Read idege IHoseya 7 Bible Online

IHoseya 7 - idege bible

IHoseya 7

¹“Ụka ọlẹ kam tịtọ kam ka họ Isirẹlụ uda ọhọbịrị nyamwụ kaa kụ ehe gụ ọọwa. Ang ịtịpyọ ịlẹ ká ịSameriya kaa họ ri awụlẹ ọ-họ ri. Ụ-ụwa Isirẹlụ, angịnyị kaa be ẹpwa nya awụlẹ ene kaka go ang bala o-yi awụlẹ oyi ụ-ụwa o-opeje.

²Ma, ị tị kụ irya nyori ḿ kpịtịya nya ang onyobyi nyaa ịlẹ kị kaa họ wuu ka. Ịhọbịrị nyaa juwa dagaga jwaa wuu. M̀ jẹ wuu gede-gede.”

³Angịnyị kaa da adịrahụ bala alegbeju ilekpeleji nyamwụ lụgbaa bwula ọhọbịrị nyaa.

⁴Ịwa wuu ri angị da ẹla-ahụ. Ị lala udiyo ọlẹ kọ chị ila, ọlẹ ká ọngọ họ ịkaa hịnyọ la o-wuru ila ju bwu ụka kị juwa yi ọrụ nya ịkaa julawụlẹ gbee kọ ka họ ịkaa cheju.

⁵Ẹnụtụrụ nya ụya ọyaya nya adịrahụ, alegbeju ilekpeleji nyamwụ nwa ere gbee ká ere yaa. Adịrahụ balaa họ ẹla uchi lawụlẹ.

⁶Ẹpwụ nya ọkịlẹtụ nyaa chị ila pwuu lala udiyo ọlẹ kị kaa tụ ila ju. Alodu wuu ịị pwuru bịlọọ, ma alụtụrụ ị myịmyị wuru ila.

⁷Ịwa wuu chị ila lala udiyo. Ọọwa, ị kaa rụ alegbeju nyaa lẹlẹ. Ịdịrịhụ nyaa wuu keji, ọngọngọhẹ-ẹ́ tị be ẹkọ wụrụm ka.

⁸Ala Isirẹlụ yẹjula angịlẹ kị ri angga. Ala Isirẹlụ lala ịkịra ọlẹ ká ẹkpẹ ookpokpo nyamwụ kem a kaa ba udiyo gbee kọ ka rụ ila.

⁹Angịlẹ kị bwu ẹpwụma ịkịla nunu ọngịrị nyanụ, ma anụ ala Isirẹlụ-ụ́ tị jẹ ka. Anụ chị okwirichi wuu la inyi inyiiwuru lẹ, ma ánụ tị jẹ ka.

¹⁰Ọbọọchẹ ohihi nya ala Isirẹlụ chị ehe gede-gede, ma ẹ-ẹpwụ nya ang myị ang ịlẹ wuu ị́ myị tịrẹkpẹ kaka tịtọ nya Amkpaa Ohe Oluhye ka.

¹¹Isirẹlụ lala enewulo ọlẹ kọ họ kpekpe. Ị́ jẹ ẹla kpong-kpong ka. Ọhọhẹ-họhẹ, ị be ẹkọ wụrụ ala Ijipiti kị ka daa ụbwọ. Ọọwa lẹ, ị myịmyị rụnyẹ ka ẹga nya ala Asiriya lẹlẹ.

¹²Ụka kị juwa jẹ rụ, m̀ ka da ụgbọwụ nyam waa jaabwọ kị kaa wu ịchịnụ iluhye-ọgba. M̀ ka yaa akama jaabwọ ká ẹla ọlẹ kị ya dodehe ẹ-ẹpwarịrị nya angịnyị nyaa ri.

¹³Iyoo a ri nyaa chajị nyọlẹ kị hwahị him. Ayịreji ọtata juwa haa chajị nyọlẹ kị la egbeju-ọngịrị tam. Ịnọ m̀ tịtọ nyọka chaa da, ma ị tị me ọnụ bam lẹ.

¹⁴Ị́ị raabwọ ham bwu ẹpwụ nya ọkịlẹtụ nyaa ka. Ma, ị kaa nọnọ uhye nya agodo nyaa kem juwa jida. Ụka kị juwa raabwọ chajị nya ajẹ nya ang oriri bala ere, ị kaa kọ ịlaa ẹma ị-ịnyịrọ nyaa lala alijiga. Ị la egbeju-ọngịrị tam.

¹⁵Am a kpaa nwa bala ọ-ya ọngịrị haa lẹ, ị tị kaa me irya onyobyi jahị dam.

¹⁶Ị jahị nyaa kpata da ka ẹga nya ang ịlẹ kị ju apyobwuna ka. Ị la laa uda okeke ọlẹ kị ka jẹ-ẹ̀ dọọ kịlahị kpụrụrụ ka. Chajị nyọlẹ ka alegbeju nyaa ya ẹla la ọbọọchẹ lẹ, ị ka nwaa la ẹma nya ẹwụ. Ọọwa lẹ, ala Ijipiti a ka hụlọ ẹhụ jwaa lẹlẹ.