Read idege IHoseya 11 Bible Online

IHoseya 11 - idege bible

IHoseya 11

¹Ụka ká ala Isirẹlụ lụmẹ lẹka lẹ, ọ hám. M̀ be ẹkọ wụrwọọ gbọọ kpehe bwu Ijipiti.

²Jaabwọ kam juwa be ẹkọ wụrwaa, ịnyịnyị-ịnyịnyị ị juwa rụ hwẹẹẹẹ lụrụ him gụ olene lẹ. Ị kaa kịla iya ha ịBaalụ bala ọ-kịla iya nya ịtangare ha ijiga.

³Ma, am kpangga à tị mẹ ẹdịyẹ ọjẹjẹ jẹ ala Isirẹlụ bala o-hwaa kpa ụ-ụbwọ nyam lẹ. Tị kpọkpọọkpọ, ị́ tị jẹ ya am a haa uda ka.

⁴M̀ táa ba ịlọm la ahyẹẹrwẹrwa bala ọháha. M̀ chị ogbilo eku hyaa ụ-ụkpụrọkọ. M̀ hirikpẹẹ ya ang haa ri.

⁵Alẹwụ ka myịmyị-ị̀ kụrụ ala Isirẹlụ. Ị ka la jaabwọ ọlẹ kị la ụ-ụwa Ijipiti. Ị ka kpa angịkịla ka ọpyị nya Asiriya ka ekpeleji nya Adịrahụ nya ala Asiriya. Ang odudu ri ị́ tịtọ nyọka nyà tịrẹkpẹ chịm ọgụ kaka.

⁶Ẹwụ ọdada ka chaa ọgụ e-epweji nyaa. ị ka bịrị ogirigba nya epweji nyaa bala ọ-ta angịnyị ayịreji chajị nya irya ọtịpyọ nyaa ịlẹ kịị mẹ.

⁷Angịnyị nyam cheje nyọka rụ him lẹ. Ó-ri kị dọmwụ be ẹkọ wụrwaa nyọka nyà chị Ohe Oluhye ọgụ. Ọ́ tị ka myị-ị̀ daa ụbwọ ka.

⁸Ala Isirẹlụ ee, ányị m̄ tị́ ka jẹ-ẹ̀ pẹhiinu? Ányị m̄ tị́ ka jẹ-ẹ̀ yanụ ju angịnyị ụ-ụbwọ? Ányị m̄ tị́ ka jẹ-ẹ̀ tanụ ayịreji lala ala Admaa lee ala iSeboyim? Ọkịlẹtụ nyam á ka jẹ-ẹ̀ myị ham m̄ ka họnụ ịnyị ka. Ọháha ọlẹ kam la hanụ á gbu ka.

⁹Ḿ ka yẹnụ akama lagbama ka. Ḿ ka ta Isirẹlụ ayịreji myịmyị kaka. Ohe Oluhye m̄ ri lẹ, ḿ ri ọngịnyị ehe ka. M̀ ri ọngọ la ịgọgọ ọlẹpwarịrị nyanụ. Ḿ ka chịnụ ọgụ la agbama ka.

¹⁰Ala Isirẹlụ ka dịrẹ Amkpaa. Amkpaa ka juwa warụ lala ugẹbẹ. Anyị nyamwụ ka nyà chọọ ọgụ bwu ọmwẹnụ-obyi juwa hụ́ kpákpaakpa.

¹¹Ị ka hụhụ lala ịchịnụ nyà bwu Ijipiti lee lala enewulo bwu Asiriya. M̀ ka myịmyị-ị̀ tịraa ẹkpẹ ka ẹpwa nya ịlaa. Ịnyị am Amkpaa a ya lẹ.

¹²Isirẹlụ dagaga jum la ịnịịkịla bala ụgbáa. Ma, iJuda ji ẹkpẹ da Ohe Oluhye Ọlịgọgọ nya ala Isirẹlụ.