Read idege ỊDANẸLỤ 4 Bible Online

ỊDANẸLỤ 4 - idege bible

ỊDANẸLỤ 4

¹Ẹrụ ọlẹ ká iNebukadinesa Adịrahụ du tọ alẹpwụma bala alụma bala aloja ilodehe ọlẹ wuu à lẹẹ lẹ: Okpunyi ā juwa tanụ wuu mẹ!

²Ọ ham kaanụ wuu ka jẹ ang chajị nya ang-ẹjẹẹ bala ụkụrwọ ẹbyẹbyị ịlẹ wuu ká Ohe Oluhye ọlẹ kọ luhye gụ wuu họ ham.

³Ang-ẹjẹẹ nyamwụ chakpa la ụmẹ ẹ-ẹga nyahị! Ụkụrwọ ẹbyẹbyị ịlẹ kọọ họ chakpa lọngịrị-ọngịrị! Ohe Oluhye ri adịrahụ ọpyịyọọ, adịrahụ oriri nyamwụ-ụ́ myị ẹnẹnẹhẹ kaka.

⁴“Am iNebukadinesa hụhụ chwọọ ẹ-ẹpwa nyam lokpunyi, juwa chị ọkẹkẹnị ju ụdụ nyam.

⁵Ọọwa, m̄ tị la ụlaa oluhi-uhi ọhẹ lẹlẹ. Ọyị ọlẹ kam yẹ a-arụrụ ụka kam juwa nune gum ugbodu ene lụmẹ.

⁶M̀ du ka wụrụ angị kaa ju adịrahụ irya ịla ịBabịlọn wuu kị ka wẹ kaka ya etu nya ụlaa ọọwa jem.

⁷Ụka kị kpa alegino bala angị mwụ ịnwa bala alahwa bala angị jẹ ang chajị nya ịdịchụ warị kaka jịra, m̀ wa ụlaa ọọwa jaa, ị́ tị jẹ etu nyamwụ ya jem myị ka.

⁸Ọọwa, ịDanẹlụ ọlẹ kam ya wụrụ ịBẹlụtịchasa ojiga nyam à warị wẹ ẹga nyam lẹlẹ. Olegu nya ijiga irigọgọ hwo kwọọ ọwa. Ịnyị, m̄ wa ụlaa nyam jọọ ịịlẹ yẹkẹẹ,

⁹“ỊBẹlụtịchasa olegbeju nya alegino ee, m̀ jẹ ká olegu nya ijiga irigọgọ ji uhye nyang. À kaa jẹ ang ịkpịbaa ọnyị myị ọnyị. M̀ jam ka wa ụlaa nyam jeng lẹ, aa bwuru etu nyamwụ jem mẹ.

¹⁰“Ụka ká une chụm, m yẹ okoji ọtụka-ọtụka ọhẹ kọ rịrị ẹ-ẹpwarịrị nya odehe.

¹¹Okoji ọọwa nwa lọngịrị-ọngịrị bala ọ-la uhye gbee kọ wu egbamwụ ọyị. Ị jẹ yọọ bwu ọbaba ọnyị myị ọnyị nya odehe wuu.

¹²Apwụ nyamwụ há gbọdọ-gbọdọ. Ọ nwụ egbe nyọọnyọọ kpụ ọ-ka nwa oriri nya alodehe wuu myị. Iyo ịlẹpwamẹ kaa mwụ ịnyọ ụ-ụrụrụ nyamwụ. Ịchịnụ kaa nọ awụ abwọ nyamwụ. Ang ọdịhụ olodehe ọlẹ wuu kaa hya ugbe nyamwụ ri.

¹³“Ụka kam juwa me irya ju ọyị ọwẹ, m̄ yẹ ká olegu-ẹrụ ọhẹ kọ kụ giri-giri juwa gbeji wẹ bwu epwoohe lẹlẹ.

¹⁴Ọọwa, ọ dakọ gboo yẹkẹẹ, ‘Anụ chị okoji ọwẹ deeji, kanụ mọọ abwọ. Anụ wọọ apwụ bala o-nyi egbe nyamwụ epepe hụrụ, kanụ ku iyo ilekpeleji nyamwụ bala ịchịnụ ịlabwọ nyamwụ rụ wuu mẹ.

¹⁵Anụ tị bahi ẹchụ nyamwụ ju ọpyị ụ-ụwa, kanụ ya agba oloje-oje bala oje ọnyọmịla jwọọ dagaga ju weji. Anụ pẹhyọọ rụwa ẹ-ẹpwamẹ mẹ. “ ‘Kanụ ba ká amwụ ā kpụ ọlẹng ọwẹ, kọ kụ ta iyo bala apwụ bala amẹ mẹ.

