Read idege ỊDANẸLỤ 2 Bible Online

ỊDANẸLỤ 2 - idege bible

ỊDANẸLỤ 2

¹INebukadinesa la ụlaa ọhẹ ẹ-ẹpwụ nya ẹka oheeye nya adịrahụ oriri nyamwụ. Ụlaa ọọwa bịrọọ ọkịlẹtụ lụmẹ gbee kọ nune myị ka.

²Ọọwa, ọ du ẹrụ ta alọmwụ bala angị mwụ ịnwa bala alegino bala alahwa nyamwụ kị ka wụlẹ ụlaa ọọwa dodehe họọ lẹlẹ. Ụka kị wẹ kaka godayị ịlahị nya adịrahụ,

³ọ byaa yẹkẹẹ, “M̀ la ụlaa ọhẹ ọlẹ kọ bịrịm ọkịlẹtụ lụmẹ. M tịtọ kam ka jẹ etu nyamwụ.”

⁴Ị wẹ adịrahụ loja nya Arameyiki[1] yẹkẹẹ, “Agaba Idu, à ka hịhị pwụ ụka myị ụka! Wa ụlaa nyang jehi mẹ, ahị ka wụlẹ etu nyanwụdodehe hang.”

⁵Adịrahụ byaa yẹkẹẹ, “M cheje ọ-ọkịlẹtụ nyam nyori anụ ka wa ụlaa bala o-ya etu nyamwụ jem pyii lẹ. Ó-ri kanụ jụ ụlaa ọwẹ wa jem ka aalẹ, m ka ya kị ka wọnụ pẹtẹ-pẹtẹ bala ọ-ta ẹpwa nyanụ ayịreji.

⁶Ó tị ri kanụ jụ ụlaa ọwẹ wa bala o-ya etu nyamwụ jem aalẹ, m ka ya ang-ahị ihi ọtụka-ọtụka hanụ. Lẹẹlẹ, anụ wa ụlaa ọọwa jem bala etu nyamwụ mẹ.”

⁷Ị wẹ byi adịrahụ yẹkẹẹ, “Agaba Idu ee, ó-ri ká wa ụlaa ọọwa jehi, ahị ka dọọ wụlẹ.”

⁸Adịrahụ a wẹ yẹkẹẹ, “Ẹhẹẹ, anụ juwa kpa ijẹẹhị ya ụka da ịlọnụ, chajị nyọlẹ kanụ jẹ am nyị cheje

⁹nyọka yẹnụ ụma nya akama ookpokpo ó-ri kanụ wa ụlaa ọwẹ jem ka. Anụ kọ ju awụlẹ nyọka me ịnịịkịla jem, chajị anụ me irya nyori ọ́ nọ chẹẹ ang ka yẹda. Ánụ ya wa ụlaa ọọwa jem lẹ, m̀ ka jẹ kanụ ka jẹ etu nyamwụ ya jem ịnyịnyị lẹ.”

¹⁰Angị ju adịrahụ irya ịwẹ à wẹ yẹkẹẹ, “Ọngọngọhẹ-ẹ́ jam odehe ọlẹ kọ ka ya jeng ahụ Agaba Idu ang ọlẹ ka wẹẹ tịtọ ká ka jẹ ka. Adịrahụ ọhẹ-lọhẹ ọtụka bala ọ-la ọngịrị ọhẹ-ẹ́ byi alegino bala angị mwụ ịnwa bala alahwa nyamwụ nyị ya ẹla ọlịịwẹ je ọwa ẹnẹnẹhẹ lẹka.

¹¹Ang ọlẹ kahụ adịrahụ tịtọ-ọ̀ wẹ lujwo lụmẹ. Ọngọhẹ á ka jwọọ họ myị ka kẹnẹ-kẹnẹ ihye mẹ ịnyị, ị́ tị kụ ẹpwa ta angịnyị ehe ka.”

¹²Ẹla ọwẹwẹ nyaa ọwẹ du agbama ọtụka-ọtụka ju adịrahụ lẹ, ọ da ehile ya nyị nwụ angị kaa ju adịrahụ irya ịla ịBabịlọn wuu mẹ lẹlẹ.

¹³Ọọwa, ị da ehile ọọwa kpehe nyọka nwaa wuu tu ỊDanẹlụ bala aligu nyamwụ lẹlẹ.

