Read idege IJUWẸLỤ 1 Bible Online

IJUWẸLỤ 1 - idege bible

IJUWẸLỤ 1

¹Ụka ọhẹ, Amkpaa du iJuwẹlụ ọnyị nya iPetuwẹlụ ẹrụ. Ẹrụ ọọwa à lẹẹ lẹ.

²Anụ wo mẹ, anụ ịgabwọ! Anụ ya jem wẹ-ẹ̀, anụ angị kụ iJuda— Bwu oyi-oyi nyanụ lee ịnya adanụ igogo anyị, ịngịngịhyẹ ọlịịlẹ họ ẹnẹnẹhẹ lẹ-ẹ́?

³Anụ ja oja ọlẹ je anyị nyanụ, ká anyị nyanụ ā ja je anyị nyaa, ká anyị nyaa ā tị̀tị̀ ja je anyị nyaa hi ụbwọ ha awụlẹ mẹ.

⁴Iru nya ógwogwoogu nya ịyịrị dodoba ang-ẹrụ. Ang ịlẹ ká ịyịrị i-be ang ri pẹhi, ịyịrị ichiche ịwụyọ-wụyọ maa ri, ang ịlẹ ká ịyịrị ichiche ịwụyọ-wụyọ ri kị hi, ịyịrị ịdaarịrị ryaa, ang ịlẹ ká ịyịrị ịdaarịrị-ị́ pẹhi, ịyịrị ịtụka náa kịrẹm-m.

⁵Anụ angị gbu ere ee, anụ chahị kanụ jida mẹ, anụ angịlẹ wuu kanụ-ụ̀ nwa ere, anụ chị ụbwọngee mẹ. Alakọnụ ị-kpa họ ere ta ayịreji wuu gbanggbang, anụ ka ye ere nwa kaka!

⁶Ịyịrị be ọpyị nyahị ẹpwa lala alẹwụ lẹ. Ị ju iru kịla ọwawa kịla, ị lọngịrị la ịnyịnyị, angịrị nyaa liri lala ịnya egabẹ alẹng, ikopya nyaa lala ịnya egabẹ anyang.

⁷Ị ta alakọnụ nyahị ayịreji wuu, ị be ikiledu nyahị ri kìro-kiro, ị dọmwụ pwaa ego-ẹkpẹ ri hi ugbẹjẹ-ugbẹjẹ rịrị ụ-ụwa hụrwatata.

⁸Lẹẹlẹ, ọng myị ọng nyanụ ā be ẹkọ ida lala onjwo ịyang à bida chajị nya igu nya ọngọ juwa ka yọọ-ọ ye mẹ.

⁹Ajẹ nya ang-ẹrụ lee ere-é ji ị ka kpa ka ha ọhaha u-Ube nya Amkpaa kaka. Angịkiliya ị-myị ẹrụ ha Amkpaa juwa bida chajị ị́ ye ịngịhyẹ ka kpa kịla iya ha Amkpaa kaka.

¹⁰Ẹrụ ta ayịreji wuu, ọpyị chọhụ kịra-kịra. Ajẹ nya ang-ẹrụ ta ayịreji, alakọnụ gbu wombooo, ekeji nya olivu nwọnwụ wuu.

¹¹Anụ angị wu ẹrụ, anụ ya yụbwọ ba ọmwụ ba egbeju mẹ, anụ angị wu ẹrụ nya alakọnụ, anụ chị eko mẹ, chajị ẹrụ nya ịrayịsị, iwiiti bala ịbali ta ayịreji wuu lẹ. Ee, ang-ẹrụ wuu ta ayịreji lẹ!

¹²Alakọnụ gbu wombooo, ikiledu wuu gbu pyị ị̀hyẹ, egbe nya ipomegịraneti bala ịrị bala apụlụ pyị ị̀hyẹ. Ekeji ịlẹrụ wuu gbu lẹ! ekeji myị́ ekeji ịlẹpwụ nya ẹrụ wuu gbu kpá lẹ. Ọngọngọhẹ-ẹ́ ka jẹ-ẹ̀ chị ọkẹkẹnị myị kaka.

¹³Anụ angịkiliya ị-myị ẹrụ ẹ-ẹga nya ogidi nya Ohe Oluhye ee, anụ hu awụrụ nya owuru kụrụ kanụ bida mẹ. Anụ kele ka Ube nya Amkpaa kanụ bida lodu-odu gbee ká ahị ā pyẹ mẹ, chajị ajẹ nya ang-ẹrụ lee ere-é ji ị ka ya ha ọhaha ha Ohe Oluhye nyanụ kaka.

¹⁴Anụ chị ehe nya ọ-hụ limyi, kanụ wụrụ ọjịrị-jịra mẹ! Anụ wụrụ ịgabwọ bala angịkịla nya ala iJuda wuu kaka jịra u-Ube nya Amkpaa Ohe Oluhye nyanụ kanụ raabwọ bịlẹ ụbwọ ọdada bwu ẹga nyamwụ mẹ.

¹⁵Chaahohoo! Ẹnụtụrụ nya Amkpaa ju chwẹẹ lẹ! Ẹnụtụrụ ọọwa, Agụgụ ka wẹ kaka ta ang myị ang ayịreji. Ẹnụ ọọwa ka lụ uhi-uhi kaka kpoye.

¹⁶Ẹ-ẹhị nyahị gede-gede ang-ẹrụ nyahị à ta ayịreji lẹ, Ọkẹkẹnị ọlẹ kahị ka la ẹ-ẹga nya Ohe Oluhye nyahị myị hi ẹnụ ta uhye.

¹⁷Ajẹ ịlẹ kị ya tọ pyị ị̀hyẹ ẹ-ẹpwụ ịpyị, ang-ẹrụ á ji ị ka ye nọ u-uhye ka, ukuna da luhwo-luhwo.

¹⁸Iyo ileji juwa màrụ nya imyi, ịna ga tụ ẹga myị́ ẹga da, chajị ị́ ye amẹ ri ka. Ịmwụ juwa yẹ akama ọwẹ ịnyịnyị.

¹⁹Amkpaa ee, ahị jam bịlẹ ụbwọ ọdada bwu ẹga nyang! Amẹ nwọnwụ bwụgẹ-bwụgẹ, ekeji rụ ila hụrụ wuu lẹ.

²⁰Iyo ịlẹpwamẹ chị eko wụrụng, chajị ị̀bá nya enyi nwụ wuu, ila tị rụ amẹ wuu lẹ.