Read idege ỊDANẸLỤ 8 Bible Online

ỊDANẸLỤ 8 - idege bible

ỊDANẸLỤ 8

¹Ụka ọhẹ ẹ-ẹpwụ nya ẹka ọhata nya adịrahụ oriri nya ịBẹlụchasa, am ịDanẹlụ yọyị ọkịla ẹ-ẹkpẹ nya ịnya ọgbanyẹ ọlẹ kam yẹ[2].

²Ẹ-ẹpwụ nya ọyị ọyẹyẹ ọọwa, m yẹ ịlọm ịịwẹ lọmwaa ụ-ụwa e-epweji nya iSusa ọlẹ kọ ri egbeju-ẹpwa nya imwawụ nya Elam ọlọpyị nya ịBabịlọn. M godayị ọ-ọnụ nya Ihu nya Ụlayị.

³Ụka kam hu ẹhị hwaa lẹ, m̄ yẹ omilodo ọhẹ kọ godayị ba ihu ọọwa ba lẹlẹ. Ọ bwu achụ imiiye. Ọhẹ ludiyo gụ ọkịla, ọwa ịnọ à tị bwu hyẹẹkpẹ nya ọkịla lẹ.

⁴Omilodo ọọwa juwa kpụ ang myị ang ọlẹ kọ ji koye nya ọmwẹnụ-obyi bala ẹtẹ bala edii nyamwụ ẹtẹ gbirong-gbìrong-gbirong. Iyo ọhẹ-lọhẹ-ẹ́ chọọ jụ lee ọ-gwọọ be myị ka. Ọ họ jaabwọ myị abwọ kọ họọ, ọ pyẹ gama-gama ọtụka-ọtụka.

⁵Ụka kam wẹ kpa irya nyamwụ me wẹẹ lẹ, oyichi ọlachụ ọtụka ookpokpo apewa nya ahị nyamwụ ọhẹ à kpehe lọngịrị-ọngịrị bwu ọmwẹnụ-obyi juwa kam chị odehe eku lagaga la ọ-ya ẹta gu ịpyị kaka lẹlẹ.

⁶Oyichi ọọwa wẹ lagbama myịm̀yịịmyị yahị da omilodo ọlachụ imiiye ọlẹ kam yẹ godayị ba ihu ba-à wẹ.

⁷M̀ yẹ kọ gba mịla omilodo ọwẹ lọngịrị-ọngịrị lẹ, ọ mwụ achụ imimiiye nya omilodo ọwẹ eku lẹlẹ. Omilodo-ó lọngịrị jụ ọnụ nya ẹla nyamwụ myị ka. Ọ hu omilodo mileji, jọọ lẹta chẹẹchẹ̀ẹchẹẹ, ọngọhẹ-ẹ́ juwa ka ká oyichi ọwẹ hyọọ myị kaka.

⁸Oyichi ọọwa la ọngịrị gụ ọọwa-ọọwa. Ụka ká ọngịrị ọlala nyamwụ jẹ pwụ ịkịtịjẹwụ-jẹwụ lẹ, achụ ọtụka ọchọkọọ nyamwụ ọwẹ à mwụ eku lẹlẹ. Achụ ịtụka-ịtụka ine tị bwu kwiwa nyamwụ. Ịwa inine jahị da ka ịkịka ine nya odehe ọlẹ.

⁹Achụ ochiche ọhẹ be hụrụ ọhẹ nya achụ ine ịwẹ. Ọngịrị nyamwụ tị nwa lụmẹ gbee pwụ edii bala ọmwẹnụ-ụtụrụ bala okoye nya ọpyị ọnyịịla nya ala Isirẹlụ.

¹⁰Ọngịrị nwa gbee kọ jẹ bá ẹla ta ịdịchụ ayịdang kị ri angịdẹwụ iluhye-ọgba. Ọọwa, ọ chị ịhyẹ nyaa abwọ chị wẹ eji lẹ ọ kpa ata baa lẹlẹ.

¹¹Ọ dọmwụ hu ẹpẹpẹ ju Adịrahụ nya angịdẹwụ iluhye-ọgba. Ọ tụ iya ọlẹ kịị kịla ha Adịrahụ nya angịdẹwụ iluhye-ọgba ẹnụ myị ẹnụ ku bala ọ-kpa ibyi wẹ Ube nya Amkpaa.

¹²Angịnyị họ ang onyobyi ụwa ọkọkọ nya ọ-kịla iya ọlam-ọlam ọlẹnụ myị ẹnụ. Ị yụbwọ la ịgba ọgbagba nya ịlẹhị beji họọ. Achụ ọwẹ nwa kịlahị ẹ-ẹpwu nya ang myị ang ọlẹ kọ họ.

¹³Ụka ọọwa, m̀ wo ká olegu-ẹrụ ọhẹ tọ ọkịla wo yẹkẹẹ, “Ang ịlẹpwụ nya ọyị ọyẹyẹ ọwẹ tị́ ka kịnyaa tata kaka ba anyị-ị̀? Egbeju-ọnyọọngịrị ọlẹ kọ kpa ibyi weji tị́ ka ye iwe nya iya ọlẹnụ myị ẹnụ tata kaka ba anyị-ị̀? Ị tị́ ka kpa ata jẹ angịdẹwụ iluhye-ọgba bala Ube nya Amkpaa chẹẹchẹ̀ẹchẹẹ tata kaka ba anyị-ị̀?”

