Read idege ỊDANẸLỤ 11 Bible Online

ỊDANẸLỤ 11 - idege bible

ỊDANẸLỤ 11

¹Bwu ẹpwụ nya ẹka nya ọgbanyẹ nya adịrahụ oriri nya ịDarịyọsị ọla iMidi, m̀ godayị giri-giri kaa tụkụ yọọ bala ọchẹwụ kọọ.

²Ẹla ọlẹ kam wẹẹ ka ya jeng ri ẹla nya ịlẹhị. Olegu-ẹrụ yẹkẹẹ, “Ịdịrịhụ ịta ịkịla ka wẹ ka kpẹhị rịrị iPechiya wẹẹ. Adịrahụ ohene ka ye iwe nya ịkịla ịwẹ ku, ọwa tị ka kpụ ụdụ gụ ịdịrịhụ ịkịla wuu. Ụka kọ la ọngịrị bala ọ-kpụ nya ụdụ chakụ-chakụ lẹ, ọ ka du ọng myị ọng ju kọ ka wuleji bá ẹla ta alọpyị nya iGirisi lẹlẹ.

³“Ọọwa, adịrahụ ọtụka ọhẹ à tị ka kpehe gẹgịlẹ lẹlẹ. Ọpyị nyamwụ ka lụmẹ, ang myị ang kọ họọ ọ ka họ lẹ.

⁴Ụka ká ọngịrị nyamwụ juwa nwa kịlahị-ịlahị, ọpyị nyamwụ ka chị ebwo ine hi awụlẹ. Ịdịrịhụ ine ịlẹ kị kpẹhị rịrị ẹpwụma ịịwa-á tị ka ri anyị ịtụma nyamwụ ka. Ịwa-á tị ka la ụma nya ọngịrị ọlẹ kọọwa la myị ka. Ọpyị nyamwụ ka yẹ ka ri nya angịkịla.

⁵“Ụka ọọwa, adịrahụ nya ala Ijipiti kọ ri ọpyị ọlẹtẹ ka la ọngịrị. Olegbeju nya angịdẹwụ nyamwụ ọhẹ tị la ọngịrị gwọọ wẹẹ. Ọngọọwa ka ri adịrahụ nya ẹpwụma ọlẹ kọ ka ri ọtụka gụ ịnyamwụ.

⁶Ụka ká ẹka ịhyẹ-ẹ́ chịpwụrụ kpá, adịrahụ nya Ijipiti ka nwa iro bala adịrahụ nya ọpyị ọlẹtẹ kọ ri iSiriya, ọ ka ya ọnyị nyamwụ ha adịrahụ nya iSiriya ye. Owolawụlẹ nyaa ọwẹ-ẹ́ tị ka godayị tata ka. Ọwa bala ọnyị nyamwụ tụ ọrụmwụ bala anchẹ ịlẹ kị kpọọ chị wuu ka kpụ ịlọgọ, ị ka taa kịnyaa.

⁷Ọ́ nọ chẹẹ, ọngọhẹ lẹpwụ nya aanamwụ ka ri adịrahụ nya Ijipiti. Ọ ka mwẹla ta angịdẹwụ nya adịrahụ nya iSiriya, jụ ka ube ọnyọọngịrị nyaa, kụrwaa chẹẹchẹẹ.

⁸Ọ ka go ekpeku nya ijiga bala ịja ịnyịịla-ịnyịịla nya okpoko ịgọm bala okpoko onyoowuru nyaa kpa rụ ka Ijipiti. Ọ tị ka nọ tata chẹẹ ene kọ ka tịrẹkpẹ kaka mwẹla ta adịrahụ nya iSiriya myịmyị.

⁹Ọọwa, adịrahụ nya iSiriya à tị ka kele ka be ala Ijipiti ẹpwa lẹlẹ. Ị tị ka kwọọ lagbụrụ tịrẹkpẹ rụ ka ọpyị nyamwụ.

¹⁰“Anyị alẹng nya adịrahụ nya ala iSiriya ka nwụlanọ nya ẹwụ. Ị ka tụ iru nya angịdẹwụ guru, pá tuuu lala enyi ọmyị̀myị yahị da kele kaka pwụ epweji ọnyọọngịrị nya oluji nyaa.