¹⁶Ẹ-ẹpwụ nya ẹka irwiye gbẹgbịlẹ, irya nya ọngịnyị ọlẹ kọ la ka yẹ lirya nya iyo ọlẹpwamẹ.

¹⁷Jaabwọ ká alegu-ẹrụ igbeji ya-à wẹ lẹlẹ. Ọwẹ ā mẹjẹ angịnyị wuu kị jẹ mẹ, Ohe Oluhye ọlẹ kọ luhye gụ wuu à kpa ọngịrị ọkpẹhị rịrị ọpyị nya angịnyị ụ-ụbwọ lẹ. Ọ kaa chụ ọng myị ọng kọ họọ nyọka ri adịrahụ, ọ́ dọmwụ ri angịlẹ kị la iwe-ahụrụ ọbẹdẹ gụgụ wuu wẹwẹ.’

¹⁸“Ụlaa ọlẹ kam la a wẹ lẹ, ịBẹlụtịchasa. Ya etu nyamwụ jem mẹ. Ọngọngọhẹ nya angị jum irya-á jọọ ya jem ka. Ahụ tị ka jọọ, chajị olegu nya ijigi irigọgọ ji uhye nyang.”

¹⁹Ọọwa, ịDanẹlụ ọlẹ ká ẹnyị ọkịla nyamwụ ri ịBẹlụtịchasa à wu ichinji dayị chịng la o-ya ẹla bwu ọnụ ka lụka okpii lẹlẹ. Adịrahụ à byọọ yẹkẹẹ, “ỊBẹlụtịchasa ee, ā myị ká ụla ọwẹ bala etu nyamwụ ā wung ejiri koo.” ỊBẹlụtịchasa wẹ yẹkẹẹ, Agaba Idu ee, ang pyii ká ụlaa ọwẹ bala etu nyamwụ ka họ jịra u-uhye nya aluji nyang ọkọkọ nyang ahụ.

²⁰Okoji ọlẹ ká yẹ luhye pwụ uhye-ọgba kpụ kpụ ọng myị ọng jẹ yọọ odehe wuu.

²¹Apwụ nyamwụ há gbọdọ-gbọdọ. Ọ nwụ egbe ịlẹ ká ang ilodehe wuu ka ri myị. Iyo ịlẹpwamẹ mwụ ịnyọ e-ekpeleji nyamwụ, ịchịnụ nọ awụ abwọ nyamwụ ịnyịnyị.

²²Agaba Idu ee, ahụ kpangga a ri okoji ọlọngịrị bala oluhye ọwẹ lẹ. A luhye gbee ka pwụ egbamwụ, ọngịrị nyang pyẹ yịrị odehe wuu.

²³Ụka ká wẹẹ yọyị, a yẹ ká olegu-ẹrụ bwu epwoohe warị kaka yẹkẹẹ, Anụ chị okoji ọwẹ deeji, kanụ tọọ ayịreji. Anụ tị ba hi ẹchụ nyamwụ ju eji, kanụ jwọọ agba oloje-oje bala oje ọnyọmịla weji rụwa ẹ-ẹpwamẹ. Anụ tụ hi atẹ nyamwụ ju eji rụwa. Anụ ba ká amwụ ā kpụ ọlẹng ọwẹ, kọ kụ ẹpwa ta iyo ịlẹpwamẹ jịra ẹẹka irwiye gbẹgbịlẹ.

²⁴“Lẹẹlẹ, Agaba Idu, etu nya ụlaa ọwẹ bala ang ọlẹ ká Ohe Oluhye ọlẹ kọ gụgụ wuu ya kọ juwa ka họ ẹ-ẹga nyang a lẹẹ lẹ:

²⁵Ị ka kung rụ hi ẹpwụ nya angịnyị ehe ká ka rụ kaka kụ ta iyo ịlẹpwamẹ. Ẹ-ẹpwụ nya ẹka irwiye gbẹgbịlẹ, a ka ri amẹ lala ẹna bala ọ-ka nune odehe gbagbịla ẹga ká amwụ ka kpụng. À ka ji iwe-ahụrụ ọwẹ gbee ká ka jẹ nyori Ohe Oluhye ọgụgụ wuu nyị kpa ọngịrị nya ọpyị ọkpakpa nya angịnyị ehe ụ-ụbwọ bala o-ri ọwa-à kaa hu ọpyị ha ọng myị ọng ọlẹ kọ họọ nyọka ri adịrahụ nya ụwa lẹ.

²⁶Ị tị ka pẹhi ẹchụ bala atẹ nya okoji ọọwa ju eji rụwa. Etu nya ọwẹ ri à ka myịmyị-ị̀ nyà kaka ri adịrahụ ụka ká jẹ nyori Ohe Oluhye nyaa ri olegbeju nya odehe ọlẹ wuu lẹ.