¹⁴Olegu-ẹrụ ọkịla wẹ yẹkẹẹ, “Ị́ ka kịla iya ọwẹ ka gbee jịra oobyi bala ụtụrụ ụnọ imiiye da ohu ịta (2300) gbẹgbịlẹ ene kị ka ma ịgọgọ chị ju Ube nya Amkpaa. Ọọwa, ị ka dọmwụ nya iya ọkịlaakịla lẹlẹ.”

¹⁵M̀ wẹ kpa irya me ju ang ọlẹ ká etu nya ọyị ọwẹ ka ri lẹ, ọngọhẹ à godayị gẹgịlẹ ị-ịlahị nyam lẹlẹ.

¹⁶Ụka ọọwa, m̀ wo omyi ọhẹ kọ be ẹkọ bwu Ihu nya Ụlayị yẹkẹẹ, “IGebirẹlụ ee, da etu nya ang ọlẹ ká ọlẹng ọwẹ yẹ wụlẹ ya jọọ mẹ.”

¹⁷IGebirẹlụ à wẹ kaka godayị bam ba lẹ, uhi à jum ọtụka-ọtụka gbee kam hị nọnọ yahị kụrụ eji lẹlẹ. Ọọwa, ọ byim yẹkẹẹ, “Ọngịnyị ehe ee, ang ịlẹ ká yẹ ẹ-ẹpwụ nya ọyị ọyẹyẹ nyang ọwẹ ri ẹla chajị nya ọmyịmyị nya odehe.”

¹⁸Ụka kọ wẹẹ kpa ẹlẹwẹ ya, m̀ pwọpwọọ da ka ịpyị yahị kụrụ eji la ọ-jẹ ịlọm ogu ka. Ọ tị yụbwọ chịm, wulem eji godayị kọkọ.

¹⁹Ọọwa, ọ yẹkẹẹ, “M̀ jam ka ya jeng ang ọlẹ kọ juwa ka họ ụka ká Ohe Oluhye ka mẹ agbama nyamwụ jẹ. Ọyị ọyẹyẹ ọwẹ ri ẹla nya ụka ohyẹẹkpẹ.

²⁰“Omilodo o-bwu achụ imiiye ọlẹ ká yẹ ku ọmwakpa nya ịpyị nya ịdịrịhụ nya ala iMidiya bala iPechiya.

²¹Ẹmwụ ku ọmwakpa nya ọpyị nya iGirisi. Achụ ọtụka ọchọkọọ ọlẹpwarịrị nya ahi nyamwụ ri adịrahụ nya ọgbanyẹ.

²²Achụ ine ịlẹ kị ye iwe nya ọtụka ọchọkọọ ku mẹjẹ nyori ọpyị nya iGirisi ka chị ebwo kaka ri ẹpwụma ine kị ka la ịdịrịhụ ine datị-datị. Ọhẹ-lọhẹ nya ẹpwụma ịwẹ-ẹ́ tị ka la ọngịrị lala ọpyị nya ọgbanyẹ myị ka.

²³“Ụka ká ọmyịmyị nya adịrahụ oriri nya ịdịrịhụ ịwẹ-ẹ́ ju chwẹẹ ká ang onyobyi ọhọhọ nyaa-á lụmẹ pwụ ịkịtịjẹwụ-jẹwụ lẹ, adịrahụ onyobyi olegbeju-ọngịrị ọlẹ kọ ri olirikichi à ka ye iwe ku lẹlẹ.

²⁴Ọ ka la ọngịrị kpá nya ịlẹhị-ịlẹhị, ọọwa-á tị ka bwula ọngịrị nya ịlọmwụ ka. Ọ ka kpa ayịreji ọtata oluhi-uhi weji. Ọ ka kịlahị ẹ-ẹpwụ nya ang myị ang ọlẹ kọ juwa họ. Ọ ka ta alegbeju ịlọngịrị ayịreji bala angịny nya Ohe Oluhye ịnyịnyị.

²⁵Ajị nya irikichi nyamwụ, ọ ka kpa ụgbaa ọdada pyebile. Ụka ká angịnyị me okpunyi nyị ji, ọ ka bwaa ịtambiri taa ayịreji. Ọ ka hu ịlọmwụ lala ọwa nyaa gụ wuu lẹlẹ. Ọ dọmwụ ka wuleji bá ẹla ta Ohe Oluhye kọ ri Adịrahụ nya ịdịrịhụ. Ị tị ka tọọ ayịreji, ọọngịrị nya ọngịnyị ehe à tị ka họ ọọwa ka.

²⁶Ọyị ọyẹyẹ chajị nya iya nya ụtụrụ bala obyi ọlẹ kị dawụlẹ jeng-ǹg wẹ ri nya ịlẹhị. Ọhẹ lẹpwụ nyaa-á tị juwa ka họ jịra ịịwẹ ahyaahị lẹkoo. Lẹẹlẹ, ā kpa ya je angịnyị lẹka.”

²⁷Ẹ-ẹkpẹ nya ẹlẹwẹ, m̀ chị ẹpẹtẹkẹẹ, nọ bẹẹ lẹdụrụ kpá ẹnụtụrụ ịmanyị-ịmanyị. Ụka kam hagụ lẹ, m̄ kịnyaa juwa họ ụkụrwọ ịlẹ ká adịrahụ ya jum ụ-ụbwọ lẹlẹ. Ọyị ọyẹyẹ ọwẹ lam ahịbwuu lụmẹ, ḿ gwọọ gàaa ha ịlọm myị ka.