Read idege IHoseya 9 Bible Online

IHoseya 9 - idege bible

IHoseya 9

¹Isirẹlụ ee, ānụ chị ọkẹkẹnị ka. Ānụ yaya jaabwọ ká epwoja ịkịla kaa họ ka. Á chịla o-hu ọkịlẹtụ ha ẹ-ẹga nya Amkpaa ka, à jahị kpata hyọọ. Ẹga myị ẹga kịị ru ajẹ nya amẹ, a kaa họ lala ọlakpara ụ-ụwa chajị okpoko ọlẹ kị kaa ya nwụng uri wung ẹpwụ.

²Ma, ánụ ka ye ang-ẹrụ wụ nwa ụga kaka, ánụ tị ka ye ere nwanụ ụga kaka ịnyịnyị.

³Ala Isirẹlụ-ụ́ ka hi jam ọ-ọpyị nya Amkpaa ka. Angịhyẹ ka rụ ka Ijipiti. Angịkịla ka rụ ka Asiriya. Anụ ka ri iyo ịchịrị ọ-ọpyị ịwẹ.

⁴Ala Isirẹlụ-ụ́ ka jẹ-ẹ̀ ya ọhaha nya ere ha Amkpaa lee iya ọkịlaakịla nyaa-á ka kpọọ ịpyọ kaka. Iya ọkịlaakịla ịlịnyị wuu ka laa lala ang oriri nya angị juwa bida. Ọng myị ọng ọlẹ wuu kọọ ryaa-á ka la ịgọgọ ka. Ang oriri nya iya ọkịlaakịla ịịwa kị kaa ri wẹẹ ri chajị nyọka wu ẹpwụ. Ịchịrị lẹ, ị́ ka kpa tụ gu ube nya Amkpaa ka.

⁵Lẹ, ányị ị tị́ ka họ ụka ká ẹnụtụrụ nya ụya ọyaya nya Amkpaa ịlẹ kị hunọ-ọ́ warị mẹ?

⁶Anụ tị́ jẹ lẹ, ó-riri ka ala Asiriya a ta angịnyị ayịreji ka ala Ijipiti ka waa kpa rụ. Ị ka ya egu nyaa ju eji ụ-ụwa i-iMemfisi ẹga kị kaa ya okpoko onyoowuru kpịbaa bala ẹga ká ẹpwa nyaa ji wuu amẹ ka bwu tụ ụwa ku.

⁷Ụka nya akama ọ-yẹnụ-ụ yẹ pwụ eji lẹ. Ụka kị ka nwụnụ uri nya ang inyibyi nyanụ pwụ eji lẹ. Ụka kam họ ịnyị anụ ka jẹ ịnyịnyị. Anụ ala Isirẹlụ yẹkẹẹ, “Ọlọmwụ nya Ohe Oluhye ri oluchi bala o-ya ọngịnyị ọlẹ ká olegu kpa họ ụkụrwọ nyị ri ọlụla.” Chajị nya ịhọbịrị nyanụ ọ-lụmẹ bala ẹjẹ ọlẹ kam wụụnụ a du kanụ ya ịnyị lẹ.

⁸Ọlọmwụ a ri ọngọlẹ ká Amkpaa du ẹrụ nyọka da ala Isirẹlụ angịnyị nyam ọna lẹ, ma angịnyị juwa da ụnya gbọọ chajị kị ka wọọ jaabwọ kị kaa wu ịchịnụ. Ọgụgụ wuu ri ị kaa hwọọ oluchi ụ-ụwa u-ube ịgọgọ nya Ohe Oluhye.

⁹Anụ họ ang onyobyi gbee ịhọbịrị nyanụ lụmẹ lala ịnya ala iGibiya lẹ. Ohe Oluhye ka kpịtịya nya ịhọbịrị nyanụ ịlẹ kanụ họ, ọ tị ka yẹnụ akama chajị nyaa.

¹⁰Amkpaa yẹkẹẹ, “Ụka kam yẹ ala Isirẹlụ lẹ, ị lala ugboji ọ-chị agbịlangịrị ọlẹ kọ bwu rịrị ụ-ụwa u-ugbileji. Ụka kam yẹ adaa igogo anyị tị lẹ, ị lala ugbe nya ọgbanyẹ nya okiledu. Ma, ụka kị jẹ kaka pwụ ịBaalụ-ịPẹyọ kị gbịgba ha ijiga lẹ, ọọwa lẹ, ị hi cheeji lala ijiga ịlpẹ kị kaa gbịgba ha lẹlẹ.

¹¹Ihi ọlala nya ala Isirẹlụ ka hụ rụ hyaa lala ọchịnụ. Ọngọngọhẹ-ẹ́ ka jẹnyị lee ọ-ma ọnyị ka.

¹²Ó-ri kị dọmwụ ma anyị ma, m̀ ka nwụ anyị ịịwa wuu, ọhẹ-lọhẹ nyaa-á ka hi ka. Ụka kam ji ẹkpẹ daa, inyiribyi ọtụka ka juwa haa.”

¹³Ene-ene lẹ, m̀ yẹ Isirẹlụ lala ụgba nya ọrị ọlẹ kọ bwu rịrị ụ-ụwa ọnyịịla-ọnyịịla ọ-ọpyị o-ju eyo. Ma, ọlẹẹlẹẹ, Isirẹlụ tị ka tụ angịnyị nyamwụ da kaka nwụ.

¹⁴Amkpaa ee, “Ịyẹ ā tị́ ka ya haa? Ang ọlẹ ká ka ya haa ri ọ-ka họ ká anyang nyaa-á ka jẹ-ẹ̀ ma anyị lee ọ-ka jẹ-ẹ̀ ya ẹmẹ ha anyị nyẹ ka.”

¹⁵Ang inyibyi ịlẹ ká ala Isirẹlụ họ wuu dọmwụ bwu iGiligalụ. Ụka ọọwa lẹ, ị dọmwụ nya ẹjẹ ọ-wụm wụ bwu ụwa lẹlẹ. M̀ ka kwaa rụ hi ọpyị nyam chajị nya ang ịtịpyọ nyaa ịlẹ kị họ. Ị́ ka hám kaka, alegbeju nyaa wuu la egbeju-ọngịrị tam.

¹⁶Isirẹlụ lala okoji ọlẹ ká ẹdụrụ jụ ka atẹ nyamwụ wuu gbu nwụ ọnwụ ọlẹ kọ ka jẹ-ẹ̀ nwụ ugbe kaka. Ị́ ka ma anyị kaka. Ó-ri kị tị dọmwụ ma anyị ma wẹẹ, m̀ ka nwụ anyị nyaa ịlẹ kị háa gụ wuu.

¹⁷Ohe Oluhye ka pwaa rwarụ chajị nyọlẹ kị ke ụrụ lọọ ka. Ị ka ri angị juwa ga-gaa-ga tụ epwoja ịkịla da.