Read idege ỊDANẸLỤ 6 Bible Online

ỊDANẸLỤ 6 - idege bible

ỊDANẸLỤ 6

¹Ụka ọhẹ juwa ká ịDarịyọsị chụ ịgọvụnọ angị ohu da iwo imiiye (120) ká ọngọngọọng nyaa ka kpẹhị rịrị imwawụ ookpokpo-ookpokpo nya ọpyị nyamwụ.

²Adịrahụ chụ ịDanẹlụ bala alegbeju ịgbẹgbịlẹ angị imiiye ịkịla kị ka kpẹhị rịrị ụkụrwọ ọlẹ ká alegbeju ịkịla wuu ka juwa họ bala ọ-ka ri ugbẹhị nya adịrahụ ọ-ọpyị ọwẹ wuu.

³ỊDanẹlụ mẹjẹ ahyaahị nyori ọ jẹ họ ụkụrwọ hiigu gụ alegbeju lee ịgọvụnọ ịkịla. Ụkụrwọ ọ-jẹ họ kpẹẹkpẹẹ nyamwụ la gede-gede gbee ká adịrahụ juwa me irya nyọka hwọọ ri olegbeju nya ọpyị nyamwụ wuu lẹpwụ-lẹpwụ.

⁴Ụka ọọwa, alegbeju bala ịgọvụnọ ịkịla juwa maga nyọka ye ẹlẹhẹ onyobyi nya ịDanẹlụ ya chajị nya ụgbẹyị ọlẹ kọọ bwu họ ụkụrwọ nyamwụ, ị́ tị yẹ abyị nyamwụ ọhẹ-lọhẹ ka, chajị ịDanẹlụ ri ọngọ ju ọdahịhile. Ọọ họ ẹla ọtịpyọ lee obíri-bìri ka.

⁵Ọọwa, ị byi awụlẹ yẹkẹẹ, “Áhị ka ye ịngịhyẹ ọtịpyọ ya rụ ịDanẹlụ kaka, kẹnẹ-kẹnẹ ó-ri ẹga nya ẹla nya Ohe Oluhye nyamwụ mẹ ịnyị.”

⁶Ọọwa, ị kele ka ẹga nya adịrahụ lẹ, ị byọọ yẹkẹẹ, “Agaba Idu ee, à ka hịhị pwụ ụka myị ụka!

⁷Ahị alegbeji ịkpẹhị rịrị bala ịgọvụnọ bala ịgọvụnọ ichiche tụ alegbeju ịkịla wụụ myị ju awụlẹ nyori à ka da ehile ọhẹ ọlẹ ká ọng myị ọng ka kpa pyii. Da ehile nyori o-bwu ọlẹẹlẹẹ gbee jịra ẹẹnụtụrụ iwo ịta gbẹgbịlẹ ọngọngọhẹ-ẹ́ ka raabwọ bịlẹ ịngịngịhyẹ bwu ẹga nya ojiga lee ọngịnyị ehe ọhẹ dala o-bwu ẹga nyang ahụ adịrahụ kaka mẹ. Ọngọlẹ kọ bịrị ehile ọọwa aalẹ, kị ka hwọọ ju ka ụjẹ nya egabẹ mẹ.

⁸Lẹẹlẹ, da ehile ọwẹ, ká yụbwọ jwọọ ẹ-ẹpwụ, chajị kọ ka godayị giri-giri jaabwọ ká ehile ọnyị myị ọnyị nya ala iMidi bala iPechiya ọlẹ kị da kpehe lẹ, kị jẹ-ẹ̀ nwọọ họ kaka-à wẹ mẹ.”

⁹Ịnyị, ịDarịyọsị Adịrahụ a yụbwọ ju ehile ọọwa ẹ-ẹpwụ kị ka kpa họ ụkụrwọ lẹlẹ.

¹⁰Ụka ká ịDanẹlụ jẹ ẹla chajị nya ehile nya adịrahụ ọwẹ, ọ rụ ka ẹpwa nya ịlọmwụ. Ọ ya arụụ kụ eji ẹ-ẹga nya iwindo nyamwụ ịlẹ kị chọnụ da koye nya iJerusalẹm. Ọọwa, ọ raabwọ ugbabwọ ịta ahyẹẹnụ ọnyị myị ọnyị jaabwọ kọ kaa họ ịnyịnyịịnyị lẹlẹ.

¹¹Alegbeju ịkịla ịwẹ kọ ju awụlẹ, hu ang kele ka ẹpwa nya ịDanẹlụ lẹ, ị yẹ kọ juwa raabwọ ha Ohe Oluhye lẹlẹ.

¹²Ịnyị, ị wẹ ẹga nya adịrahụ lẹ, ị byọọ yẹkẹẹ, “Agaba Idu ee, à tị́ yụbwọ ju ehile ẹ-ẹpwụ lẹẹ nyori ọngọngọhẹ kịị nyị raabwọ bịlẹ ịngịngịhyẹ bwu ẹga nya ojiga lee ọngịnyị ehe ọhẹ dala ahụ jịra ẹẹnụtụrụ iwo ịta gbẹgbịlẹ aalẹ, nyị ka hu ọngọọwa ju ka ụjẹ nya egabẹ-ẹ̀.” Adịrahụ wẹ yẹkẹẹ, “Ee ehile ọọwa godayị giri-giri. Ehile nya ala iMidi bala ala iPechiya ọlẹ kị ka jẹ-ẹ̀ nwụ̀ rịrị kaka ịnyị.”

