Read idege ỊDANẸLỤ 3 Bible Online

ỊDANẸLỤ 3 - idege bible

ỊDANẸLỤ 3

¹Ụka ọhẹ iNebukadinesa ya ị me ukpeku nya okpoko ịgọm ọlẹ ká uhye ọlala nyamwụ ri apatẹ iwo ihikichu, ẹpwụ ojuju nyamwụ la apatẹ ihikichu. Ọ ya lẹ, ị ya yeji ụteeji nya iDura ba epweji nya ịBabịlọn ba lẹlẹ.

²Ọọwa, ọ du ẹrụ tọ alụkụrwọ nyamwụ wuu ịlẹ kị ri ịdịrịhụ bala ịgọvụnọ bala ịgọvụnọ ichiche bala angị jwọọ irya bala angị kpẹhị rịrị okpoko bala angịleje bala alụkụrwọ i-bwu ebwebweebwo datị-datị nya ọpyị nyamwụ kị ka wẹ kaka jịra lẹlẹ. Ọ byaa ya nyị wẹ ọhụhụ nyọka chị ukpeku ọlẹ kọ họ ehe.

³Ọọwa, alụkụrwọ ịwẹ wuu à wẹ kaka jịra nyọka chị ukpeku ọlẹ ká adịrahụ họ ehe lẹlẹ. Ụka ká alegbeju ịwẹ wuu tụguru ị-ịlahị nya ukpeku ọwẹ lẹ,

⁴olegbeju ọhẹ à da ọna gboo yẹkẹẹ, “Anụ alẹpwụma ọnyị myị ọnyị bala alepwoja bala aloja wuu nya odehe ọlẹ, anụ wo mẹ.

⁵Anụ juwa ka wo ẹkụrwẹ ọchịchị bala òkó bala uhule bala ẹnwụ bala ogum̀ bala ụma nya ang idudu ịkịla ịlẹ kị ka du. Ahyaahị kanụ wo ayịlọ odudu ọwẹ lẹ, anụ hirikpẹẹ kanụ kpụ eteji ha ukpeku ọlẹ ká iNebukadinesa Adịrahụ ya yeji-ì wẹ mẹ.

⁶Ọngọngọhẹ kọ hirikẹẹ kpụ eteji họọ ka aalẹ, ị ka hu ọngọọwa ju ka ẹpwụ nya ila ọtụka.”

⁷Ahyaahị kị wo ayịlọ odudu ọọwa lẹ, alẹpwụma ọnyị myị ọnyị bala alepwoja bala aloja wuu nya odehe ọlẹ à hirikpẹẹ juwa kpụ eteji ha ukpeku nya okpoko ịgọm ọlẹ ká iNebukadinesa Adịrahụ ya yeji lẹlẹ.

⁸Ụka ọwẹ, ala ịBabịlọn ịhyẹ ye ẹga yẹta rịrị nyọka chị ẹla ba ala iJuu ẹ-ẹga nya adịrahụ.

⁹Ị byi iNebukadinesa Adịrahụ yẹkẹẹ, “Agaba Idu ee, à ka hịhị pwụ ụka myị ụka!

¹⁰Adịrahụ ee, à tị́ da ehile lẹẹ ya ụka kịị nyị́ dọmwụ nya ayịlọ odudu lẹ, ọng myị ọng nyị hirikpẹẹ kpụ eteji ha ukpeku nya okpoko ịgọm ọwẹ mẹ,

¹¹ọngọlẹ kịị nyị́ hirikpẹẹ kpụ eteji họọ ka aalẹ, nyị ka wu ọngọọwa ju ka ẹpwụ nya ila ọtụka.

¹²Tị yẹ mẹ, iChedirakị bala iMechakị bala Abedinego ala iJuu ịlẹ ka go kpẹhị rịrị imwawụ nya ịBabịlọn lẹẹ-ẹ́ myị ju ehile nyang ihi koo. Ị́ị̀ kpụ eteji ha ojiga nyang lee o-hirikpẹẹ ha ukpeku ọlẹ ká ya yeji lẹẹ ka.”

¹³Ụka ọọwa, agbama ju adịrahụ nya ịlẹhị-ịlẹhị. Ọọwa, ọ ya nyị kpa alẹng ịịwa wẹ ẹga nyọwa mẹ lẹlẹ.

¹⁴Ọọwa, ọ byi iChedirakị bala iMechakị bala Abẹdịnego yẹkẹẹ, “Ọ ri nya ịlẹhị nyori anụ pwa nyọka kpụ eteji ha ojiga nyam bala o-hirikpẹẹ ha ukpeku ọlẹ kam ya yeji-ì wẹ-ẹ́?

¹⁵Ugbẹnyị lẹ, ụka kanụ wo ẹkụrwẹ ọchịchị bala òkó bala uhule bala ẹnwụ bala ogum̀ bala ụma nya ang idudu ịkịla ịlẹ kị ka du lẹ, anụ hirikpẹẹ kanụ kpụ eteji ha ukpeku ọwẹ mẹ. Ó-ri kanụ họ ịnyị ka aalẹ, ị ka goonu ju ka ẹpwụ nya ila ọtụka. Ojiga oyina ānụ tị́ me kọ ka gbanụ kpehe bwu ẹpwụtụbwọ nyam myị?”

