Read idege IHoseya 13 Bible Online

IHoseya 13 - idege bible

IHoseya 13

¹Ene-ene lẹ, ó-ri ká imwawụ nya Ifurem-ḿ ya ẹla, imwawụ nya Isirẹlụ ịkịla kaa hụ́ kpákpaakpa chajị ọ ri imwawụ ọlẹ kị hu hwaa Isirẹlụ. Ma, ị họ ang onyobyi chajị nyọlẹ kị gbịgba ha ịBaalụ lẹ. Ị ka gbu.

²Ọlẹẹlẹẹ, ị myịmyị juwa kịlahị la ọhọbịrị ọhọhọ bwula ọ-họ ukpeku nya okpoko onyoowuru la abwụma nya ẹna ha ịlaa. Angị jẹ ịbańg à tị họọ ekpeku ịịwa lẹ. Ma, ị tị juwa byi awụlẹ ya anụ nyị kịla iya haa kaanụ nyị jwaa ọnụ.

³Chajị nya ọọwa lẹ, ị ka myị yịra-yịra lala amwụ nya ụtụrụ gbegbegbe, lee ewoo nya ang ịlẹ ká igbachịwụ kaa da hụrụ lee ịmwụ ọlẹ kọ kaa kpehe bwu iwa nya ugulọ.

⁴Am a ri Ohe Oluhye nyanụ bwu ụka-ụka ọlẹ kanụ juwa Ijipiti gbee daalẹ lẹ. Am ụbwọm a ri Ohe Oluhye ọlẹ kanụ jẹ lẹ. Ọngọchịda ọkịla ọhẹ-lọhẹ á tị ji dalam kaka.

⁵Am a ya ang hanụ ri lẹ ụ-ụwa u-ugbileji ọlẹ ká enyi-í ji ka lẹ.

⁶M̀ ya ang hanụ ri wu ẹpwụ gbee kanụ-ụ̀ hi ọbọọchẹ. Ọọwa lẹ, anụ deeri nyam lẹlẹ.

⁷Chajị nya ọọwa lẹ, m̀ ka ma uya tang lala ugẹbẹ bala ọ-kpụ ịbaa gbeng ụ-ụgbẹyị lala ijwo.

⁸M̀ ka gba mịlang lala ijwo ọlẹ kị gọ anyị nyamwụ. M̀ ka gung ẹpwụ ene. Ọọwa lẹ, m̄ ka ring ri lala ugẹbẹ lẹlẹ. M̀ ka gung ene wuu hwẹnghwẹng lala iyo ọnyọọngịrị.

⁹Isirẹlụ ee, m̀ ka tang ayịreji. Ụka ọọwa, oowo à tị́ ka jẹ-ẹ̀ dang ụbwọ myị?

¹⁰Ale ịdịrịhụ nyanụ ịlẹ kanụ byim yẹkẹẹ, Ya ịdịrịhụ bala angị kpẹhị rịrịịhị hahị chajị kị ka gbehi à tị́ ji? Epweji nyanụ oyina kpakpaakpa a tị́ la angị kpẹhị rịraa?

¹¹Ẹ-ẹpwụ nya agbama m̄ ya adịrahụ hanụ lẹ. Ẹ-ẹpwụ nya agbama ịnyịnyị m̄ tị kpa nunu lẹ.

¹²Ị da ịhọbịrị ịlẹ ká Isirẹlụ họ ju ụ-ụpwụ. Ọọwa lẹ, ị ya nụwa a-ang lẹlẹ.

¹³Isirẹlụ la iwe kọ ka myịmyị-ị̀ hị̀ wẹẹ, ma ọ chị uchi lụmẹ lẹ, ọ́ myị họ ịnyị ka. Ọ lala ọnyị ọlẹ ká ụka nya ọmama nyamwụ pwụ lẹ, ma ọ́ tị myị kpehe bwu ẹpwụ nya ịnamwụ ka.

¹⁴M̀ ka gbaa kpehe bwu ẹpwụ nya ọngịrị nya iworu lee ọ-chaa da bwu ẹpwụ nya igu-ú? Igu ee, ale ẹdụrụ ọlẹ ká kaa ya jụ ọngịnyị à tị́ ji? Iworu ee, ale ayịreji ọtata nyang à tị́ ji? Ḿ juwa yẹ ahyẹẹrwẹrwa nyaa kaka.

¹⁵Ọ ri ịnyịlẹhị, iwe-ahụrụ nyang ka hagụ ịnya aanang ịkịla myị, m̀ ka du ọhụ o-bwu ọpyị ọchọrụ ọlọmwẹnụ-obyi kaka chịng ọhụ kịra-kịra. Ẹmwụ nyang ka nwụ wuu gbanggbang. Ọ ka bịrị ang ịnyịịla ịlẹ ká la wuu.

¹⁶ỊSameriya ka yẹ akama chajị nyọlẹ kị la egbeju-ọngịrị tam Ohe Oluhye. Ẹma nya ẹwụ ka ryaa Ị ka go anyị nyaa ichiche nwụ nmẹẹnmẹẹ chịịrụ. Ị ka gu anyang nyaa ịlẹnyị ẹpwụ ene.