¹⁴Ụka ká Arịyọkụ, olegbeju nya angị gbe adịrahụ kpehe nyọka nwụ angịị ju adịrahụ irya, ịDanẹlụ ya ẹla tọ lẹla ọjẹjẹ bala irya.

¹⁵ỊDanẹlụ tọ Ariyọkụ wo ang odudu ká adịrahụ da ehile ọnyọọngịri ọlịnyị. Arịyọkụ a ya jẹ ịDanẹlụ ang odudu lẹlẹ.

¹⁶ỊDanẹlụ kele ka ẹga nya adịrahụ ahyaahị kaka ye ọda kị ka ya ụka da họọ gu ọọwa, chajị kọ ka ya jè adịrahụ etu nya ụlaa ọlẹ kọ la.

¹⁷Ọọwa, ịDanẹlụ a rụ ka ẹpwa lẹ, ọ tịrọnụ nya ẹlẹwẹ je ịHananiya bala iMichẹlụ bala Asariya aligu nyamwụ lẹlẹ.

¹⁸Ọ byaa nyị raabwọ ha Ohe Oluhye olepwoohe kọ ka yaa ahyẹẹrwẹrwa bwula ọ-da ụlaa ọọwa wụlẹ haa, chajị kị ka nwọọ bala aligu nyamwụ jula angị ju adịrahụ irya ịkịla ịla ịBabịlọn kaka mẹ.

¹⁹Lodu nya ẹnẹwẹ, Ohe Oluhye chị ụlaa ọọwa ehe mẹjẹ ịDanẹlụ a-arụrụ lẹ, ọ gwogbo ha Ohe Oluhye nya epwoohe yẹkẹẹ:

²⁰“Anụ gwogbo ha Ohe Oluhye gbe oyi myị oyi, ọ ri ọngọ la ọngịrị bala ẹla ọjẹjẹ.

²¹Ọwa-à kpa ụka nya ang myị ang ụ-ụbwọ lẹ, ọwa-à kaa hu ịdịrịhụ lẹ, ọwa-à ka pwọ ịdịrịhụ ọmwụ cheji lẹ. Ọwa-a kaa ya ẹla ọjẹjẹ bala ang ọjẹjẹ ha angịnyị lẹ.

²²Ọọ chị ang ịkpịbaa ikpori-kpori ehe, ọ jẹ ang ọlẹpwụ nya ukpowụ, ahịgboo dagaga jwọọ.

²³Ohe Oluhye nya adam igogo ee, M̀ jing obe bala o-gwogbo hang, chajị ahụ à ya ẹla ọjẹjẹ bala ọngịrị ham lẹ. À chị ehe mẹjẹm ang ọlẹ kahị bịlẹng, à mẹjẹẹhị ẹla ọlẹ kahị ka ya je adịrahụ lẹ.”

²⁴Ọọwa, ịDanẹlụ à ka ẹga nya Ariyọkụ olegbeju ọlẹ ka adịrahụ ya ọngịrị ha nyọka nwụ angị ju adịrahụ irya lẹlẹ. Ọ byọọ yẹkẹẹ, “Ā nwaa kaka. Kpam ka ẹga nya adịrahụ mẹ, m̀ ka ya ụlaa nyamwụ jọọ lẹ.”

²⁵Ahyaahị lẹ, Ariyọkụ a kpa ịDanẹlụ ka ẹga nya iNebukadinesa Adịrahụ lẹ, ọ byọọ yẹkẹẹ, “Agaba Idu, m̀ ye ọngọhẹ bwu ẹpwụ nya ala Juu ịlagba ọlẹ kọ ka bwuru etu nya ụlaa nyang jeng myị lẹ.”

²⁶Adịrahụ to ịDanẹlụ, ká ẹnyị ọkịla nyamwụ ri ịBẹlụtịchasa wo yẹkẹẹ, “Ọọwa ri à ka ya jẹm ụlaa ọlẹ kam la bala o-ya etu nyamwụ jem myị-ị̄ị́?”