¹¹Ụka ọọwa, agbama nya adịrahụ nya ala Ijipiti ka kpọọ wuleji nya ẹwụ yahị da adịrahụ nya iSiriya. Ọ ka kụrụ iru nya angịdẹwụ nya ala iSiriya ịịwa wuu.

¹²Ọ ka hi ọbọọchẹ chajị nya ọkụru-kụrụ nyamwụ bala alẹwụ ịlẹ kọ nwụ wuu. Ọ́ tị ka la ọkụrụ-kụrụ ịịwẹ kịlahị pyịyọọ ka.

¹³“Adịrahụ nya ala iSiriya ka tịrẹkpẹ ka tụ angịdẹwụ dala awụlẹ ju iru gụ olene. Ẹka ịmanyị-ịmanyị-ị́ kam kpá, ọ ka tịrẹkpẹ liru nya angịdẹwụ ịịwa lang-abwọ nya ẹwụ yẹẹyẹẹ.

¹⁴Ụka ọọwa, angịnyị lụmẹ-lụmẹ ka la egbeju-ọngịrị ta adịrahụ nya ala Ijipiti. Alabwẹga i-bwu ẹpwụma nyang ahụ ịDanẹlụ ka la egbeju-ọngịrị ịnyịnyị ká ọyị ọyẹyẹ ọwẹ ka họ jịra. Ị́ tị ka chọọ jụ myị ka.

¹⁵Ọọwa, angịdẹwụ nya adịrahụ nya ala iSiriya-à ka kele kaka chị urwe ju epweji ọnyọọngịrị ọhẹ gbee kị ka kụrwọọ lẹlẹ. Ụka ọwẹ, angịdẹwụ nya Ijipiti-í ka kụ ụwa juwa dẹwụ myị ka. Angịdẹwụ ịlahịchịng nyaa-á dọmwụ ka la gogo kụ ụwa myị ka ịnyịnyị.

¹⁶Adịrahụ nya iSiriya ka juwa be ẹpwụma ẹpwa ịnyịnyịịnyị la ọngọngọhẹ ọ-chọọ dee ka. Ọ dọmwụ ka jẹ gbee kaka godayị ọ-ọpyị ọnyịịla nya ala Isirẹlụ nyọka tọọ ayịreji.

¹⁷Adịrahụ nya iSiriya ka me obyi nyọka warị lọngịrị nya ịpyị nyamwụ wuu kọ ka la owolawụlẹ bala adịrahụ nya Ijipiti. Ọ ka hu ọnyị nyamwụ ha adịrahụ nya Ijipiti ye, chajị kọ ka kpa iwe-ahụrụ ọọwa gu ọpyị nya Ijipiti cheji. Obyi omeme ọwẹ-ẹ́ tị ka chịkpẹẹ myị ka.

¹⁸Ọwẹ-ẹ́ myị kpá, ọ ka jahị kpata da nyọka mwẹla ta ẹpwụma ịlọnụ-enyi. Ọ ka kụrụ ịhyẹ nyaa lụmẹ-lụmẹ. Olegbeju nya angịdẹwụ bwu ọpyị ọkịla tị ka kụrwọọ, da ọbọọchẹ ohihi nyamwụ ọwẹ ẹkpa chọpyị. Ahị ohihi nyamwụ ka yẹ ri oyoyi ha ịlọmwụ.

¹⁹Adịrahụ ka nyà tịrẹkpẹ ka epweji ịnyịịngịrị ịlọpyị nya ịlọmwụ, ị tị ka kụrwọọ ụ-ụgbẹyị. Ọngọngọhẹ-ẹ́ tụtụm ka yọọ ẹ-ẹhị gụ ọọwa kaka.

²⁰“Ọngọ ka ri adịrahụ ẹ-ẹkpẹ nyamwụ ka du ọlụkụrwọ ka ka nyẹ angịnyị ẹpwa chajị ka ọpyị nyamwụ ka kpụ ụdụ gụ ọọwa. Lụka okpii, ị ka nwụ adịrahụ ọọwa, u-ugbọdọda lee ẹ-ẹwụ ị tị ka nwọọ ka.”

²¹Adịrahụ ọkịla nya ala iSiriya ka ri ọngịnyị onyobyi ọlẹ kọ pwoku nyọka ri adịrahụ ka, ọ tị ka warị lọkpahị ju-ka kaka ye ọngịrị bwula ịjẹhị.

