Ọ ri kị dọmwụ jida jum kam wo, ḿ ka ke ụrụ laa ka.