Read idege ỊDANẸLỤ 9 Bible Online

ỊDANẸLỤ 9 - idege bible

ỊDANẸLỤ 9

¹Ụka kọ nọ chẹẹ, ịDarịyọsị ọla iMidi kọ ri ọnyị nya ịSẹkịsisi ri adịrahụ nya ịBabịlọn.

²Ẹ-ẹpwụ nya ẹka nya ọgbanyẹ nya adịrahụ oriri nyamwụ, m wa apwụ nya alọmwụ juwa kpa me irya ju kpụ m̄ jẹ nyori iJerusalẹm ka dụwa kpụ egwawụ-egwawụ ẹ-ẹpwụ nya ẹka iwo irwiye gbẹgbịlẹ jaabwọ ká Amkpaa ya je iJeremaya ọlọmwụ.

³Ọọwa, m̄ jahị kpata da ka ẹga nya Ọngọlahị Ohe Oluhye juwa raabwọ nya ịlẹhị-ịlẹhị bịlọọ bala ọ-hụ limyi lẹlẹ. Ụka ọọwa, m̀ kụrụ awụrụ nya owuru ọkpakpa bala ọ-hụhụ ẹ-ẹpwụ nya agbụ.

⁴M raabwọ ha Amkpaa Ohe Oluhye nyam, juwa ya ịhọbịrị nya angịnyị nyam dodehe jọọ yẹkẹẹ, “Ọngọlahị Ohe Oluhye ee, à la ụmụmẹ bala ọ-la uhi-uhi. À kaa họ ọnụ ọmyịmyị nyang jịra nyọka la ọháha o-gbu enyi-ka ẹ-ẹga nya angịlẹ ká háa kị myị ju ehile nyang ihi.

⁵“Ahị họ ọhọbịrị bala ọ-họ tịpyọ. Ahị la egbeju ọngịrị tang, nyẹẹkpẹ da ehile bala ọmẹjẹ nyang.

⁶Áhị ke ụrụ la alọmwụ anchẹ nyang ịlẹ kị ya ẹla lẹnyị nyang je ịdịrịhụ nyahị bala alegbeju nyahị bala adahị igogo anyị bala alẹpwụma nyahị wuu ka.

⁷Ọngọlahị ee, ahụ lẹ, a kaa họ ang ọlẹ kọ pwoku. Ahị tị kaa kpa oyoyi wẹ ịlọhị jaabwọ kọ lahị ahị angị kụ iJuda bala ala iJerusalẹm bala ala Isirẹlụ ịkịla ịlẹ wuu kị nyi epepe chị ka ọpyị ịlụrụ bala ịchwẹẹrịị datị-datị ịlẹ ka kuhi ka ọọ-lajị nya ọkpẹẹkpẹẹ ọlala-ka nyahị ẹ-ẹga nyang.

⁸Ọngọlahị ee, ịdịrịhụ bala alegbeju nyahị bala adahị igogo anyị họ ang onyobyi bang kpa oyoyi wẹ ịlaa.

⁹Ahị la egbeju-ọngịrị tang kpá odu ịnyị, ahụ Ọngọlahị Ohe Oluhye nyahị ri ọngọ yẹ ahyẹẹrwẹrwa bala ọhịnyọhi.

¹⁰Áhị ju ihi nyang ahụ Amkpaa Ohe Oluhye nyahị bwula ọ-kpa ehile ịlẹ ká ya du alọmwụ anchẹ nyang wahị ka.

¹¹Ala Isirẹlụ wuu bịrị ehile nyang, pwa ọ-ka ke ụrụ lẹla nyang. Ajị nya ọọwa lẹ, ọlọ ịlẹ kị da ju ụ-Ụpwụ nya Ehile nya iMosisi ọnchẹ nyang wuu jam wuhi lẹ.

¹²Jaabwọ ká ya ọwa nyị ka họhị bala alegbeju nyahị à wẹ ká họ lẹ. Bwu edede-edede, á yẹ epweji ọhẹ odehe ọlẹ ụma nya akama onyobyi-obyi ọlẹ ká yẹ iJerusalẹm lẹka.

¹³Akama ịlẹ wuu kị da ẹ-ẹpwụ nya Ehile nya iMosisi wẹ chịhị ọgụ lẹ. Áhị tị myị bịlẹng ahyẹẹrwẹrwa bwula ọ-yẹda bwu ẹpwụ nya ịhọbịrị nyahị bala ọ-dịrẹ ẹla nya ịlẹhị nyang ahụ Amkpaa Ohe Oluhye nyahị ka.

¹⁴Ahu Amkpaa Ohe Oluhye nyahị yẹhị akama jaabwọ ká nwụlanọ nyọka họ, chajị áhị ju ihi nyang ka, à tị kaa họ ang ọlẹ kọ pwoku ụka wuu.

¹⁵“Ọngọlahị Ohe Oluhye nyahị ee, à chị ọngịrị nyang ehe bwula ọ-gba angịnyị nyang kpehe bwu Ijipiti. Ọọwa du ká ẹnyị nyang lehe daalẹ. Ahị họ ọhọbịrị, ahị họ tịpyọ.

¹⁶Ọngọlahị ee, jaabwọ ká kaa ma uya yẹẹhị dada ene-ene lẹ, pwuru agbama nyang hi iJerusalẹm epweji nyang ọlẹ kọ ri ọgbọdọ ọlịgọgọ nyang mẹ. Alẹpwụma ịdagaga juhi kpa iJerusalẹm bala angịnyị nyang hu utungguru ọọ-lajị nya ịhọbịrị nyahị bala ịnya adahị igogo anyị lẹ.

