Read idege ỊDANẸLỤ 10 Bible Online

ỊDANẸLỤ 10 - idege bible

ỊDANẸLỤ 10

¹Ụka ọhẹ ẹ-ẹpwụ nya ẹka ọhata nya adịrahụ oriri nya ịSayịrọsị Adịrahụ nya iPechiya, ịDanẹlụ ọlẹ ká ẹnyị ọkịla nyamwụ ri ịBẹlụtịchasa yẹ ọyị ọkịla ọhẹ. Ọyị ọọwa ri ẹla nya ịlẹhị chajị nya ang ịlẹ kị juwa ka họ pyii ị-ịlahị. Ẹla nya ẹwụ ọdada bala ụka olujwo ịnyị. ỊDanẹlụ jẹ ọdawụlẹ nya ọyị ọyẹyẹ ọọwa.

²Ụka ká ọyị ọyẹyẹ ọwẹ wụrụ ham, m̀ juwa ẹ-ẹpwụ nya ida ọbaba epwihi ịta lẹpwụ-lẹpwụ.

³Ḿ ri ang-ịpyọnụ lee iyo lee ọ-nwa ere ka. Ḿ gu ida wụ ka gbee ká epwihi ịta ịịwa cheju.

⁴Ẹnụtụrụ iwo imiiye kụrụ ine nya ẹka ọọwa, m̀ godayị rịrị ọ-ọnụ nya Ihu ịTayịgirisi ọtụka.

⁵Ụka kam hu ẹhị hwaa, m̀ yẹ ọlẹng ọhẹ kọ kụrụ awụrụ nya ịpwụ ịnụnụ lugba nya okpoko ịgọm ọlahịchịng chị ọhị.

⁶Ịnyịrọ nyamwụ hụ́ lala ẹjwọ ọlịnya. Ahị nyamwụ hụ́ kpangkpang lala apya, egbahị nyamwụ wuru lala ẹlẹlẹ nya ila. Egbirabwọ bala ata nyamwụ hụ́ myịrị-myị rị lala oje ọnyọmịla. Omyi nyamwụ lala omyi nya iru nya angịnyị.

⁷Am ụbwọm a yẹ ọyị ọwẹ lẹ. Angịlẹ kị juwa tam-ḿ yẹ ịngịngịhyẹ ka, uhi ọtụka-ọtụka tị jwaa, ị rụnyẹ kaka kpịbaa.

⁸Ọọwa, m̄ hi godayị rụwa ụbwọm juwa yẹ ọyị ọlẹbyẹbyị ọwẹ lẹlẹ. Ọngịrị gụm myị, ahị nyam họ huuu, ịnyịrọ rum lẹtẹ-lẹtẹ.

⁹Ụka kam wo omyi nyamwụ, m̀ hị da ka eji la ọ-jẹ ịlọm ogu ka. M̀ nụwa yahị kụrụ eji.

¹⁰Ọọwa, ụbwọ ọhẹ a chịm wuleji lẹlẹ. M̀ tị juwa che kpakpaakpa ju ka abwọ bala arụụ lala ụrụrụ wẹẹ.

¹¹Olegu-ẹrụ ọọwa-à byim yẹkẹẹ, “ỊDanẹlụ ee, à há Ohe Oluhye lụmẹ. Wuleji ká ke ụrụ dụmwọọ la ẹla ọlẹ kam wẹẹ ka ya mẹ. Ị dum du ẹrụ tọng ịnyị.” Ụka kọ ya ẹlẹwẹ, m̀ godayị rụwa juwa che ịnyịnyị wẹẹ.

¹²Ọọwa, ọ yẹkẹẹ, “ỊDanẹlụ ee, ā ju uhi ka. Ohe Oluhye wo abwọ ọrịrị nyang bwu ẹnụ nya ọgbanyẹ-ọgbanyẹ ọlẹ ká chị eje nyọka kpa ịlọng keji ká ka la ẹla ọ-jẹ myị̀myị. Ọlẹ kam warị lẹẹ à ri ọwẹwẹ nya abwọ ọrịrị nyang ọọwa lẹ.

¹³Olegu-ẹrụ olegbeju nya ọpyị nya iPechiya tị chịm ochuchuu ẹ-ẹpwụ nya ẹnụtụrụ iwo imiiye kụrụ ookpokpo lẹpwụ-lẹpwụ. Ọọwa, ịMayịkẹlụ kọ ri ọngọhẹ ẹpwụ nya alegbeju nya alegu-ẹrụ à wẹ kaka dam ụbwọ lẹlẹ, chajị ị wum kpa nụwa ẹ-ẹga nya adịrahụ nya iPechiya.

¹⁴M warị nyọka họ ka ka jẹ ang ọlẹ kọ ka họ ẹ-ẹga nya angịnyị nyang ị-ịlahị. Ọyị ọyẹyẹ ọwẹ ri ẹla chajị nya ijuju.”

¹⁵Ụka kọ ya ẹlẹwẹ lẹ, m̄ yahị cheji chịng la o-ya ẹla bwu ọnụ kaka lẹlẹ.

¹⁶Ọọwa, olegu-ẹrụ ọlẹ kọ lala ọngịnyị ehe a nịra ụbwọ nyamwụ kpaa ka gum egbinụ lẹlẹ. M̀ byọọ yẹkẹẹ, “Ayịbam ee, ọyị ọyẹyẹ ọlẹ họ ká ịnyịrọ rum lẹtẹ-lẹtẹ lẹ. Ḿ la ukuru kaka.

¹⁷M̀ ri ọnchẹ amamadiroko ẹ-ẹga nyang. Ḿ ka jẹ-ẹ̀ godayị ya ẹla tang ka, ayịbam. Ọngịrị gụm myị, ịhụ ọdada myị ri iguma lẹ.”

¹⁸Ọọwa, ọ yụbwọ gum lẹ, m̄ ye ọngịrị nyam tịrẹkpẹ lẹlẹ.

¹⁹Ọ byim yẹkẹẹ, “À há Ohe Oluhye lụmẹ. Ā ju uhi ka! Okpunyi ā ji hang. Tụ ọkịlẹtụ weji ká la gogo mẹ!” Ahyaahị kọ ya ẹlẹwẹ kpa lẹ, m̄ la ogogo gụ ọọwa lẹ, m̄ byọọ yẹkẹẹ, “Ya ẹla ugbẹnyị mẹ, ayịbam. À họ m̄ la gogo lẹ.”

²⁰Ọọwa, ọ yẹkẹẹ, À jẹ ang odudu kam wẹ ẹga nyang-ńg? M̀ juwa ka kele kaka ma uya ta olegu-ẹrụ olegbeju nya ọpyị nya iPechiya ahyaahị. Ụka kam kụrwọọ kpá, olegu-ẹrụ olegbeju nya ọpyị nya iGirisi ka wẹ luya nyamwụ.

²¹Ene nya ọọwa tị lẹ, m̀ ka ya jeng ang ọlẹ kị da ju ụ-Ụpwụ nya Ẹla nya Ịlẹhị. À tị́ jẹ lẹ, ọngọhẹ-ẹ́ẹ̀ dam ụbwọ ẹ-ẹpwụ nya uya ọ-ma ta alẹgu-ẹrụ alegbeju ịwẹ ka, kẹnẹ-kẹnẹ ịMayịkẹlụ olegu-ẹrụ olegbeju nya ala Isirẹlụ mẹ ịnyị.