²⁷Lẹẹlẹ, kpa irya ọlẹ kam wẹẹ ka jung họ ụkụrwọ mẹ, Agaba Idu. Hịnyọ la ang onyobyi ọhọhọ, ká juwa họ ang ọnyịịla bala ọ-yẹ ahyẹẹrwẹrwa nya alẹbyahị mẹ. Aalẹ, ā ka pyẹpyọọ kịnyaa kịlahị lẹlẹ.”

²⁸Ẹlẹwẹ wuu họ ta iNebukadinesa Adịrahụ.

²⁹Ịya iwo kụrụ imiiye ọ ri ẹ-ẹkpẹ nya ụlaa ọwẹ lẹ. Ẹnẹhẹ kọ juwa tụ gaaa ẹ-ẹpwayịrẹtẹ nya ẹpwa nyamwụ ị-ịBabịlọn lẹ,

³⁰ọ yẹkẹẹ, “ỊBabịlọn ọtụka ọlẹ chakpa kpẹ̀hị! M̀ nwọọ nya egbeju-ẹpwa nyam nyọka mẹ ọngịrị bala ụmụmẹ bala ohi oruru nya adịrahụ oriri nyam je ịnyị.”

³¹Ene ká ẹla ọlọnụ nyamwụ ọwẹ ka cheju kpá lẹ, omyi ọhẹ à ya ẹla bwu epwoohe yẹkẹẹ, “INebukadinesa Adịrahụ ee, ke ụrụ lẹla ọlẹ kam wẹẹ ya mẹ! Ị ye ọngịrị nya adịrahụ oriri nyang hing lẹ.

³²Ị ka kung rụ hi ẹpwụ nya angịnyị ehe kaka kụ ta iyo ịlẹpwamẹ, ká ka ri amẹ lala ẹna ẹ-ẹpwụ nya ẹka irwiye gbẹgbịlẹ. Ụka ọọwa, à ka jẹ ká Ohe Oluhye ọgụgụ wuu à kpa ọngịrị nya ọpyị ọkpakpa nya angịnyị ehe ụ-ụbwọ bala o-ri ọwa-à kaa hu ọpyị ha ọng myị ọng ọlẹ kọ họọ nyọka ri adịrahụ nya ụwa lẹ.”

³³I-ijata-ijata ẹlẹwẹ kị ya chajị nya iNebukadinesa wẹ à họ jịra lẹ. Ị kwọọ rụ hi ẹpwụ nya angịnyị ehe lẹ, ọ juwa ri amẹ lala ẹna lẹlẹ. Amwụ kpọọ, inyi nyamwụ nwa lediyo lala arụrụ nya okpe. Ego-akachụ bala ego-achụụ nyamwụ lediyo lala achụụ nya ịchịnụ.

³⁴Ụka ká ẹka irwiye ịịwa kam lẹ, am iNebukadinesa-à hu ẹhị hwaa ka uhye-ogba lẹ, irya nyam à nyà chịm ọgụ lẹlẹ. M̀ gwogbo ha Ohe Oluhye ọgụgụ wuu. M̀ ya ihi bala ogbo họọ ọwa ọngọlẹ kọ juwa hịhị gbe oyi myị oyi yẹkẹẹ, Ọ ka ri adịrahụ gbe oyi myị oyi, ọpyị-adịrahụ nyamwụ ka juwa ụka myị ụka.

³⁵Angịnyị ehe-é ri ịngịngịhyẹ a-ahị nyamwụ ka, jaabwọ kọ họọ ọọ kpa ọngịrị nyamwụ họ ẹ-ẹga nya alegu-ẹrụ tụ angịnyị ehe am̀ odehe lẹ. Ọngọngọhẹ-ẹ́ ka jẹ-ẹ̀ wọọ ụbwọ kpa lee ọ-dọọ otaa kpong-kpong ka.

³⁶Ụka ká irya nyam nyà chịm ọgụ, ihi bala ụmụmẹ bala ehe ọlala nyam tịtị nyà chịm ọgụ ịnyịnyị. Alụkụrwọ i-jum irya bala alihi ịlọpyị nyam nyà chịm ọgụ lẹ, m̄ ye ọngịrị nyọka ri adịrahụ myịmyị lẹlẹ. M̀ dọmwụ la ihi-ihi gụ olene.

³⁷Ọlẹẹlẹẹ lẹ, am iNebukadinesa gwogbo bala ọ-ya ihi bala ọ-ya ụmụmẹ ha Adịrahụ nya epwoohe lẹ, chajị ang myị ang ọlẹ kọ họ pwoku bala ọ-la kpakpa. Ọ la ọngịrị nyọka kpa angị hi ọbọọchẹ weji myị.