Read idege IHoseya 4 Bible Online

IHoseya 4 - idege bible

IHoseya 4

¹Anụ ala Isirẹlụ, anụ ke ụrụ kanụ wo ẹla ịlẹ ká Amkpaa wẹẹ chị ba angị kụ ọpyị ọlẹ mẹ. Ọngọngọhẹ-ẹ́ jam ọ-ọpyị ọlẹ kọ chịla o-hu ọkịlẹtụ ha lee ọ-myị jum lee ọ-jẹm ya am a ri Ohe Oluhye ka.

²Ọlọ ọgaga bala ọnọọkịla omeme bala angịnyị ọnwụnwụ bala agbụrụ ọhọhọ bala ụchị ọhọhọ a ri ang ịlẹ ká angịnyị wẹẹ họ ụka wuu lẹlẹ. Myịmyị angịnyị ịnwụnwụ ji ụka myị ụka.

³Lẹẹlẹ, ọpyị nyanụ ka chị ọhụ wuu kịra-kịra lẹ. Ang ịhịhị ịlẹ kị juwa wuu ka gbu tụ iyo ịlẹpwamẹ bala ịchịnụ bala iyenyi wuu ka gbu.

⁴Anụ angịkiliya ā gbe ẹla ju ọngọngọhẹ lee o-ya alibyi la ọngọngọhẹ ka. Anụ angịkiliya m̄ kpa ẹla ta lẹ.

⁵Anụ angịkiliya ka kịlata lẹnụ, alọmwụ ka kịlata lodu ịnyịnyị. M̀ ka ta Isirẹlụ ịnanụ ayịreji.

⁶Angịnyị nyam ta ayịreji chajị nya ájẹjẹ-ka. Anụ angịkiliya pwa ang ọjẹjẹ lẹ, m̀ tị̀tị pwanụ nyọka ri angịkiliya ham lẹ. Jaabwọ kanụ deeri hi ehile nyam wẹẹ, m̀ ka deeri hi anyị nyanụ ịlẹ kanụ ma ịnyịnyị.

⁷Jaabwọ ká angịkiliya-á juwa ju iru kịlahị-ịlahị kaka ba, ịnyịnyị-ịnyịnyị iru ojuju nya ịhọbịrị ịlẹ kịị họ bam a juwa gụ olene-ene lẹ. Lẹẹlẹ, m̀ ka yẹ ihi ọlala nyaa kpata ka ri oyoyi lẹ.

⁸Anụ ju angịnyị ọhụ kị ka họ ang onyobyi chajị kanụ ka kpụ ụdụ la ang nya ịhọbịrị nyaa ịlẹ kị juwa kpa ka ha ọhaha.

⁹M̀ ka yẹnụ anụ angịkiliya akama jaabwọ kam ka yẹ angịkịla akama. M̀ ka nwụnụ uri nya ang onyobyi ịlẹ kanụ họ tịrẹkpẹ hanụ.

¹⁰Anụ ka ri ang, ma ánụ tị ka wu ẹpwụ ka. Anụ ka juwa họ ụya myị, ma anụ tị ka ma anyị ka. Ang odudu ri anụ jahị kpata him am Ohe Oluhye.

¹¹Ụchị ọhọhọ bala ere ọbacha bala ere onyeewe hu irya nya angịnyị nyam ọlẹ kị ka kpa jẹ ẹla kpa rụ lẹ.

¹²Angịnyị nyam tọ ekpeku ịtọ wo ká ekpeku ka mẹ ẹla jaa. Eku nya ekeji ịwẹ ị ka towo nyọka mẹ ẹla jaa lẹ-ẹ́? Jaabwọ ká alakpara kaa bwu ẹga nya ọngọhẹ ka ẹga nya ọngọkịla, ịnyịnyị ị juwa ku ihye ịkịla lẹ. Ị tụụbwọ hi Ohe Oluhye nyaa lẹ.

¹³Ị juwa kịla iya ha ijiga u-uhye nya ịgbọdọ bala e-ekpeleji nya ekeji ịlẹ kịị kpụ ụrụrụ. Lẹẹlẹ, anyị anyang nyanụ bala anyịnịna nya ịhụ nyanụ ịlẹ kị ri anyang ri alụchị.

¹⁴Ḿ ka yẹ anyị anyang lee anyịnịna nya ịhụ nyanụ anyang akama ụka kị họ ụchị ka, chajị anụ lịlọnụ kaa họ ụchị ịnyịnyị. Anụ kaa kịla iya bala alakpara u-ube ịgọgọ nya Ohe Oluhye. Angịnyị ịlẹ kị jẹ ẹla ka kà ta ayịreji.

¹⁵Isirẹlụ a ri ọlakpara, ma ā tị kpa iJuda ju ka ẹpwụ nya ọhọbịrị ka. Ā ka iGiligalụ lee ịBẹtị-avẹn kaka gbịgba ka lee ọ-myị ọnụ nya ẹlẹlẹhẹ lẹnyị nya Amkpaa ya “Nya ịlẹhị jaabwọ ká Amkpaa juwa hịhị ka.”

¹⁶Anụ ala Isirẹlụ la egbeju-ọngịrị lala ụgba nya ẹna ọlẹ kọ kaa wo ẹla ka. Lẹ, ányị Amkpaa a tị́ ka họ kọ ka kpanụ ri jaabwọ kị kaa kpa ọnyị nya ọkpịlọ ri edamẹ mẹ?

¹⁷Ala Isirẹlụ yẹ kpịla la ijiga ọkpụkpụ lẹ! Anụ bahyaa kị họ ang ọlẹ kọ baa mẹ.

¹⁸Ụka kị nwa ere kpá, ị jikpata ka họ ụchị. Ang oloyoyi háa gụ ang ọ-ka họ kị ka lihi.

¹⁹Lẹẹlẹ, ugbọchịrị ka goonu hụrụ. Iya ọlẹ kanụ kaa kịla ha ijiga ka lanụ oyoyi.