²²Ọ ka ta iru nya alẹwụ lụmẹ-lụmẹ ayịreji. Ọ dọmwụ ka ku Olegbeju Okiliya nya Ohe Oluhye hi ụkụrwọ.

²³Ọ ri nya ịlẹhị ọ ri adịrahụ nya ẹpwụma ochiche-ochiche, ọ tị ka kpa ụgbaa ọdada la owolawụlẹ bala alụma ịkịla lẹ, ọ ka juwa nwa ẹ-ẹpwụ nya ọngịrị ọlala lẹlẹ.

²⁴Ọ ka be imwawụ ịkpụdụ ẹpwa lọkpahị ju-ka. Ọ ka họ ang ịlẹ ká adamwụ igogo anyị-ị́ họhọ ka. Ọ ya ang-alụdụ ịlẹ kọ go bwu ẹwụ gịla angị bọọ jẹ. Ọ ka chụmakụ nyọka be epweji ịnyịịngịrị ẹpwa ịnyịnyị, ọ́ tị ka tata ene ká ụka nyamwụ ka myị ka.

²⁵Ọ ka ngịrakpii tụ iru nya angịdẹwụ dala awụlẹ nyọka bá ẹla ta adịrahụ nya ala Ijipiti. Adịrahụ nya Ijipiti tịtị ka nwụla ịlọmwụ nọ gbọọ liru nya angịdẹwụ ị-la ọngịrị gụ ịnyamwụ. Adịrahụ nya Ijipiti-í tị ka kụrụ myị ka chajị ị ka pịrọọ ju.

²⁶Alọdọda nyamwụ mịlẹ-mịlẹ à ka kpa ayịreji ọtata wọọ lẹ. Ị ka kụrụ angịdẹwụ nyamwụ. Ị ka nwụ iru nyaa.

²⁷Ịdịrịhụ imiiye ịwẹ ka hụhụ lawụlẹ me ẹla lirya onyobyi ẹ-ẹpwụ. Ị ka kpa ọnọọkịla me ju awụlẹ. Irya ịlẹ kịị me ju awụlẹ-ẹ́ tị ka jụ ẹlẹlẹhẹ họ ka, chajị ụka ọlẹ ká Ohe Oluhye hunọ-ọ́ họ lẹka.

²⁸Adịrahụ nya ala iSiriya ka nyà wẹ ẹpwa lang-ụdụ ọtụka lụmẹ-lụmẹ. Ụka kọ ka jẹ nyà ọ ka yahị da ịgba ọgbagba nya angịnyị nya Ohe Oluhye. Ọ ka bịrị ang lụmẹ-lụmẹ ene kọ ka rụ ka ọpyị nyamwụ.

²⁹Ụka kọ tị nọ chẹẹ, ọ ka myịmyị-ị̀ wẹ kaka be Ijipiti ẹpwa. Ọlugbẹnyị tị ka datị hi ọlụka nya ọgbanyẹ.

³⁰Ala iRom ka ju agbọ nya enyi warị kaka mwẹla tọọ. Uhi ka jwọọ, ọ ka wa wii. Ọ tị ka kpa agbama nya ọọwa ji kpata maga nyọka bịrị ịgba ọgbagba nya angịnyị nya Ohe Oluhye. Ọ ka la ọkịlẹtụ ọkpẹnẹ ẹ-ẹga nya angị kaa gbịgba ha Ohe Oluhye kpẹẹkpẹẹ ka.

³¹Angịdẹwụ nyamwụ ka chị Ube nya Amkpaa ịrị. Ị ka tụ iya ọkịlaakịla ọlẹnụ myị ẹnụ ku. Ọọwa, ị ka ya ang-ibyi ọtụka rịrị ụ-ụwa lẹlẹ.

³²Ọ kpa angị yụbwọ lẹla nya Ohe Oluhye beji hu utungguru, mwaa ju kị ka myị ẹla jwọọ. Angịlẹ kị tị ba Ohe Oluhye jẹ ka yagba weji mwẹla tọọ.

³³Angịlẹ kị jẹ ẹla ka mẹ ang jẹ angịnyị lụmẹ-lụmẹ. Ọ́ tị nọ chẹẹ ị ka nwụ angịhyẹ nya angịmẹjẹ ịwẹ ẹ-ẹwụ lee ọ-chaa ila. Ị ka nu angịkịla ang wuu, gyaa kpa kaka ju agba.