¹⁷Ọngọlahị Ohe Oluhye nyahị ee, wo abwọ ọrịrị bala ọbịlẹ-bịlẹ nyam. Ajị nya ẹnyị nyang lẹ, yẹ ahyẹẹrwẹrwa nya Ube Ịgọgọ nyang ọlẹ kọ kpụ egwawụ-egwawụ dụwẹ chẹẹ mẹ.

¹⁸Ohe Oluhye ee, ke ụrụ lahị, ká chẹhị yẹhị ẹ-ẹpwụ nya akama nyahị bala akama ọlẹ ka epweji nyang ji ẹpwụ nyamwụ wẹẹ. Áhị bịlẹ chajị nyori ahị chịla koo, ma ajị nyori à ri ọlahyẹẹrwẹrwa ịnyị.

¹⁹Ọngọlahị ee, wo omyi nyahị. Ọngọlahị ee, hịnyọhiihi. Ọngọlahị ee, ke ụrụ lahị, ká họ abwọhẹ mẹ. Ā họ atịmẹ kaka, ká angịnyị ā jẹ ká ri Ohe Oluhye ịnyịlẹhị! Epweji ọlẹ bala angịnyị ịlẹ wuu ri nyang.”

²⁰M̀ kịnyaa juwa raabwọ bala o-juwa ya ịhọbịrị nya ịlọm bala ịnya ala Isirẹlụ angịnyị nyam, juwa bịlẹ Amkpa Ohe Oluhye nyam chajị nya iJerusalẹm ọgbọdọ ọlịgọgọ nyamwụ.

²¹Ụka kam wẹẹ kpa abwọ ọwẹ rị, iGebirẹlụ ọlẹ kam yẹ ẹ-ẹpwụ nya ọyị nya ọgbanyẹ ọlẹ kam yẹ à hụ̀ lagaga wẹ ẹga kam ji lẹlẹ. Ụka ọọwa pwoku ụka nya iya nya obyi ọkịlaakịla.

²²Ọọwa, ọ byim yẹkẹẹ, “ỊDanẹlụ ee, m̀ warị nyọka dang ụbwọ ká ka jẹ etu nya ọmwụ ọwẹ.

²³Ụka ká dọmwụ nyọka bịlẹ wẹẹ, Ohe Oluhye wẹng. M̀ warị nyọka ya ọwẹwẹ ọọwa jeng. À há Ohe Oluhye lụmẹ. Ke ụrụ ka wo etu nya ọyị ọlẹ ká yẹ mẹ.

²⁴“Ẹka iwo irwiye ugbabwọ irwiye Ohe Oluhye à chị nọ ene ká angịnyị nyang bala epweji ọlịgọgọ nyang ka la ịlaa bwu ẹpwụ nya akama chajị nya ọhọbịrị bala egbeju ọnyọọngịrị nyaa lẹ. Ụka ọọwa, ọhịnyọhi nya ịhọbịrị, ká abwẹla ọnyịịla o-gbe oyi myị oyi ka yeji, chajị ka ọyị ọyẹyẹ bala ọmwụ ọlẹ kị yẹ ka họ jịra. Ọọwa, ị ka myịmyị-ị̀ chị ịgọgọ ju Ube nya Amkpaa lẹlẹ.

²⁵Aa jẹ ọlẹ myị̀myị mẹ: o-bwu ụka kị ka da ehile myị ọnụ nyọka ma iJerusalẹm nwụ gbee da ka ụka ká olegbeju ọlẹ ká Ohe Oluhye chụ ka wẹ ka ri ẹka irwiye ugbabwọ irwiye. Ụka ọọwa, ị ka ma iJerusalẹm nwụ, da agbayị bwu ụwa bala ọ-chị àjẹ́ ịnyịịngịrị jwọọ yẹẹyẹẹ kọ ka godayị giri-giri ẹ-ẹpwụ nya ẹka iwo ịrwọnyẹ kụrụ ẹka imiiye ugbabwọ irwiye. Ụka ọwẹ tị ka ri ụka nya akama ọtụka.

²⁶Ụka ká ẹka iwo ịrwọnyẹ kụrụ ẹka imiiye ịwẹ-ẹ́ cheju, ị ka nwụ olegbeju ọlẹ ká Ohe Oluhye chụ la o-ye epweji jubwọ lẹka. Olegbeju ọlọngịrị ọhẹ ka kpehe langịdẹwụ nyamwụ kaka ta epweji bala Ube nya Amkpaa ayịreji. Ụka ohyẹẹkpẹ ka wẹ tutuutu lala enyi ọmyị̀myị, ẹwụ ọdada bala ayịreji ọtata ịlẹ kị da neeji ene ka kpeji ụka ọọwa.

²⁷Olegbeju ọọwa ka nwa iro ta iru nya angịnyị ẹ-ẹpwụ nya ẹka irwiye gbẹgbịlẹ. Ụka ká ẹhya nya ụka ọwẹ-ẹ́ tị kam kpá, ọ ka tụ iya ọkịlaakịla bala ọhaha oyeye ku. Ọ ka hu ang-ibyi ọtụka[3] rịrị gede-gede u-Ube nya Amkpaa. Ọ ka rịrị ụ-ụwa gbee ká ọwa ọngọ ya ang-ibyi ọọwa rịrị ụ-ụwa ka ta ayịreji jaabwọ ká Ohe Oluhye nwụlanọ gbọọ.”