²⁷ỊDanẹlụ wẹ byọọ yẹkẹẹ, “Agaba Idu ee, ọngọ mwụ ịnwa lee olugono lee ọngọ jẹ ang chajị nya ịdịchụ ọhẹ-ẹ́ ji kọ ka jẹ-ẹ̀ ya ẹlẹwẹ ká adịrahụ tịtọ-ọ̀ wẹ jọọ myị ka.

²⁸Ohe Oluhye tị juwa e-epwoohe ọlẹ kọ kaa da ang ịkpịbaa wụlẹ. Ọwa-à ya ang ịlẹ kị wẹẹ ka họ ị-ịlahị jeng ahụ adịrahụ-ụ̀ wẹ lẹ. M̀ jam ka ya jeng ụlaa ọlẹ ká la bala ọyị ọlẹ ká yẹ a-arụrụ ụka ká juwa kpa une nọ lẹ.

²⁹“Ụka ká juwa kpa une nọ, à la ụlaa chajị nya ang ilijuju. Ohe Oluhye ọlẹ kọọ chị ang ịkpịbaa ehe mẹjẹng ang ịlẹ kị juwa ka họ ị-ịlahị.

³⁰Aajị nyori m̀ jẹ ẹla gụ ọngọkịla ọhẹ-lọhẹ à du kam jẹ etu nya ụlaa nyang ọlẹ koo. Ang odudu ri Ohe Oluhye tịtọ ká ka jẹ etu nya ụlaa nyang bala ọ-ka jẹ irya ịlẹ kị wẹpwụ hang lụka ọọwa.

³¹“Agaba Idu ee, ẹpwụ nya ụlaa nyang a yẹ ukpeku ọtụka ọhẹ ị-ịlahị nyang. Ọ pwo kpangkpang, hụ́ myịra-myịra. Ọ la uhi-uhi lọyẹyẹ.

³²Ị me egbeju nyamwụ lokpoko ịgọm ọlahịchịng. Ị me ọkịlẹtụ bala egbịrabwọ nyamwụ lokpoko onyoowuru. Ị họ ọhị bala ákụ nyamwụ lokpoko ọnyọmịla.

³³Ata nyamwụ ri ije-ije. Apatẹ nyamwụ tị ri ije ẹ-ẹgẹhẹ, ị ri ume ẹ-ẹga ịkịla.

³⁴Ụka ká juwa yọọ lẹ, ẹjwọ ọhẹ a rị bwu ọgbọdọ la ọngọngọhẹ ọ-ya ụbwọ gwọọ ka, kaka be ukpeku ọwẹ ene yịgẹ-yịgẹ lẹlẹ.

³⁵Ahyaahị, oje bala ume bala okpoko ọnyọmịla bala okpoko ịgọm bala okpoko onyoowuru ịlẹ kị kpa họ ukpeku ọwẹ à kpọrụ pwụrẹ-pwụrẹ lala ewoo nya ang ịlẹ kịị hịrị lẹ, igbachịwụ à daa hụrụ la o-hi ụpịlẹ ọhẹ-lọhẹ kaka lẹlẹ. Ẹjwọ ọlẹ kọ chabwọ kaka mịla ukpeku ọwẹ tị yẹ kaka rị ọgbọdọ ọtụka-ọtụka kaǹgkụụ ọlẹ kọ pyẹ myị odehe ọlẹ wuu.

³⁶“Agaba Idu ee, ụlaa ọlẹ ká la à wẹ lẹ. M̀ jam ka ya etu nyamwụ jeng ugbẹnyị lẹ.

³⁷Agaba Idu ee, ahụ a ri adịrahụ ọtụka gụ ịdịrịhụ wuu lẹ. Ohe Oluhye olepwoohe hung adịrahụ ọtụka. Ọ ya ụmụmẹ bala ọngịrị bala ihi ọlala hang.

³⁸Ọ họ ká ri olegbeju nya ẹga myị ẹga nya odehe ká angịnyị-ị kụ. À ri olegbeju nya iyo bala ịchịnụ wuu. Ahụ à ri egbeju ọlẹ kị kpa okpoko ịgọm họ lẹ.

³⁹Ụka ká ụka nyang á myị, ẹpwụma ọkịla ọhẹ ka ye iwe ku, ọ́ tị ka la ọngịrị ọlala ịnyang myị ka. Ẹpwụma ọọwa-á kam kpá, ọhata ka wẹ ọlẹ kọ ku ọmwakpa nya oje ọnyọmịla. Ọwa ka ri olegbeju nya odehe wuu.

