Read idege ỊDANẸLỤ 5 Bible Online

ỊDANẸLỤ 5 - idege bible

ỊDANẸLỤ 5

¹Ụka kọ nọ tata chẹẹ, ịBẹlụchasa Adịrahụ wụrụ ọhụhụ ọtụka ọhẹ ha alihi nyamwụ angị ụnọ, ị nwa ere lawụlẹ lẹlẹ.

²Ụka kị juwa nwa ere ịnyịnyịịnyị lẹ, ịBẹlụchasa-à du ẹrụ ya nyị kpa ekeku bala ịja nya okpoko ịgọm bala okpoko onyoowuru ịlẹ ká iNebukadinesa adamwụ go kparụ bwu Ube Ịgọgọ ọla iJerusalẹm warị lẹlẹ. Ọ tịtọ kọọwa bala alihi bala ịhụ bala ịhụ-anchẹ nyamwụ kà kpa nwa ere.

³Ahyaahị kị kpa ekeku bala ịja nya okpoko ịgọm ịịwa pwụ eji lẹ, ịwa wuu à kpa nwa ere lẹlẹ.

⁴Ụka kị juwa kpa ere nwa, ị juwa chị ijiga nya okpoko ịgọm bala okpoko onyoowuru bala oje bala okoji bala ẹjwọ anyị.

⁵Lụka ọmwaa, ụbwọ nya ọngịnyị à hu gẹgịlẹ juwa da ụpwụ u-uhye nya ugulọ ọlẹpwa nya adịrahụ ẹga ká ahịgboo nya itinika hụ́ rịrị lẹlẹ. Adịrahụ yẹ ụbwọ kọ juwa da ụpwụ.

⁶Uhi ọtụka-ọtụla jwọọ larụụ nyamwụ juwa tụ kpịla awụlẹ.

⁷Ọ dakọ gboo byi ọngẹhẹ nyị wụrụ angị mwụ ịnwa bala alahwa bala angị jẹ ang chajị nya ịdịchụ warị wẹẹ. Ụka kị wẹ ẹpwang lẹ, adịrahụ a byaa yẹkẹẹ, “Ọngọlẹ kọ ka wa ụpwụ ọdada ọwẹ myị, kọ ka ya etu nyamwụ jem aalẹ, ị ka ya awụrụ ọnyọmịla nya adịrahụ kụrwọọ bala ọ-ya ang odoomyi nya okpoko ịgọm olihi-ihi dọọ ụ-ụkpụrọkọ kọ ka ri olegbeju ọhata ọgụgụ wuu ọ-ọpyị ọlẹ.”

⁸Angị ju adịrahụ irya ịịwa warị, ọngọngọhẹ nyaa-á tị jẹ wa ụpwụ ọọwa lee ọ-jẹ etu nyamwụ ya je adịrahụ myị ka.

⁹Ụka ọọwa, ịBẹlụchasa Adịrahụ ju uhi gụ olene, gbu ahị pilooo. Alihi nyamwụ-ụ́ jẹ jaabwọ kị ka họ datị kaka.

¹⁰Ụka ká ahụ nya adịrahụ wo anụ nya adịrahụ bala alihi nyamwụ lẹ, ọ jụ ka ẹpwang ọlẹ kị wẹẹ la ọhụhụ lẹlẹ. Ọọwa, ọ yẹkẹẹ, “Agaba Idụ, à ka hịhị pwụ ụka myị ụka! Ẹlẹwẹ ā lang uhi-uhi, ká go kokilo koo.

¹¹Ọlẹng ọhẹ jam ọ-ọpyị nyang ká olegu nya ijiga irigọgọ hwo kụ. Ụka ká adang ri adịrahụ, ọ yẹ jaabwọ ká ọlẹng ọọwa la irya ọnyịịla bala ang ọjẹjẹ bala ẹla ọjẹjẹ i-bwu ẹga nya ijiga. Ụka ọọwa, iNebukadinesa adang kọ ri adịrahụ hwọọ ri olegbeju nya alegino bala angị mwụ ịnwa bala alahwa bala angị jẹ ang chajị nya ịdịchụ.

¹²Ọlẹng ọlẹ kọ ri ịDanelu ká adịrahụ wụrụ ịBẹlụtịchasa la irya ọlahịchịng bala ọ-jẹ kaa wụlẹ alaa bala o-bwuru igbibyi dodehe tụ ang ịkpịbaa wuu. Lẹẹlẹ, du kaka wụrwọọ mẹ, ọ ka ya jeng ang ọlẹ ka ụpwụ ọdada ọwẹ rị.”

¹³Ọọwa, ị kpa ịDanẹlụ wẹ ịlahị nya adịrahụ lẹ, adịrahụ a tọọ wo yẹkẹẹ, “Ahụ a ri ịDanẹlụ ọlagba o-bwu iJuu ọlẹ ká adam adịrahụ kpa bwu iJuda lẹ-ẹ́?

¹⁴M wo olegu nya ijiga nyị ji uhye nyang, ahụ nyị la ang ọjẹjẹ bala ẹla ọjẹjẹ orige-rige.

¹⁵Ị kpa angị jum irya bala angị mwụ ịnwa warị nyọka wa ụpwụ ọlẹ kị da bala ọ-ka ya etu nyamwụ jem, ị́ tị dọọ wụlẹ myị ka.

