Read idege ỊDANẸLỤ 12 Bible Online

ỊDANẸLỤ 12 - idege bible

ỊDANẸLỤ 12

¹Ọọwa, olegu-ẹrụ ọlẹ kọ kụrụ awụrụ nya ịpwụ ịnụnụ à yẹkẹẹ, “Ụka ọọwa, ịMayịkẹlụ olegu-ẹrụ ọtụka ọngọlẹ kọọ gbe alịnyanụ ka hyeehe gẹgịlẹ. Ụka ọọwa ka ri ụka nya uhila nya akama. Ụma nya akama ọlịnyị-ị́ ji ẹnẹnẹhẹ mwiiji nyọlẹ ká angịnyị dọmwụ nya ọ-nọ ẹpwa ẹpwụma-ẹpwụma lẹka. Ụka ọwẹ tị lẹ, ọng myị ọng nya alịnyanụ kị da ẹnyị nyamwụ ụ-ụpwụ nya Ohe Oluhye lẹ aalẹ, ọngọọwụ ka chịda.

²Iru nya angịnyị ịlẹ kị gbu kpá ene-ene ka wuleji juwa hịhị myịmyị. Angịhyẹ nya ka la ọhịhị ọmyịmyị-ka, angịkịla ka ju ka ẹpwụ nya oyoyi o-gbe oyi myị oyi.

³Angịlẹ kị jẹ ẹla wuu ka hụ́ lala ahịgboo nya uhye-ọgba. Ọng myị ọlẹ kọ tị mẹ ụgbẹyị nya ang ọnyịịla ọhọhọ jẹ angịkịla ka hụ́ lala ịdịchụ gbe oyi myị oyi.”

⁴Ọ byim yẹkẹẹ, “ỊDanẹlụ ee, tụ ụpwụ ọwẹ ku ká kpụ ẹla ọlụwa ịbaa gbee ka pwụ ụka ká odehe ka myị mẹ. Angịnyị lụmẹ-lụmẹ ka juwa jẹ kam ka ale nyọka jẹ ang gụ ọọwa.”

⁵Ọọwa, m̄ yẹ alẹng angị imiiye ịkịla lẹlẹ. Ọngọhẹ godayị rịrị ọ-ọnụụka nya ihu ka oye ọlaanyị. Ọngọkịla godayị ọ-ọnụụka oloye ọlẹ.

⁶Ọngọhẹ nyaa to olegu-ẹrụ ọlẹ kọ kụrụ awụrụ nya ịpwụ ịnụnụ kọ godayị ka oye oluhye nya ogo wo yẹkẹẹ, “Anyị ọ tị ka tata ka ba ene ká ang ịlẹbyẹbyị ịwẹ ka họ jira-āà?”

⁷Olegu-ẹrụ ọọwa-à kpa abwiye-abwiye ka uhye lẹ, ọ ya ẹla liro ọnwanwa lẹnyị nya Ohe Oluhye ọhịhị gbe oyi myị oyi yẹkẹẹ, “Ọ ka gu ẹka ịta ba ẹhya ene. Ụka ká ọtụpyịpyị nya angịnyị nya Ohe Oluhye ka cheju kpá, ang ịwẹ wuu ka họ chọnụ lẹ.”

⁸M̀ wo ẹla ọlẹ kọ ya kpá, ḿ tị jẹ ọdawụlẹ nyamwụ ka. Ọọwa, m̄ tọọ wo yẹkẹẹ, “Ayịbam ee, ụgbẹyị ọlanyị ẹlẹwẹ à tị́ ka bwu cheju?”

⁹Ọ wẹ yẹkẹẹ, “Rụ nya ọlẹẹlẹẹ mẹ, ịDanẹlụ, chajị ala ịwẹ ri ịlẹ kị ka tụ ang kụrụ kpịrẹ-kpịrẹ gbee pwụ ụka ohyẹẹkpẹ

¹⁰Ị ka hụ́ angịnyị lụmẹ-lụmẹ cheri-cheri. Angị ri angịnyị inyibyi-í tị ka jẹ ka. Ị ka kịnyaa lang onyobyi ọhọhọ. Angị jẹ ẹla kẹnẹ-kẹnẹ à ka jẹ etu nya ẹlẹwẹ lẹ.

¹¹“Bwu ụka ọlẹ kị tụ iya ọkịlaakịla ọlẹnụ myị ẹnụ ku ọlẹ kọ ri ụka kị hu ang-ibyi ọtụka yeji, ẹnụtụrụ ụnọ ookpokpo da ohu imiiye da iwo ihikichu (1,290) ka chịpwụrụ ene.

¹²Angịlẹ wuu kị ka godayị kpọọọ gbee ká ẹnụtụrụ ụnọ ookpokpo da ohu ịta da iwo ịta kụrụ ịrụ (1,335) ka cheju, angịịwa ka pyẹ̀ẹẹ.

¹³“ỊDanẹlụ ee, aa godayị kpẹẹkpẹẹ gbee pwụ ọbaba mẹ. À ka gbu. Ụka ká ụka ohyẹẹkpẹ tị pwụ eji, à ka wuleji kaka ye uri nyang ọlẹ kị chị nọ hang.”