⁴⁰Ụka ohyẹẹkpẹ, ẹpwụma ohene ọlẹ kọ la ọngịrị lala oje ọlẹ kọọ be ang myị ang ene ka ye iwe ku. Jaabwọ ká oje kaa be ang myị ang ene, ịnyịnyị-ịnyịnyị ẹpwụma ọwẹ à ka du ẹpwụma ilene abwọ yịgẹ-yịgẹ lẹ.

⁴¹À yẹ nyori ẹgẹhẹ nya apatẹ bala achụụ nyamwụ ri oje-oje, ẹga ịkịla ri ume-ume. Ọọwa ri ẹpwụma ọọwa ka chị ebwo hi awụlẹ. Ọ tị hi ọngịrị ọlala ịnya oje kpa, chajị nyọlẹ ká oje kpịla la ụmẹ.

⁴²Jaabwọ kị kpa oje họ ẹgẹhẹ nya achụụ nyamwụ ká ẹga ọkịla ri ume lẹ, ụpa ọhẹ nya ẹpwụma ọọwa ka la ọngịrị, ụpa nyamwụ ọkịla ka la dẹwụ-dẹwụ.

⁴³A yẹ ịnyịnyị kị ya oje bala ume kpịla lawụlẹ. Ọwẹ rị alegbeju nya ẹpwụma ọwẹ ka maga kị ka yẹ ju lawụlẹ bwula awụlẹ oyeye. Ọ́ tị ka chaa kpẹẹ ka jaabwọ ká oje bala ume-é ka jẹ-ẹ̀ yi ju lawụlẹ ka.

⁴⁴Ụka nya ịdịrịhụ ịwẹ, Ohe Oluhye olepwoohe ka ya ẹpwụma ọhẹ yeji ọlẹ kọ ka juwa pyịyọọ. Ị́ ka kụrwọọ myị ka. Ọwa tị ka ta ẹpwụma ịkịla ịwẹ wuu ayịreji lẹ, ọ ka godayị rịrị gbe oyi myị oyi lẹlẹ.

⁴⁵A yẹ ká ẹjwọ rị bwu ọgbọdọ ká ọngọhẹ-ẹ́ tị yụbwọ gwọọ ka bala jaabwọ kọ be ukpeku ọwẹ kị họ loje bala oje ọnyọmịla bala ume bala okpoko onyoowuru bala okpoko ịgọm ene. Ohe Oluhye ọtụka à ya jeng ahụ adịrahụ ang ịlẹ kị ka họ ị-ịlahị-ị̀ wẹ lẹ. M̀ tị ya jeng ụlaa ọlẹ ka la bala jaabwọ ká etu nyamwụ ri kpangga lẹ.”

⁴⁶Ọọwa, iNebukedinesa Adịrahụ à hirikpẹẹ ha ịDanẹlụ lẹ, ọ ya nyị kele kaka kịla iya bala ọ-kpa ọhaha kịla ịDanẹlụ mẹ lẹlẹ.

⁴⁷Adịrahụ à yẹkẹẹ, “Ohe Oluhye nyang à gụ ijiga wuu lẹ. Ọwa-à ri Ọngọlahị nya ịdịrịhụ wuu bala o-ri ọngọ kaa chị ang ịkpịba ehe lẹ. M̀ jẹ ịnyị, chajị à jụ ang ọkpịbaa ọlẹ ya dodehe myị lẹ.”

⁴⁸Ọọwa, ọ ya iwe-ahụrụ oluhye bala ang-ahị ịtụka-ịtụka ha ịDanẹlụ lẹ, ọ yọọ ri olegbeju nya imwawụ nya ịBabịlọn wuu bala ọ-hwọọ ri olegbeju nya angị ju adịrahụ irya wuu lẹlẹ.

⁴⁹Adịrahụ hu iChedirakị bala iMechakị bala Abedinego ri alegbeju nya ụkụrwọ ịla ịBabịlọn bwula ọbịlẹ-bịlẹ nya ịDanẹlụ. ỊDanẹlụ tị lẹ, ọwa hi hụ ụwa ẹ-ẹpwa nya adịrahụ.