¹³Ọọwa, ị byi adịrahụ yẹkẹẹ, “ỊDanẹlụ ọngọhẹ nya alagba i-bwu iJuda-á kaa jung lee ehile ọlẹ ka da ihi ka. Ọ kaa raabwọ ugbabwọ ịta ha Ohe Oluhye nyamwụ ahyẹẹnụ ọnyị myị ọnyị.”

¹⁴Ụka ká adịrahụ wo ẹlẹwẹ, ọ bịrọọ ọkịlẹtụ. Ọ maga nya ụgbẹyị ọlẹ kọ ka bwu chị ịDanẹlụ da. Ọ maga gbee ka ẹnụ byi.

¹⁵Alẹng ịwẹ tịrẹkpẹ wẹ ẹga nya adịrahụ ka byọọ yẹkẹẹ, “Agaba Idu, à tị́ jẹ lẹ, ehile nya ala iMidi bala iPechiya ọlẹ ká adịrahụ-ụ́ yụbwọ ju ẹ-ẹpwụ lẹ, ị́ ka jẹ-ẹ̀ bịrọọ kaka.”

¹⁶Ọọwa, adịrahụ à ya lẹ, ị wu ịDanẹlụ kpa kaka ju ka ụjẹ nya egabẹ lẹlẹ. Ọ byi ịDanẹlụ yẹkẹẹ, “Ohe Oluhye nyang ọlẹ kaa myị ẹrụ ha lọkịlẹtụ nyang wuu ā chịng da mẹ.”

¹⁷Ị hu ẹjwọ tụ ọnụ nya ụjẹ ọọwa ku lẹ, adịrahụ à ya ịna nya ịlọmwụ bala ịna nya alihi nyamwụ ba ẹjwọ ọọwa u-uhye, chajị ká ọngọngọhẹ-ẹ́ ka gba ịDanẹlụ kpehe kaka lẹlẹ.

¹⁸Adịrahụ nyà wẹ ẹpwa nyamwụ Ọ́ kpa une ka ẹhị lodu ọọwa myị ka. Ọ́ kpa ang oriri ka ọnụ ka. Ị́ du ụma nya ayịlọ ọhẹ-lọhẹ jwọọ ka ịnyịnyị.

¹⁹Lụtụrụ gbegbegbe ká adịrahụ chahị wuleji, ọ chị agaga kele ka ụjẹ nya egabẹ lẹlẹ.

²⁰Ụka kọ pwụ ụwa, ọ be ẹkọ wụrụ ịDanẹlụ lomyi ọjụjụ yẹkẹẹ, “ỊDanẹlụ ọnchẹ nya Ohe Oluhye ọlẹ kọ juwa hịhị ee! Ohe Ọluhye ọlẹ ká kaa myị ẹrụ ha lọkịlẹtụ nyang wuu chịng da bwu ọnụ nya egabẹ myị lẹ-ẹ́?”

²¹ỊDanẹlụ wẹ yẹkẹẹ, “Agaba Idu ee, à ka hịhị pwụ ụka myị ụka!

²²Ohe Oluhye du olegu-ẹrụ nyamwụ warị kaka tụ ịnụ nya egabẹ ku kị ka họm ịngịngịhyẹ ka, chajị ọ jẹ kam da ẹlẹhẹ ka. Ḿ tị họ tịpyọ ẹ-ẹga nyang ahụ adịrahụ ka ịnyịnyị.”

²³Adịrahụ chị ọkẹkẹnị kaka kpoye. Ọọwa, ọ ya nyị gba ịDanẹlụ kpehe bwu ụjẹ mẹ lẹlẹ. Ụka kị gbọọ kpehe, ị yẹ nyori egabẹ-ẹ́ họọ ịngịngịhyẹ kpong-kpong ka, chajị ọ dahịhile Ohe Oluhye.

²⁴Ọọwa, adịrahụ a da ehile lẹ, ị wu angịlẹ wuu kị chị ẹla ba ịDanẹlụ lẹ, ị gyaa lịhụ-lịhụ bala anyị nyaa wuu ju ka ụjẹ nya egabẹ lẹlẹ. Ene kị ka pwụ eji nya ụjẹ kpá, egabẹ gbajị yaa kpoo, hụlaa hwẹẹhẹẹ.

²⁵Ọọwa, ịDarịyọsị Adịrahụ à da ụpwụ tọ alẹpwụma bala alepwoja bala aloja ilodehe wuu yẹkẹẹ, Okpunyi ā juwa tanụ wuu mẹ!

²⁶M̀ jam da ehile ya ẹga myị ẹga nya ọpyị-adịrahụ nyam, ọng myị ọng wuu ā ju uhu bala o-ju ihi nya Ohe Oluhye nya ịDanẹlụ mẹ oo. Ọ ri Ohe Oluhye ọlọhịhị, ọ ka ri adịrahụ gbe oyi myị oyi. Ịpyị-adịrahụ nyamwụ-ụ́ ka ta ayịreji ka, ọngịrị nyamwụ ka juwa gbe oyi myị oyi.

²⁷Ọ kaa chị angịnyị nyamwụ da bala ọ-gbaa kpehe, Ọọ họ ụkụrwọ bala ang ịlẹbyẹbyị u-uhye-ọgba bala am̀ odehe. Ọ chị ịDanẹlụ da bwu ụbwọ nya egabẹ.

²⁸ỊDanẹlụ nwa kịlahị-ịlahị lụka nya adịrahụ oriri nya ịDarịyọsị bala ụka nya ịSayịrọsị ọla iPechiya.