Read idege IHoseya 8 Bible Online

IHoseya 8 - idege bible

IHoseya 8

¹Ya ẹkụrwẹ kụ ọnụ ká chọọ da angịnyị ọna mẹ, aluji juwa weji paaa lala ụpa kaka gu angịnyị nyam, chajị angịnyị nyam bịrị iro ọlẹ kam nwa taa bala ọ-bịrị ehile nyam.

²Ida lẹ, ala Isirẹlụ kaa je jum ya “Ohe Oluhye nyam, ahị jẹng.”

³Ma, ị tị pwa ang ọnyịịla lẹ. Chajị nya ọọwa lẹ, aluji nyaa a ka kwaa lẹlẹ.

⁴Ị kaa chụ ịdịrịhụ, ma ḿ tị kaa jẹ ene ka. Ịị chụ alegbeju nyaa lam ọ-jẹjẹ ka. Ị kaa kpa okpoko onyoowuru bala okpoko ịgọm nyaa họ ekpeku o-ju ọmwụ nya ayịreji ọtata nya ịlaa.

⁵ỊSameriya ee, ukpeku ọlẹ ká họ me ẹna á ham ka. M̀ wụ ikẹjẹ-awụrụ jahị daa. Anyị ọ tị́ ka tata ka ba ene kanụ ka hịnyọhi ijiga ọkpụkpụ.

⁶Ọngọ họ ịbańg ọlẹ kọ họ ukpeku ọwẹ bwu Isirẹlụ. Ó-Ohe Oluhye a wẹ ka. Ị ka be ukpeku nya ala ịSameriya ọlẹ kọ me ẹna wẹ ene yịgẹ-yịgẹ.

⁷Chajị ị ya igbachịwụ tọ lẹ, ị ka wu ugbochịrị. Ogbi ọlẹ kọ da egbeju ehe ka á ka jẹ-ẹ̀ nwụ ang oriri myị ka. Ọ́ dọmwụ riri kọ nwụ, angga ka chaa ri.

⁸Ị wu Isirẹlụ mile lẹ. Ị yẹ kpịla la ẹpwụma ịkịla wuu lẹ. Ị́ ju apyobwuna ham kaka.

⁹Ị lala ụnyịrẹ ọ-hya ụla ọlẹ kọ kaa juwa ga ụbwọọmwụ. Ịị kele kaka tọ ala Asiriya nya ụbwọ ọdada. Ịị diro epwoja ịkịla kị ka kpẹhị rịraa.

¹⁰Ọ ri ịnyịlẹhị, ala Isirẹlụ ka juwa ya ị̀nya bala alepwoja ịkịla ịlẹ kị kaa daa ụbwọ myị, ma m̀ ka taa guru, ị ka yẹ akama la ọjụjụ ụka ká Adịrahụ nya ala Asiriya-á taa pyịpyị.

¹¹Jaabwọ ká ala Isirẹlụ-ụ́ me ogidi kaka ba chajị kị ka hụ̀ ọhọbịrị hi ọpyị, ọhọbịrị ọ-gụ olene ị kaa họ lẹ.

¹²M̀ da ang ịmẹjẹ lụmẹ-lụmẹ ju ha angịnyị nyam chajị kị ka kpa mẹjẹ ịlaa. Ị tị tụụbwọ hi ang ịmẹjẹ ịịwa wuu. Ị yaa lala ang inyeewe.

¹³Ọ ri ịnyịlẹhị, ị kaa ya iyo kịla iya ham, ị tị kaa ri ịnyịrọ nya iyo ikiliya ịịwa. Am Amkpaa-ị́ ye iya ọkịlaakịla ịịwa ka. Ọlẹẹlẹẹ m̀ ka yaa akama chajị nya ịhọbịrị nyaa. Ị ka rụ tịrẹkpẹ ka Ijipiti.

¹⁴Ala Isirẹlụ nwụ ẹpwa nya ịdịrịhụ lụmẹ-lụmẹ, ma ị tị deeri la ọngọ haa họ. Ala iJuda me epweji ị me egwalọ dagaga ju wuu. Ma, m̀ ka du ila kaka rụ ẹpwa nya ịdịrịhụ bala epweji i-me egwalọ ju ịịwa wuu.