Read idege IHoseya 6 Bible Online

IHoseya 6 - idege bible

IHoseya 6

¹Angịnyị yẹkẹẹ, “Kẹwẹ kahị tịrẹkpẹ ka ẹga nya Amkpaa mẹ. Ọọwa-à họhị ang lẹ. Ọ tị ka họhị uda myịmyị. Ọ chịhị ẹbẹ, ma ọ tị ka họhị uda.

²Ẹ-ẹpwụ nya ẹnụtụrụ imiiye lee ẹnụtụrụ ịta ọ ka họhị ahị ka chịla myịmyị. Chajị kahị ka juwa ị-ịlahị nyamwụ.

³Āhị maga kahị jẹ Amkpaa mẹ-ẹ. Ọ ri opyii lẹ, ọ ka wẹ chịhị ọgụ lụka ọmwaaa jaabwọ ká ahị ọpyẹpyẹ kaa la lee jaabwọ ká atẹ nya enyi kaa chị lụka ká angịnyị kaa họ ang nya ẹrụ lọmwụ ọdada nya ụhyọọ.”

⁴Ma, Amkpaa juwa tịtọ yẹkẹẹ, “Isirẹlụ bala iJuda ee, ị́-ịyẹ m̄ tị́ ka họ lanụ-ụ̀? Ọháha ọlẹ kanụ la ẹ-ẹga nyam lala amwụ ọlẹ kọ kaa kpụ lụtụrụ, kọtị kaa chị ọhụ pẹẹ ụka ká ẹnụ-ụ́ ka chị.

⁵Ang odudu kam du ọlọmwụ nyam ẹrụ tọnụ lomyi nya ẹla nya akama bala ịnya ayịreji ọtata a wẹ lẹlẹ. Akama ọọwa ka chahị ịraapya lala ahịgboo nya ẹnụ.

⁶Ọháha o-gbe oyi myị oyi nyanụ m tịtọ lẹ, i-iya ọkịlaaakịla nyanụ ka. Angịnyị nyam ọ-jẹm jẹ ham gụ iya ọ-kịla ju ila ham.

⁷“Ma, ụka kị jẹ pwụ ẹga kị wụrụ Adam lẹ, ị bịrị iro ọlẹ kam nwa taa lẹlẹ.

⁸IGiliyadị ri epweji ọlẹ kọ myị̀ la angịnyị inyibyi bala angị nwụ angịnyị.

⁹Anụ angịkiliya lala ogu nya alagbụrụ ịlẹ kị kaa kpịbaa ẹ-ẹpwamẹ gbe angịnyị. Ụ-ụwa ụ-ụgbẹyị ọ-ka Isirẹlụ anụ kaa nwụ angịnyị bala ọ-họ ang ịtịpyọ lụmẹ-lụmẹ lẹ.

¹⁰M̀ yẹ ang o-wu ejiri am̀ ọ-ọpyị nya ala Isirẹlụ. Angịnyị-ị́ chịla o-hu ọkịlẹtụ ha ka. Ị chịlaa ịrị lẹ.

¹¹“Ịnyang ahụ iJuda tị lẹ, m̀ hu ụka nọ chajị kam ka yẹng akama ịnyịnyị u-uhye nya ang ịlẹ ká wẹẹ họ.