Read idege IHoseya 14 Bible Online

IHoseya 14 - idege bible

IHoseya 14

¹Isirẹlụ ee, nyà tịrẹkpẹ chị Amkpaa Ohe Oluhye nyang ọgụ mẹ. Ịhọbịrị ịlẹ ká họ a du ká chị ụchụụ mileji lẹ.

²Tịrẹkpẹ ka ẹga nya Amkpaa ká ya ẹla ịlẹ tọọ yẹkẹẹ, “Hu ịhọbịrị nyahị wuu kpa rụ chajị ká wo abwọ ọrịrị nyahị mẹ aalẹ, àhị ka gwogbo hang jaabwọ kahị myị ọnụ kahị ka họ lẹ.”

³Asiriya-á ka chịhị da myị ka. Anyịrẹ ị-kpa dẹwụ nyahị ka jẹ-ẹ̀ chịhị da ka ịnyịnyị. Áhị ka myịmyị-ị̀ wụrụ ijiga nyahị Ohe Oluhye nyahị kaka. Ẹ-ẹga nyang anyị-egu à kaa ye ụbwọ ọdada lẹ.

⁴Amkpaa yẹkẹẹ, “M̀ ka tịrị angịnyị nyam ẹkpẹ nyà chị ịlọm ọgụ myịmyị. Ị ka hám bwu ẹpwụ nya ọkịlẹtụ nyam wuu. Ḿ ka myịmyị-ị̀ ju agbama taa kaka.

⁵M̀ ka la jaabwọ ká amwụ kaa kpụ ha ala Isirẹlụ. Ọọwa lẹ, ị ka ju jwọọjwọọ lala edamẹ ịla ụ́tọ lẹlẹ. Ị da atẹ ka ọ̀jọjọ lala ekeji ịla ipyinu nya ala iLibanọn.

⁶Ábwọ nyamwụ ka pyẹ maaa kụrụ ẹga lụmẹ-lụmẹ. Ọ ka há ụhị lala okoji nya olivu. Ọ tị ka choru kwọkwọ lala ipyinu ọla iLibanọn.

⁷Ị ka kụ ekpeleji nya achwọ nyam myịmyị, ị ka wu ẹrụ nya igbi. Ị ka nwụ egbe yẹẹyẹẹ lala ẹrụ nya alakọnụ. Ị ka lala ere o-bwu iLibanọn.

⁸Ifurem ee, m̀ tị́ ka họ anyị la ekpeku mẹ? Am a kaa kpẹhị rịrịịnụ lẹ. M̀ lala okoji ọ-nwụ egbe ịlẹ kanụ kaa ri.”

⁹Ọngọ jẹ ẹla ā jẹ ang ịlẹ mẹ. Chajị ụgbẹyị nya Amkpaa la kpẹẹkpẹẹ. Angịnyị ịnyịịla kaa jẹdịyẹ ụ-ụgbẹyị nya Ohe Oluhye. Alọhọbịrị kaa chị ụchụụ bwu ụwa.