¹⁶IChedirakị bala iMechakị bala Abedinego anyị wẹ byi adịrahụ yẹkẹẹ, “Agaba Idu ee, ọ́ baba āhị ka maga nyọka gba ịlọhị kpehe koo.

¹⁷Ó-ri kị goohi ju ka ẹpwụ nya ila, Ohe Oluhye ọlẹ kahị kaa myị ẹrụ ha la ọngịrị nyọka gbahị kpehe bwu ụwa bala ẹpwụtụbwọ nyang myị.

¹⁸Ọ́ tị rị kọ gbahị gba kpehe ka aalẹ, Agaba Idu, aa jẹ mẹ, áhị juwa kpụ eteji ha ojiga nyang lee o-hirikpẹẹ ha ukpeku ọlẹ ká ya yeji-ì wẹ ka.”

¹⁹Ụka ọọwa, agbama nya iNebukadinesa wụ gbụrụ-gbụrụ, lẹhị nyamwụ wọmẹ pẹ̀ẹẹ jahị da iChedirakị bala iMechakị bala Abedinego. Ọ da angịnyị nyamwụ ehile nyị du ila ju kịị nyị chị pwuu ugbabwọ irwiye gụ olene.

²⁰Ọ byi angịhyẹ nya angị la ogogo gụ ẹ-ẹpwụ nya angịdẹwụ nyamwụ nyị chaa ori kịị nyị gyaa ju ka ẹpwụ nya ila mẹ.

²¹Ị chaa ori lang ịkụrụ-kụrụ bala okpo nyaa wuu lẹ, ị gyaa ju ka ẹpwụ nya ila lẹlẹ.

²²Ajị nyọlẹ ká adịrahụ ya kpụ kị du ila ju lọọ chịpwuu kaka kpoye lẹ, ẹlẹlẹ-ila wu angịdẹwụ ịlẹ kị go alẹng ịwẹ kpa kaka ju ka ẹpwụ nya ila.

²³Jaabwọ kị chị iChedirakị bala iMechakị bala Abedinego iri mẹnẹ-mẹnẹ, ịnyịnyị ị chabwọ ju ka ẹpwụ nya ila liri-liri lẹ.

²⁴Lụka ọmwaaa lẹ, iNebukadinesa-à wuleji kpịraka ẹ-ẹpwụ nya ahị ọ-họọ bwuu lẹ, ọ tọ alụkụrwọ nyamwụ wọ yẹkẹẹ, “Aangị ịta āhị chị ori gyaa ju ka ẹpwụ nya ila ka-á?” Ị wẹ byọọ yẹkẹẹ, “Iyadu, Agaba Idu.”

²⁵Ọọwa, ọ yẹkẹẹ, “M̀ tị yẹ alẹng angị ine kị lalẹẹ jẹdịyẹ tụ́ gaaa ẹ-ẹpwarịrị nya ila. Ila-á haa ịngịngịhyẹ ka. Ọngọ ohene nyaa lala olegu-ẹrụ.”

²⁶Ọọwa, iNebukadinesa-à kele ka ọnang nya ila lẹ, ọ be ẹkọ wụrwaa yẹkẹẹ, “IChedirakị bala iMechakị bala Abedinego, anchẹ nya Ohe Oluhye ọlẹ kọ luhye gụgụ wuu ee! Anụ kpehe warị mẹ oo!” Ọọwa, ị gba kpehe ahyaahị lẹlẹ.

²⁷Ọọwa, ịdịrịhụ bala ịgọvụnọ bala ịgọvụnọ ichiche bala angị jwọọ irya wuu à tụ gbiriri warị nyọka yẹ alẹng angị ịta ịwẹ ká ila-á haa abwọhẹ myị kaka lẹlẹ. Ila-á wu inyi nyaa ka, ịwụrụ nyaa-á rụ ila ka. Ị́ dọmwụ nyi oru ịmwụ-ila ịmwụ-ila kpong-kpong ka.

²⁸Ọọwa, adịrahụ à yẹkẹẹ, Anụ gwogbo ha Ohe Oluhye nya iChedirakị bala iMechakị bala Abedinego ọlẹ kọ du olegu-ẹrụ nyamwụ kaka gba alẹng ịlẹ kị myị ẹrụ họọ bala ọ-dahịhilọọ. Ị ya ọhịhị nyaa ga ha igu bwula o-nyẹẹkpẹ da ehile nyam ọkọkọ nyọka myị ẹrụ lee ọ-kpụ eteji ha ojiga ọhẹ-lọhẹ dala Ohe Oluhye nyaa.

²⁹Lẹẹlẹ, m̀ jam da ehile ya ọngọngọhẹ bwu ẹpwụma lee epwoja lee ọpyị ọhẹ-lọhẹ kọ ya ẹla ya ẹpẹpẹ ju Ohe Oluhye nya iChedirakị bala iMechakị bala Abedinego aalẹ, ị ka wọ ọngọọwa pẹtẹ-pẹtẹ, ta ẹpwa nyamwụ ayịreji gbanggbang. Ojiga ọhẹ-lọhẹ-ẹ́ ji kọ ka jẹ-ẹ̀ chị ọngọngọhẹ da ụgbẹyị ọlịịlẹ ka.

³⁰Ọọwa, adịrahụ à kpa iChedirakị bala iMechakị bala Abedinego ka iwe-ahụrụ iluhye gụ ilene ọ-ọpyị nya ịBabịlọn lẹlẹ.