Read idege IHoseya 10 Bible Online

IHoseya 10 - idege bible

IHoseya 10

¹Isirẹlụ lala okoji nya alakọnụ ọlẹ kọ nwụ egbe lụmẹ-lụmẹ. Jaabwọ kọ juwa nwụ egbe kaka ba, ịnyịnyị-ịnyịnyị ọ juwa me ogidi lẹ. Jaabwọ kọ juwa há ha epwoja nyaa kaka ba, ịnyịnyị-ịnyịnyị ị kaa ya ajwọ ikiliya ha ijiga ị-hagụ ilene weji lẹ.

²Ọkịlẹtụ nyaa myị̀ la ụgbaa lẹ, ị ka yẹ akama chajị nya ịhọbịrị nyaa. Amkpaa ka be ogidi nyaa ene bala o-hu ajwọ ikiliya nya cheji.

³Ala Isirẹlụ ka yẹkẹẹ, “Áhị la adịrahụ ka chajị nyọlẹ kahị ju ihi nya Amkpaa ka. Ọ́ tị dọmwụ riri kahị la adịrahụ, ányị ọ tị́ ka họ hahị ene-è?”

⁴Ị́ kaa ya ẹla o-ju apyobwuna ka. Ị kaa myị ọnụ ha awụlẹ ma, ị́ tị kaa họ ọnụ ọmyịmyị ịịwa cheju ka. Angịnyị kaa wu awụlẹ ka ịkọọtị. Ị lala ákọ i-ju ẹhwa ịlẹ kịị bwu rịrị ụ-ụwa ọ-ọpyị ọlẹ kị bwurwọọ kị juwa ka ya ang tọ.

⁵Angịlẹ kịị nọ ẹpwa ụ-ụwa ị-ịSameriya ka chị uko chajị nya ukpeku nya ẹna ọla ịBẹtị-avẹn. Angịlẹ kị kaa gbịgba họọ bala angịkiliya nyamwụ ka jida chajị nyamwụ bwula ọlẹ kị hu ihi nya ukpeku ọọwa kpa rụ.

⁶Ị ka ya ukpeku ọọwa nwụ uri ha adịrahụ ọtụka nya ala Asiriya. Ị ka hu ẹpẹpẹ ju ala Isirẹlụ. Oyoyi ka jwaa chajị nyọlẹ kị gbịgba ha ijiga.

⁷Jaabwọ ká une nya ọwụ kaa mwụ u-uhye nya ugbenyi, ịnyịnyị-ịnyịnyị ị ka hu Adịrahụ nya ala ịSameriya kpa rụ ka Asiriya lẹlẹ.

⁸Ị ka bịrị ẹga ọgbịgba ha ijiga ọlẹ ká ala Isirẹlụ kaa họ ang onyobyi ụ-ụwa a-Avẹn. Ejwo bala amẹ ka bwu u-uhye nya ogidi nya ijiga nyaa ịịwa. Ị ka byi ịgbọdọ ya anụ nyị ke ịwa bala ọ-chabwọ mịla ịwa mẹ.

⁹Ala Isirẹlụ-ụ́ kpụba la ọ-họ ịhọbịrị bwu ụka-ụka kị họ ang onyobyi i-iGibiya ka. Lẹẹlẹ, ẹwụ-ụ́ ka ryaa i-iGibiya ka-á?

¹⁰M̀ juwa ka chịnụ anụ alọhọbịrị ọgụ kam ka yẹnụ akama. Ẹpwụma ịkịla ka yẹ julawụlẹ tụụnụ pyịpyị. Ị ka yẹnụ akama nya ịhọbịrị ịlẹ kanụ họ.

¹¹Ịnọ Ịsirẹlụ lala ụgba nya ẹna ọlẹ kị mẹ ẹla jẹ, kọọ họ́ọ nyọka ri ajẹ nya amẹ. Ma, m̀ ka ya ogbilo dọọ ụ-ụkpụrọkọ ọnyịịla nyamwụ. M̀ ka kpọọ bwuru ịpyị. IJuda ka wu ang, Isirẹlụ be ịpyị ene.

¹²Ya ajẹ nya abwẹla ọnyịịla tọ ha ịlọng, ká wụ ọháha o-gbe oyi myị oyi mẹ. Be ọpyị ọnyẹnyẹ nyang ene mẹ. Ụka pwụ ká ka tịtọ nya Amkpaa chajị kọ ka warị ka do abwẹla ọnyịịla kụrụụhị lẹ.

¹³Chajị nyọlẹ kanụ wu abwẹla onyobyi lẹ, anụ ka wụ egbe nya akama. Anụ ri egbe ịlẹ ká ọnọọkịla nyanụ kaa nwụ. Anụ dahịhile ọngịrị bala iru ojuju nya ọgẹwụ nyanụ.

¹⁴Chajị nya ọọwa lẹ, angịnyị nyanụ ka wo iru nya ẹwụ ọdada. Alẹwụ ka bịrị ẹga ị-kpụ ịbaa nyanụ wuu. Ọ ka lala ụka ọlẹ kị dẹwụ, kị go anyị bala ịnaa nwụ lawụlẹ nmẹẹnmẹẹnmẹẹ.

¹⁵Ẹla ọlịnyị à ka họ ẹ-ẹga nyang chajị nya ang onyobyi ịlẹ ká họ lẹlẹ. Ahụ ịBẹtẹlụ, ụka ọlẹ kị dọmwụ nya ẹwụ ọdada ọọwa lẹ, Adịrahụ nya ala Isirẹlụ a ka gbu lẹlẹ.