Read idege ỊDANẸLỤ 1 Bible Online

ỊDANẸLỤ 1 - idege bible

ỊDANẸLỤ 1

¹Ụka ọhẹ ẹ-ẹpwụ nya ẹka ọhata nyọlẹ ka iJehoyakim ri adịrahụ nya iJuda, iNebukadinesa Adịrahụ nya ala ịBabịlọn bala angịnyị nyamwụ wẹ kaka chị urwe dagaga ju epweji nya iJerusalẹm.

²Ọngọlahị ya iwe da họọ ọ wu iJehoyakim Adịrahụ bala o-go ang-abwọ ịhyẹ bwu ẹpwang nya Ohe Oluhye. Ọ kpa alagba ịhyẹ ba ịlọmwụ kele ka ube nya ijiga nyamwụ ị-ịBabịlọn. Ọọwa, ọ ya ịja ịlẹ kị go guru ẹ-ẹpwụ nya ube nya ojiga nyamwụ lẹlẹ.

³Adịrahụ da Achịpẹnasị olegbeju nya alụkụrwọ ịlẹpwa nya adịrahụ ehile ya nyị chụ angịhyẹ nya ikolobya i-bwu ugbiyegu nya ịdịrịhụ bala angị ri alihi nya ala Isirẹlụ.

⁴Angịịwa ri angịlẹ kị rụ okolobya, kị la irya, kị jẹ ang yẹẹyẹẹ, kị ri angị ka jẹ ang hyaa, chajị kị ka chịla ọ-myị ẹrụ ẹ-ẹpwa nya adịrahụ. Achịpẹnasị ka mẹjaa jaabwọ kị ka wa bala ọ-da oja nya ịBabịlọn.

⁵Adịrahụ da ehile ya nyị ya ụma nya ang oriri bala ere ọlẹ kị kaa ya ha alẹpwa nya adịrahụ haa ẹnụ myị ẹnụ. Ị́ mẹ ang jaa ẹ-ẹpwụ nya ẹka ịta gbẹgbịlẹ lẹ, ị ka kpaa we ịlahị nya adịrahụ lẹlẹ.

⁶Angịhyẹ nya angịlẹ kị chụ rị ịDanẹlụ bala ịHananiya bala iMichẹlụ bala Asariya. Ịwa wuu bwu imwawụ nya iJuda.

⁷Olegbeju nya alụkụrwọ nya adịrahụ jwaa ẹnyị inyeewe. Ọ wụrụ ịDanẹlụ ịBẹlụtịchasa. Ọ wụrụ ịHananiya iChedịrakị. Ọ wụrụ iMichẹlụ iMechakị. Ọ wụrụ Asariya Abedinego.

⁸ỊDanẹlụ tị cheje ọ-ọkịlẹtụ nyamwụ nyọka chị ịlọmwụ ịrị lang oriri bala ere o-bwu ẹpwa nya adịrahụ ka. Ọọwa, ọ bịlẹ olegbeju nya alụkụrwọ nya adịrahụ kọ ka myị họọ kọ ka ri ang i-bwu ẹpwa nya adịrahụ kaka lẹlẹ.

⁹Ohe Oluhye họ Achịpẹnasị la olegu ọkpẹnẹ ẹ-ẹga nya ịDanẹlụ.

¹⁰Achịpẹnasị tị byi ịDanẹlụ yẹkẹẹ, “Ẹlẹwẹ lam uhi-uhi la ọhọhọ. Adịrahụ lịlọmwụ à hunọ ang ọlẹ ká ka ri bala ụma nya ere ọlẹ ká ka nwa lẹ. Ó-ri ká há ịnyịrọ lala ikolobya ịlẹ kị ri ịkpa nyang ka, ọ ka wum nwụm.”

¹¹Ọọwa, ịDanẹlụ a kele ka ẹga nya ọngọgbeji ọlẹ ka Achịpẹnasị chụ kpẹhị rịrọọ bala aligu nyamwụ ịta lẹ, ọ byọọ yẹkẹẹ,

¹²“Mahị yẹ jịra ẹẹnụtụrụ iwo gbẹgbịlẹ wẹẹ. Ju apwụ hahị ri, ká ya enyi hahị nwa kem ká yẹ wẹẹ.

¹³Á họ lẹ, à chụhị pwoku angịlẹ kị wẹẹ ri ang bwu ẹpwa nya adịrahụ ká yẹ chajị ká cheje jaabwọ ka ka họ ẹ-ẹga nyahị mẹ.”

¹⁴Ọ myị ju ịDanẹlụ lẹ, ọ wụlaa yẹ ẹ-ẹpwụ nya ẹnụtụrụ iwo chiriiri lẹlẹ.

¹⁵Ụka ká ụka pwụ, ị la ogogo bala ọ-há ẹ-ẹhị gụ angịlẹ kị wẹẹ ri ang oriri o-bwu ẹpwa nya adịrahụ.

¹⁶Bwu ẹnụmwụ ọọwa lẹ, ọngọgbeji a myị haa nyị juwa rị apwụ ọkọkọ nya ang oriri ọlẹpwa nya adịrahụ mẹ lẹlẹ.

¹⁷Ohe Oluhye ya ang ọjẹjẹ bala ụpwụ datị-datị ọjẹjẹ bala irya ọlala ha ikolobya ine ịịwa. Ọ-da ọọwa uhye ri ọ ya ọngịrị ọ-kpa ya etu nya ọyị ọyẹyẹ bala alaa dodehe ha ịDanẹlụ.

¹⁸Ụka ká ẹka ịta ịịwa họ jịra, Achịpẹnasị kpa ikolobya ịịwa wuu kịla ịNebukadịnesa.

¹⁹Adịrahụ ya ẹla taa wuu. Ụka ọọwa, ọ yẹ ká ịDanẹlụ bala ịHananiya bala iMichẹlụ bala Asariya anyị à jẹ ang kpọọ ugbodu nyii gụ angịkịla wuu. Ọọwa, ị ri alụkụrwọ ịlẹpwa nya adịrahụ lẹlẹ.

²⁰Ịtọ myị ịtọ ịlẹ ka adịrahụ-ụ́ tọ lee ẹla ọnyaanyaa ọnyị myị ọnyị kọ gba kpehe, irya ọlẹ ká angị ine ịwẹ kaa jwọọ há gụ ịnya alegino lee angị mwụ ịnwa ịlọpyị nyamwụ wuu ugbabwọ iwo.

²¹ỊDanẹlụ hị juwa ẹ-ẹpwa nya adịrahụ gbee ka ịSayịrọsị Adịrahụ ọtụka nya iPechiya kụrụ ịBabịlọn.