¹⁶M̀ tị wo ahụ nyị kaa jẹ etu bala ọdawụlẹ nya ang ịkpịbaa myị. Ó-ri ká wa ụpwụ ọdada ọwẹ bala o-bwuru etu nyamwụ jem myị aalẹ, ị ka ya awụrụ ịnyịmịla nya adịrahụ oriri kụrụng. Ị ka ya ịjang odoomyi olihi-ihi nya okpoko ịgọm dang o-omyi, ká ka ri olegbeju ọhata ọgụgụ am̀ ọ-ọpyị nya ịBabịlọn.”

¹⁷Ọọwa, ịDanẹlụ a wẹ adịrahụ yẹkẹẹ, Agaba Idu, m̀ ka wa ụpwụ ọwẹ bala o-ya etu nyamwụ jeng lẹ. Tị kpa ang-ahị nyang ụ-ụwa lee ọ-ya ha ọngọkịla ọhẹ mẹ.

¹⁸Agaba Idu ee, Ohe Oluhye ọgụgụ wuu họ adang iNebukadinesa ri adịrahụ ọtụka bala ọ-ya ihi bala ụmụmẹ họọ.

¹⁹Ajị nya ụmụmẹ nyamwụ alẹpwụma ọnyị myị ọnyị bala alepwoja bala aloja nya odehe ọlẹ wuu kaa che kpakpaakpa bala o-ju uhi nyamwụ. Ọng myị myị kọ tịtọ kọ ka nwụ ọ kaa nwụ lẹ. Ọ́ tịtọ nyọka chị ọhịhị nya ọngịnyị da, ọ kaa chị ọngọọwa da. Ọ la ọngịrị kaa kpa iwe-ahụrụ nya ọng myị ọng kọ họọ ka ịlahị. Ọ tị kaa chị oyoyi ju ọng myị ọng kọ họọ ịnyịnyị.

²⁰Ụka kọ la egbeju-ọngịrị bala ọ-chị ọkịlẹtụ nyamwụ ori, kọ hi ọbọọchẹ lẹ, ị pwọọ ọmwụ cheji hi ẹchị-adịrahụ nyamwụ, du ká ihi ọlala nyamwụ myị lẹlẹ.

²¹Ị kwọọ bwu ẹpwarịrị nya angịnyị ehe. Irya nyamwụ yẹ ka ri nya iyo oleji. Ọ kụ ẹpwamẹ ta ibyiyó ịlẹpwamẹ, juwa ri amẹ lala ẹna, kaa nune odehe gbagbịlẹ lịnyịrọ nyamwụ kpụ amwụ. Ụka ohyẹẹkpẹ, ọ myị nyori Ohe Oluhye ọgụgụ wuu nyaa ri olegbeju ọ-kpa ọpyị olodehe wuu ụ-ụbwọ bala ọ-kaa hụ ọng myị ọng kọ họọ ri adịrahụ lẹ.

²²Ẹlẹwẹ-ẹ́ ri ọngga nyang ahụ ịBẹlụchasa ọnyị nyamwụ koo. Á ti kpa ịlọng keji ka.

²³A ju Ọngọlahị olepwoohe ẹpẹ bwula ọ-kpa ekeku bala ịja ịlẹ kị go bwu Ube nya Amkpaa warị. Ọọwa, ahụ bala alihi bala ịhụ bala ịhụ-anchẹ nyang à kpa nwa ere, juwa gwogbo ha ijiga ịlẹ kị họ lokpoko ịgọm bala okpoko onyoowuru bala oje ọnyọmịla bala oje bala okoji bala ẹjwọ lẹ. Ijiga ịwẹ-ẹ́ jẹ-ẹ́ yẹ ọyị lee o-wo ẹla lee ọ-jẹ ịngịngịhyẹ ka. Á tị myị ju ihi nya Ohe Oluhye ọlẹ kọ kpa ọhịhị nyang ụ-ụbwọ bala ọ-la ọngịrị u-uhye nya ang myị ang ọlẹ kaa họ ka.

²⁴Ịnyị à du ká Ohe Oluhye du ụbwọ ọwẹ ẹrụ kaka da ẹlẹwẹ lẹ.

²⁵Ẹla ọlẹ ká ụbwọ ọọwa da a lẹẹ lẹ: Ọwawa, ọwawa, ilo ọlala, ọgàga.

²⁶Etu nyamwụ a lẹẹ lẹ: ọwawa ri Ohe Oluhye wa ẹnụtụrụ ịlẹ ká ka ri adịrahụ kaka ba, ọ tị kpaa kaka cheju lẹ.

²⁷Ilo ọlala ri ị wụlayẹ jaabwọ ká la nmẹẹ kaka ba lẹ, ị yẹ nyori à la huke-huke.

²⁸Ọgàga ri ị gà ọpyị-adịrahụ nyang ọlẹ, hu ebwo nyamwụ ọhẹ ha ala iMidi, hu ebwọ ọkịla ha ala iPechiya lẹ.

²⁹Ọọwa, ịBẹlụchasa-à da ehile lẹ, anchẹ nyamwụ à ya awụrụ ọnyọmịla nya adịrahụ oriri kụrụ ịDanẹlụ bala ọ-ya ịjang nya okpoko ịgọm olihi-ihi dọọ o-omyi lẹlẹ. Ọ hwọọ ri olegbeju ọgụgụ ọhata ọ-ọpyị nya ịBabịlọn lẹlẹ.

³⁰Lodu nya ẹnẹwẹ kpangga ị nwụ ịBẹlụchasa Adịrahụ nya ala ịBabịlọn lẹ.

³¹ỊDarịyọsị ọla iMidi kọ gu ẹka iwo ịrwọnyẹ kụrụ imiiye ụka ọọwa-à ye ọngịrị nya adịrahụ oriri lẹlẹ.