³⁴Ụka nya akama ịwẹ wuu, angịnyị nya Ohe Oluhye ka ye ụbwọ ọdada pyịnyẹng. Iru nya angị ka myị-ị̀ yẹjulaa tị ka họ nya ihwirihwa kem.

³⁵Ị ka nwụ angịhyẹ nya angị jẹla ịwẹ. Ụgbẹyị ọọwa tị ka du ká angịnyị ka la charị-charị gbee ka ụka ohyẹẹkpẹ ọlẹ ká Ohe Oluhye hunọ ka pwụ eji.

³⁶Adịrahụ nya iSiriya ka họ jaabwọ kọ họọ. Ọ ka hu ịlọmwụ hwaa juwa ya ọwa nyị gụ ojiga ọnyị myị ọnyị tụ Ohe Oluhye ọgụgụ wuu. Ọ ka kịnyaa la ọhọhọ ọwẹ gbee da ka ụka nya agbama ka cheju. Ohe Oluhye ka họ ang ọlẹ kọ nwụlanọ nyọka họhọ pyii.

³⁷Adịrahụ ka yẹhị da ijiga ịlẹ ká adamwụ igogo anyị kaa kpụ́ tụ ojiga ọlẹ kọọ há anyang. Ọ ka yẹhị da ojiga ọnyị myị ọnyị bwee, hu ịlọmwụ hwaa nyori ọwa nyị gwaa wuu.

³⁸Ọkọkọ nya ọọwa, ọ ka kpụ eteji ha ojiga o-gbe epweji. Ọ ya okpoko ịgọm bala okpoko onyoowuru bala ajwọ ịnyịịla-ịnyịịla bala ang-ahị ịlịnya-lịnya ha ọhaha ha ojiga ọlẹ ká adamwụ igogo anyị-ị́ kpụ ẹnẹnẹhẹ lẹka.

³⁹Ọ ka kpa ọngịrị nya ojiga ọngga ọwẹ mwẹla ta epweji ịtụka. Ọ ka chị ihi ju angị myị yọọ nya adịrahụ nyaa. Ọ ka gyaa hụ i-iwe-ahụrụ ịgbẹgbịlẹ bala o-be ọpyị haa nya uri oyeye nyaa.

⁴⁰“Ụka ká ụka ohyẹẹkpẹ pwụ, adịrahụ nya Ijipiti ka mwẹla ta adịrahụ nya iSiriya. Adịrahụ nya iSiriya tịtị ka yagba weji mwẹla tọọ lọngịrị nyamwụ wuu. Ọ ka kpa ang ịrụnyẹ bala anyịrẹ bala agbọ nya enyi. Ọ ka be alọpyị datị-datị ẹpwa lala enyi ọmyị̀myị.

⁴¹Ọ ka be ọpyị ọnyịịla nya ala Isirẹlụ ẹpwa ịnyịnyị. Ọ ka nwụ iru nya ụnụnụụnọ nya angịnyị. Ọ ka ta ẹpwụma lụmẹ-lụmẹ ayịreji. Ọpyị nya Ẹdọm bala iMowabụ bala ẹga ohihi nya Amọn tị ka be bwu ụbwọ nyamwụ myị.

⁴²Ọ ka kụrụ ẹpwụma lụmẹ-lụmẹ. Ijipiti-í ka be myị ka.

⁴³Ọ ka ye okpoko ịgọm bala okpoko onyoowuru bala ụdụ nya ala Ijipiti jubwọ. Ọ ka kụrụ ala iLibya bala ala Itiyopyiya.

⁴⁴Ụka ọọwa, oja o-bwu ọmwẹnụ-ụtụrụ bala ẹtẹ ọlẹ kọ ka wo tị ka chị uhi jwọọ. Ọọwa, ọ ka kpa agbama ọtụka-ọtụka dẹwụ jẹkpẹ da jahị da, juwa nwụ iru nya angịnyị lẹlẹ.

⁴⁵Ọ ka chịkụ, ya ẹpwang nya ọdụ nya adịrahụ oriri nyamwụ yeji apewa nya Ihu nya iMeditareniya bala Ọgbọdọ nya ịSayọn. Ọọwa, ọ ka ta ayịreji lẹlẹ. Ọngọngọhẹ-ẹ́ tị ka juwa dọọ ụbwọ myị ka.”