Read idege IHoseya 5 Bible Online

IHoseya 5 - idege bible

IHoseya 5

¹Angịkiliya, anụ ke ụrụ! Anụ ala Isirẹlụ, anụ wo mẹ-ẹ! Anụ alẹpwa nya adịrahụ, anụ ke ụrụ. Anụ ị wẹẹ ka la eje ọwẹ lẹ. Anụ lala ụnya o-wu angịnyị i-iMisipa bala ụgbọwụ ọlẹ kị ka da gbe ang ọ-ọgbọdọ nya ịTabọ.

²Anụ lala ụtụjẹ okpori-kpori ọlẹ kị chị i-iChitim, ma m̀ ka yẹnụ akama.

³M̀ jẹ ang myị ang wuu chajị nya ala Isirẹlụ, ang ịlẹ kị họ-ọ́ kpịbaa him ka. Anụ wuu họ ụchị, Isirẹlụ ee, à chị ịrị.

⁴Ang ịtịpyọ nyaa ịlẹ kị kaa họ á myị haa ị ka tịrẹkpẹ wẹ ẹga nya Ohe Oluhye nyaa kaka. Akpara ọhọhọ yẹ ri ori ọ-chaa chị lẹ. Ị́ jẹ ya am a ri Amkpaa lẹ kaka.

⁵Ọbọọchẹ ohihi nya ala Isirẹlụ yaa dodehe lẹ. Ala Isirẹlụ ka kịlata chajị nya ịhọbịrị nyaa. Ala iJuda ka kịlata balaa ịnyịnyị.

⁶Angịnyị ka kpa ịmwụ bala ịgọdọ nyaa warị nyọka ya gbịgba ha Amkpaa, ma ị́ tị ka yọọ myị ka chajị Amkpaa rụ hyaa lẹ.

⁷Ị́ chịla o-hu ọkịlẹtụ ha ẹ-ẹga nya Amkpaa ka. Bwula akpara ọhọhọ ọọwa ị ma anyị nyaa lẹ. Ụka nya ẹka ogugu nya ọya onyeewe anụ bala ang-ẹrụ nyanụ ka ta ayịreji.

⁸Chị ẹkụrwẹ i-iGibiya, ká chị oko ị-ịRama. Da ọna ị-ịBẹtị-avẹn chajị ká angịnyị a kpahị ju ịlaa. Dọmwụ nya ẹwụ ọdada mẹ, anụ ala iBenjamịn.

⁹Ụka nya akama ọyẹyẹ juwa warị. Ị ka ta Isirẹlụ wuu ayịreji. M̀ ya je imwawụ ịla Isirẹlụ ya ẹla ọọwa ri opyii kọ ka họ lẹ.

¹⁰Alegbeju nya ala iJuda lala alagbụrụ ịlẹ kịị hu ang o-ju oyi ẹjẹẹ. M̀ ka ya agbama nyam kụrwaa lala enyi.

¹¹Ị tụ Isirẹlụ pyịpyị, akama dọọ abwọ yịgẹ-yịgẹ chajị nyọlẹ kọ chị eje nyọka dịrẹ ijiga lẹ.

¹²M̀ ka ri ukpunjuju o-ri Isirẹlụ bala ọ-họ ká iJuda ka màma wuu.

¹³Ụka ká Isirẹlụ yẹ jaabwọ ká ẹdụrụ jwọọ bala ụka ká iJuda yẹ ẹbẹ ọlẹ kọ chọọ, ọọwa Isirẹlụ a ka ẹga nya adịrahụ ọtụka nya ala Asiriya kaka bịlọọ kọ ka daa ụbwọ lẹlẹ. Ma, Adịrahụ nya ala Asiriya á tị la ọngịrị nyọka haa uda nya ẹdụrụ bala ẹbẹ ọlẹ kọ chaa myị ka.

¹⁴M̀ ka ma uya ta ala Isirẹlụ bala ala iJuda lala ugẹbẹ. M̀ ka nwaa, m̀ ka nwụlaa kpa rụ. Ọngọngọhẹ á ka gbaa kpehe bwu ụbwọ nyam myị ka.

¹⁵Ụka ọọwa, m̀ ka tịrẹkpẹ kele ka ẹga kam ji lẹlẹ. Gbee kị ka myị ya ịwa nyị họ ang onyobyi kị ka tịtọ nyam. Ụka ọlẹ kị yẹ akama, ị ka tịtọ nya ụbwọ ọdada nyam.