Read idege IHoseya 2 Bible Online

IHoseya 2 - idege bible

IHoseya 2

¹Byi anyịnang alẹng ya “angịnyị nyam,” ká byi ọnyịnang ọnyang ya “ọngọlẹ kam yẹ ahyẹẹrwẹrwa nyang.”

²Anụ bịlẹ ịnanụ mẹ, ọ ri ịnyịlẹhị ọ́ ri ahụ nyam kaka, ḿ tị ri ọrụmwụ kaka. Anụ tị bịlọọ kọ ka hịnyọhi akpara ọhọhọ nyamwụ mẹ.

³Ó-ri kọ hịnyọ ka, m̀ ka yọọ apwụ chajị kọ ka ji lọhị-lọhị jaabwọ kọ la ụka kị mọọ. M̀ ka họ ọ ka chị ọhụ kịra-kịra lala ọpyị ọchọrụ. M̀ ka nwọọ la imyi-enyi.

⁴Ḿ ka ya ahyẹẹrwẹrwa nya anyị nyamwụ ka chajị ị ri anyị nya ọlakpara.

⁵Ịnaa họ akpara. Ọngọ jẹ ẹnyị maa họ ẹla ọ-la oyoyi. Ọ byilọmwụ yẹkẹẹ, “M̀ ka ka ẹga nya angị ham ha. Ị ka ya ang oriri bala enyi ọnwanwa bala ang ịkụrụ-kụrụ bala ida bala ere ham.”

⁶Lẹẹlẹ, m̀ ka ba iku nya ajwọ dagaga jwọọ bala o-me ugulọ yọọ dada chajị kọ ka jẹ ụgbẹyị nyamwụ ka.

⁷Ọ ka rụnyẹ ba angị họọ há, ọ́ tị ka waa ọyị ka. Ọ ka pịlahị nyaa, ọ́ tị ka yaa ka. Ụka ọọwa, ọ ka yẹkẹẹ, “M̀ ka tịrẹkpẹ ka ẹga nya ọrụ nya ọgbanyẹ nyam lẹ, chajị ang há ham ụka kam juwa tọọ gụ ụka ọlẹẹlẹẹ.”

⁸Ọ́ jẹ ká am a ya ajẹ nya amẹ bala ere bala ida bala iru nya okpoko ịgọm ịlẹ kị kaa kpa gbịgba ha ịBaalụ họọ ka.

⁹Chajị nya ọọwa lẹ, m̀ ka naa ajẹ nya amẹ nyam ịlẹ kam ya haa lụka ọlẹ kị wu ang nya ẹrụ. M̀ ka naa ida ụka ká ụka nyamwụ á pwụ. M̀ ka myịmyị-ị̀ naa ang ịkụrụ-kụrụ ịlẹ kam ya haa kị ka ya ke o-ji lọhị-lọhị nyaa.

¹⁰M̀ ka yọọ ịpwụ ji lọhị-lọhị ị-ịlahị nya angị họọ ha. Ọngọngọhẹ-ẹ́ tị ka jẹ-ẹ̀ gbọọ kpehe bwu ụbwọ nyam myị kaka.

¹¹M̀ ka hwọọ abwọ la ụya ọyaya ọnyị myị ọnyị, tụ ụya ọyaya lụka nya ọya onyeewe bala ịlụka nya Ẹnụtụrụ Ọhịnyọ Lụkụrwọ bala ụya ọyaya nya ịgba ọgbagba ịlẹ kị kaa hunọ ụkụụka.

¹²M̀ ka bịrị ekeji nya alakọnụ bala ikiledu nyamwụ ịlẹ kọ ya aligu nyamwụ nyị ya nwọọ uri. M̀ ka yẹ ekeji ịịwa la ẹpwụmẹ, iyo ịlẹpwamẹ ka taa ayịreji wuu.

¹³M̀ ka yọọ akama chajị nya ụka ọlẹ kọ deeri him, kọ kịla iya nya ịBaalụ bala o-go ịjang ịdaabwọ bala ang idoomyị nyamwụ da kọ dịrẹ angị họọ há. Ịnyị Amkpaa a ya lẹ.

¹⁴Lẹẹlẹ, m̀ ka tụ ịpẹpẹ hwọọ, kpọọ ka ugbileji kam ka ya ẹla tọọ kpẹnẹẹ.

¹⁵M̀ ka tịrị iku nya alakọnụ nyamwụ ẹkpẹ họọ bala ọ-họ ká Ọkpọọ nya Akọ ka ri ọnang nya ẹhị ọrịrịị-rịrị. Ọ ka wo ẹla nyam ụ-ụwa jaabwọ kọ kaa họ lụka nya ọyẹẹnọ oriri nyamwụ bala lala ụka kọ gba kpehe bwu ọpyị nya Ijipiti.

¹⁶Ẹnụtụrụ ọọwa, a ka wụrụm “ọrụ nyam”. Á ka myịmyị-ị̀ wụrụm “ịBaalụ nyam” kaka. Ịnyị Amkpaa a ya lẹ.

¹⁷M̀ ka gba ẹnyị nya ịBaalụ kpehe bwu ọnụ nyamwụ. Ị́ ka myịmyị-ị̀ gu ẹnyị nyamwụ kaka.

¹⁸Ẹnụtụrụ ọọwa, m̀ ka nwa iro bala iyo ịlẹpwamẹ bala ịchịnụ bala ang ịwụlọọ-wụlọ chajị kị ka họ angịnyị nyam ang ka. M̀ ka myịmyị-ị̀ mwụ eda bala ẹma nya ẹwụ eku bala ọ-kpụ ẹwụ ọdada ba ọ-ọpyị chajị kanụ ka kụ lokpunyi.

¹⁹Ọọwa lẹ, m ka hung nya ahụ nyam gbe oyi myị oyi lẹlẹ. M̀ ka hung nya ahụ nyam ẹ-ẹpwụ nya abwẹla ọnyịịla bala ịnyịlẹhị bala ẹ-ẹpwụ nya ọháha o-gbe oyi myị oyi bala ahyẹẹrwẹrwa.

²⁰M̀ ka họ ọnụ ọmyịmyị nyam jịra bwula o-yeng nya ahụ nyam. Ọọwa lẹ, a ka jẹ Amkpaa lẹlẹ.

²¹Amkpaa yẹkẹẹ, “Ẹnụtụrụ ọọwa, m̀ ka ya ẹla ta egbamwụ, ọ ka do enyi kụrụ ịpyị.

²²Egbe nyang bala ekeji ị-kpa họ ere bala ida ka bwu bwu ịpyị chajị ị ka wụrụ angịnyị nya iJesiryẹlụ ‘Ohe Oluhye ya tọ’.

²³Ọọwa, m̄ ka yọọ kụ ọ-ọpyị ọọwa ha ịlọm lẹlẹ. M̀ ka la ahyẹẹrwẹrwa u-uhye nya ọngọlẹ ịnọ kị la ahyẹẹrwẹrwa u-uhye nyamwụ ka. M̀ ka byi angịlẹ ịnọ kị ri angịnyị nyam ka ya ‘anụ ri angịnyị nyam’. Ọ tị ka byim ya ‘ahụ a ri Ohe Oluhye nyam lẹ.’ ”