Read idege ỊDANẸLỤ 7 Bible Online

ỊDANẸLỤ 7 - idege bible

ỊDANẸLỤ 7

¹Ụka ọhẹ ẹ-ẹpwụ nya ẹka nya ọgbanyẹ nya adịrahụ oriri nya ịBẹlụchasa ị-ịBabịlọn, am ịDanẹlụ la ụlaa bala ọ-yẹ ọyị a-arụrụ lodu. Ọlẹ ri ọ-da ju nya ang ọlẹ kam yẹ.

²Ẹ-ẹpwụ nya ụlaa ọọwa, m yẹ ká igbachịwụ ọtụka-ọtụka juwa da bwu ẹga datị-datị kaka mịla uhye nya ugbenyi nya ihu ọtụka nmoo.

³Iyo ịtụka-ịtụka ine kpehe bwu ẹpwụ nya ihu, ọnyọnyọọnyị datị hi ọkịla.

⁴Iyo nya ọgbanyẹ lala ugẹbẹ, ọ tị ju achwọ lala idu. Jaabwọ kam juwa yọọ ịnyịnyịịnyị lẹ, ị hụla achwọ nyamwụ, tụ hyọọ dayị kọkọ lata nyamwụ lala ọngịnyị lẹlẹ. Ị ya irya nya ọngịnyị ehe họọ lẹlẹ.

⁵Iyo oheeye lala ọnarwọ kọ dayị kọkọ a-ata ịlẹkpẹ nyamwụ. Ọ ya angịrị chị ekpinegu ịlaka ịta kpa ụ-ụwa. Ọọwa, omyi ọhẹ à byoo yẹkẹẹ, “Kịnyaa, ká wu angịnyị ri jaabwọ kọ hang kaka ba mẹ!”

⁶Ẹ-ẹkpẹ nya ọọwa, iyo ọhata hi ehe gẹgịlẹ. Ọ me ijwo, ọ tị ju achwọ ine ịlẹ kị me ịnya ọchịnụ. Ọ ju egbeju ine ịnyịnyị! Ị ya ọngịrị ọtụka-ọtụka jwọọ ụ-ụbwọ.

⁷Jaabwọ kam juwa yọyị ịnyịnyịịnyị, iyo ohene à gba kpehe lẹlẹ. Ọ la ọngịrị la, ọ la uhi-uhi kpụ elego nyọka yẹ lẹhị. Ọ kpa angịrị ịtụka iloje-oje nyamwụ be ang myị ang ịlẹ kọ wu ri. Ịlẹ kọ be ri ka, ọ kpa ata taa tudu eji. Ọ́ me iyo ilene ịkịla ka, chajị ọ bwu achụ iwo chiriri.

⁸Ụka kam juwa mwụkpụrụ yẹ achụ nyamwụ ịwẹ, m̀ yẹ ká achụ ochiche ọhẹ kọ juwa be ẹpwarịrị nya ịkịla. Achụ ọọwa hụla achụ ịta ẹ-ẹpwụ nya ịlẹ kị juwa ene-ene. Achụ ọọwa ju ahị lala ịnya ọngịnyị bala ọnụ ọlẹ kọ juwa kpa chị ọgọm nya ịlẹhị-ịlẹhị.

⁹Ụka kam juwa yọyị ịnyịnyịịnyị, m̀ yẹ kị go ẹchị-ịdịrịhụ da. Ọngọ hịhị bwu orogo-orogo pyịyọọ hụhụ u-uhye nya ẹchị-adịrahụ ọhẹ lẹpwụ nyaa. Ịwụrụ nyamwụ la owuru lala ara. Inyi nyamwụ pwo hụratataata lala owu onyoowuru. Ọ hụhụ ẹ-ẹchị-adịrahụ olila-lila ọlẹ ká ata nyamwụ juwa wuru bileteteete lila ịnyịnyị.

¹⁰Ẹmwụ nya ila juwa mwụ kpehe bwu ịlahị nyamwụ. Iru nya ụnụnụụnọ nya angịnyị juwa kịị myị ẹrụ họọ. Ọọwa ụka nya eje ọlala à họ lẹ, ị wụrụ apwụ da dodo lẹlẹ.

¹¹Ụka kam juwa yọyị wẹẹ, m̀ wo ka achụ ochiche juwa hi ọbọọchẹ bala ọ-chị ọgọm. Jaabwọ kam juwa yọyị ịnyịnyịịnyị lẹ ị nwụ iyo ohene lẹ, ị hu ogu nyamwụ da ka ẹpwụ nya ẹlẹlẹ ịla, tọọ ayịreji lẹlẹ.

¹²Iyo ịta ịkịla ịlaanyị lẹ, ị nu ọngịrị nyaa, ị tị ba hyaa kị ka hịhị lụka okpii.

¹³Ụka kam wẹẹ yẹ ọyị ọwẹ lodu, ang ọlẹ kam yẹ lala ọngịnyị ehe. Ọ juwa jẹ jum chwẹẹ legbamwụ dokoko jwọọ. Ọọwa, ọ juwa jẹ ka ẹga nya Ọngọ hịhị bwu orogo-orogo pyịyọọ lẹ, ị kpọọ ka ịlahị nyam lẹlẹ.

