Read idege IHoseya 12 Bible Online

IHoseya 12 - idege bible

IHoseya 12

¹Alụtụrụ gbee ka ju ka alobyi Isirẹlụ juwa ku ọhụ o-bwu ọmwẹnụ-obyi. Ụgbáa bala agbụrụ ọhọhọ ji ẹga myị ẹga. Ị nwa iro bala ala Asiriya. Ị nwụla ida kpa rụ ka Ijipiti.

²Amkpaa la ẹla ba iJuda. Ọ tị juwa ka yẹ ala Isirẹlụ akama ịnyịnyị chajị nya ang ịlẹ kị họ. Ọ ka nwaa uri tịrẹkpẹ jaabwọ ká abwẹla nyaa la.

³IJekọbụ yụbwọ chị ọnyịnamwụ i-ichẹtẹ bwu ẹpwụ-ẹpwụ nya ịnamwụ. Ụka kọ tị ka ri ọngọgbahị, ọ ma uya ta Ohe Oluhye.

⁴Ọ ma uya bala olegu-ẹrụ gbee kọ kụrwọọ. Ọ jida bala ọ-bịlọọ kọ ka wahị kụrwọọ. Ụka ọọwa lẹ, Amkpaa a tọọ ụ-ụwa ị-ịBẹtẹlụ lẹ, ọ ya ẹla tọọ lẹlẹ.

⁵Amkpaa Agụgụ, ẹnyị nyamwụ a ri Amkpaa lẹ.

⁶Chajị nya ọọwa lẹ, nyà tịrẹkpẹ chị Ohe Oluhye nyang ọgụ mẹ, anụ anyị nya iJekọbụ. Anụ la ọháha bala ọ-la kpẹẹkpẹẹ kanụ da ọhụ pịlẹẹ juwa godayị gbe Ohe Oluhye mẹ.

⁷Ọngọ da ọhị ọlẹ kọ kpa ang ọ-kpa me ang ẹpwụ ọlẹ kọ la kpẹẹkpẹẹ ka aalẹ, ọngịnyị ọ-họ ri họ́ọ.

⁸Isirẹlụ yẹkẹẹ, am kpụ ụdụ lẹ, m̀ họ ọlẹ kam la ang lụmẹ lẹ. Ẹ-ẹpwụ nya ang ịlala nyam wuu tị lẹ, ḿ họ ang ọhẹ-lọhẹ ọlẹ kọ ri ọhọbịrị ka.

⁹Isirẹlụ, am a ri Ohe Oluhye nyanụ jaabwọ ọlẹ kam ri Ohe Oluhye bwu ụka ọlẹ kanụ juwa ọ-ọpyị nya Ijipiti lẹ. M̀ ka họ anụ ka myịmyị-ị nọ ẹpwa a-adáa myịmyị jaabwọ kanụ họ u-ugbileji.

¹⁰M̀ ya ẹla ta alọmwụ, m̀ wụrụ haa ọlẹ kị yọyị lẹhị nya olegu lụmẹ-lụmẹ. Bwula alọmwụ, m̀ kaa danụ ọna kanụ ka ta ayịreji ka.

¹¹Ị họ ang onyobyi ọtụka-ọtụka i-iGiliyadị lẹ, ị ka ta ayịreji gbanggbang. Ị ya ịna kịla iya ụ-ụwa i-iGiliyadị. Chajị nya ọọwa lẹ, ogidi ịlụwa ka yẹ la ajwọ ịlẹ kị tụguru ụ-ụwa ẹ-ẹpwamẹ.

¹²IJekọbụ adanụ ogogo rụnyẹ rụ ka iMesopotemiya. Ọọwa lẹ, ọ gbe ịkpịlọ ụ-ụwa chajị kị ka ya ahụ họọ lẹlẹ.

¹³Bwula ọlọmwụ ọọwa Amkpaa a gba ala Isirẹlụ kpehe bwu ọpyị nya ala Ijipiti lẹ. Bwula ọlọmwụ ọ tị kpẹhị rịraa ịnyịnyị lẹ.

¹⁴Isirẹlụ hu agbama ọtụka-ọtụka ju Amkpaa lẹ, chajị nya ọọwa lẹ, Amkpaa ka wọọ uri nya ang onyobyi nyamwụ bala ẹpẹpẹ ọlẹ kị hu jwọọ.