¹⁴Ị ya ọngịrị bala ihi ọlala bala ọngịrị nya adịrahụ oriri họọ, chajị ka alẹpwụma bala alepwoja bala aloja nya odehe wuu ka myị ẹrụ họọ. Ọpyị ọkpakpa nyamwụ-ụ́ ka ta ayịreji ẹnẹnẹhẹ kaka.

¹⁵Ọyị ịlẹ kam ịDanẹlụ yẹ họm ọkịlẹtụ jigi-jigi bala ọ-lam uhi-uhi lụmẹ.

¹⁶M̀ jẹ tụ ba ọngọhẹ nya angịlẹ kị godayị rịrị ju ẹchị-adịrahụ chwẹẹ lẹ, m byọọ kọ ka da etu nya ang ịwẹ wuu wụlẹ jem lẹ, ọ daa wụlẹ jem lẹlẹ.

¹⁷Ọ wẹ yẹkẹẹ, “Iyo ịtụka ine ịwẹ ri ọpyị-adịrahụ ine ịlẹ kị juwa ka ye iwe ku am̀ odehe ẹnẹhẹ wẹẹ.

¹⁸Ụka ohyẹẹkpẹ, Ohe Oluhye ọgụgụ wuu tị ka ya ọngịrị nya ọpyị ọkpakpa ha angị ịkpẹẹkpẹẹ nyamwụ ịlẹ kị ka kpa ụ-ụwa gbe oyi myị oyi.”

¹⁹Ụka ọọwa, m̀ tịtọ nyọka jẹ ang chajị nya iyo ohene oluhi-uhi ọdatị hi iyo ịkịla ịwẹ gụ ọọwa. Iyo ọọwa wu ang myị ang kọ tọọ ri langịrị iloje-oje bala iloje ọnyọmịla nyamwụ, juwa tụ ata tudu eji lihihi nyaa.

²⁰M̀ tịtọ nyọka jẹ ẹla chajị nya achụ iwo ilegbeju nyamwụ bala achụ ọlẹ kọ kpehe myịmyị kọ gụ ịkịla bala ọ-họ ká achụ ịta ịkịla hụla. Ọ ju ahi bala ọnụ bala o-juwa chị ọgọm lọbọọchẹ ohihi.

²¹Ụka kam juwa yọyị ọwẹ, achụ ọọwa dẹwụ ta angịnyị nya Ohe Oluhye, kpụ ọ juwa kụrwaa.

²²Ọọwa, Ọngọ hịhị bwu orogo-orogo à wẹ lẹ, ọ chị oku ha angịnyị nya Ohe Oluhye ọgụgụ wuu lẹlẹ. Ọọwa, ụka-à pwụ ká angịnyị nya Ohe Oluhye ka yẹ ọngịrị nya ọpyị ọkpakpa lẹlẹ.

²³Ọọwa, ọngọọwa-à dọọ wụlẹ ya jem yẹkẹẹ, “Iyo ohene ọwẹ ri ọpyị-adịrahụ ohene ọlẹ kọ ka jam odehe. Ọ ka datị hi ịpyị-adịrahụ ịkịla wuu. Ọ ka du odehe wuu abwọ bwụjẹ-bwụjẹ bala ọ-ka jẹdịyẹ bwu uhye nya ang myị ang ọlẹ kọ dayị rịrị ụ-ụgbẹyị ọlẹ kọ juwa bwu.

²⁴Achụ iwo ịwẹ ri ịdịrịhụ iwo ịlẹ kị ka kpẹhị rịrị ọpyị ọọwa. Adịrahụ ọkịla tị ka wẹ. Ọ ka datị hi ịdịrịhụ ịta nya ọgbanyẹ, ọ tị ka kụrụ ịdịrịhụ ịta ịịwa chẹẹchẹẹ.

²⁵Ọ ka ya ẹla ịtịpyọ ba Ohe Oluhye ọgụgụ wuu bala ọ-ka tụ angịnyị nya Ohe Oluhye pyịpyị. Ọ ka maga nyọka yẹ ehile ịlịgọgọ bala ọhụhụ ịlẹ kịị hunọ da. Ị ka ji ekpeleji nya ọngịrị nyamwụ ẹ-ẹpwụ nya ẹka ịta ba ẹhya gbẹgbịlẹ.

²⁶Ọọwa, angị leje olepwoohe a ka chị eje lẹ, ị ka nọọ ọngịrị bala ọ-tọọ ayịreji gbanggbang lẹlẹ.

²⁷Ị ka ya ọngịrị nya ọpyị ọkpakpa bala ụmụmẹ nya ịpyị ilodehe wuu ha angịnyị nya Ohe Oluhye ọgụgụ wuu. Ọngịrị nya ọpyị ọkpakpa nyaa-á ka myị kaka. Alegbeju ilodehe wuu ka myị ẹrụ haa bala o-jwaa ihi.”

²⁸Jaabwọ ká ọyị ọlẹ kam ịDanẹlụ yẹ la à wẹ lẹlẹ. Ala ịwẹ lam uhi-uhi lụmẹ, m̀ go kokilo. M̀ tị kpa ẹlẹwẹ ẹ-ẹpwụ nya ịlọm.