Read idege IJUWẸLỤ 2 Bible Online

IJUWẸLỤ 2 - idege bible

IJUWẸLỤ 2

¹Anụ chị opyike ị-ịSayọn, ọgbọdọ nya Ohe Oluhye mẹ! anụ dọna gboo ha angịnyị kị wo! Ọng myị ọng nya ala iJuda ā hụ́ kpakpaakpa mẹ, chajị ẹnụtụrụ ọlẹ ká Amkpaa ka la angịnyị eje ju chwẹẹ lẹ.

²Ẹnụtụrụ ọọwa ka chị owu kpẹmkpẹm, ọ ka ri ẹnụ nya ayiiji ọtụka, odu ohite-hite ka hi, egbamwụ ka chị owu kpịlẹẹ. Ụbwẹwụ nya ịyịrị pwụ eji wirim-m lẹga chị owu kpịlẹẹ ị-ịgbọdọ lala odu à hi! Ụma nyaa-á ji ẹnẹnẹhẹ lẹka, ọ́ tị ka ji kpá ẹnẹnẹhẹ gụ ọwẹ kaka.

³Ịị ri ang jaabwọ ká ila kaa rụ ang. Ene kịị wẹ, ang-ẹrụ há lala ang ịlẹrụ nya Idẹn, Ẹga kị tị chịpwụrụ bwu, ị nẹ ang ịlụwa kịrẹm-m hi eji deeji. Ịngịngịhyẹ-ẹ́ẹ̀ be bwu ọnụ nyaa myị ka.

⁴Ị me anyịrẹ ẹ-ẹhị, ịị chị agaga lala anyịrẹ ị-kpa dẹwụ.

⁵Ị gba chị ịgbọdọ juwa tụ́ iru ụ-ụwa lala ang ịrụnyẹ ị-kpa dẹwụ ịlẹ ká anyịrẹ kaa gbile. Ị tụ́ iru lala ila ọlẹ kọ juwa rụ amẹ, ị pyẹ yịrị ẹga yịrị lala iru nya angịdẹwụ ịlẹ kị nwụlanọ nyọka dẹwụ.

⁶Ụka kị juwa pwụ eji, uhi kaa ju ọng myị ọng, angịnyị wuu ka gbu wombooo.

⁷Ịị gba mịla ang nmoo lala angịdẹwụ, ịị wule egwalọ lala angịdẹwụ, ịị hị ọgba juwa jẹ kịlahị kpụrụrụụrụ la ọ-pẹ ka ẹga ọkịla ka.

⁸Ị́ị jẹdịyẹ chị awụlẹ ochuchuu ka, ọngọngọọng ka jẹ jaabwọ kọ pwoku. Ịị be bwụụụ kpoye nya ọhwọọ̀ ọnyị myị ọnyị. Ịngịngịhyẹ-ẹ́ẹ̀ waa kpa myị ka.

⁹Ịị be epweji ẹpwa, ịị wule kpoye nya egwalọ gbajị ju ka ẹpwang. Ịị bwu iwindo ka ẹpwang lala eyi.

¹⁰Odehe kaa hụ́ jigi-jigi ụka kị ji ọnaabwọ, uhye-ọgba hụ́ jigi-jigi. Ẹnụ bala ọya-á hụ́ myị kaka, ịdịchụ-ụ́ hụ́ kaka ịnyịnyị.

¹¹Amkpaa kaa kpa angịdẹwụ nyamwụ kụ ịlahị la ịkata ọtụka-ọtụka. Ịị ju omyi nyamwụ ihi, ị ju iru kịla ọwawa kịla, ị la ọngịrị lụmẹ ịnyịnyị. Ẹnụtụrụ nya Amkpaa ri ẹnụ ọtụka, ọ la uhi-uhi lụmẹ. Ọngọngọhẹ-ẹ́ ka godayị gbọọ myị ka.

¹²Amkpaa yẹkẹẹ, “Ó-ri ọlẹẹlẹẹ ri, anụ yẹ irya da bwu ọkịlẹtụ nyanụ wuu kanụ wẹ ẹga nyam mẹ. Anụ hụ limyi, kanụ juwa jida bala ọ-bida mẹ.

¹³Anụ mẹjẹ jaabwọ ká ọ-họ pyị nyanụ tọnụ olujwo kaka ba. Ānụ mọọ jẹ bwula o-gu ịwụrụ nyanụ ene ka. Anụ tụ́tụ́ kpa ịlọnụ keji kanụ nyà wẹ ẹga nya Amkpaa Ohe Oluhye nyanụ mẹ.” Ọ ri ọngọ họ ọnahị bala ọngọ kaa yẹ ahyẹẹrwẹrwa. Ọ́ọ ju agbama hyaa ka, ọọ la ọháha ụka wuu, ọ kaa hịnyọhi ọngọ yẹ irya da, ọ́ọ yọọ akama kaka.

¹⁴Ọhẹka ọ ka nwụ irya me myị. Ọ ka wahị kụrụụnụ kpụ anụ ka ye ang-ẹrụ bala ere kpa kaka kịla iya ha Amkpaa Ohe Oluhye nyanụ myị.

¹⁵Anụ chị ẹkụrwẹ ị-ịSayọn, kanụ chị ehe nya ọ-hụ limyi, bala ọ-wụrụ angịnyị kanụ la ọjịra-jịra.

¹⁶Anụ wụrụ angịnyị wuu ka tụguru, anụ họ ká alọjịra-jịra ā la charị-charị. Anụ wụrụ ịgabwọ kaka tụguru, kanụ tụ anjwo guru tụ ịlẹ kị juwa kpa ẹmẹ nyẹ. Ọrụ-ahụ bala ahụ onyeewe ā kpehe bwu ube nyaa ịnyịnyị.

¹⁷Angịkiliya nya Amkpaa ị-họ ụkụrwọ ẹ-ẹpwarịrị nya ọnang nya Ube Ịgọgọ bala ogidi ā jida bịlẹ Amkpaa yẹkẹẹ, “Chuchuu, yẹ ahyẹẹrwẹrwa nya angịnyị nyang mẹ. Ā hu angịnyị nyang rị ị-ịnụ nya alụma ịkịla, kị ri ang nya ịhwẹ ha alepwoja ịkịla ka. Ó-ri ịnyị ka, ị ka kpahị họ juwa tọ wo ale Ohe Oluhye nyahị nyaa tị́ ji?”

¹⁸Ó-ri kanụ raabwọ ịịwẹ aalẹ, iwe-ahụrụ nyanụ anụ angịnyị nya Amkpaa-à ka gwọọ ọ-ọkịlẹtụ lẹ, ọ ka yẹnụ ahyẹẹrwẹrwa lẹlẹ.

¹⁹Ọọwa, Amkpaa-à wẹ byaa yẹkẹẹ, “M̀ jam ya ajẹ nya ang-ẹrụ bala ere bala ida nya olivu hanụ lẹ. M̀ ka ya ang ịwẹ hanụ nwa ụga. Alepwoja ịkịla-á ka myịmyị-ị̀ yẹhị danụ bwee kaka.”

²⁰“M̀ ka ku aluji i-bwu oye nya ẹtẹ ịwẹ rụ hiinu hwẹẹẹ kaka ju ka ugbileji ọkanggba. M̀ ka ku angị kpaa ji ịlahị kị ka rụ ka ju ka Ihu Ọlịma-ịma ọ-ọbaba nya ọpyị ọhẹ wurum-m, alẹkpẹ nyaa ka rụ ka ju ka Ihu ọtụka nya iMeditareniya ọ-ọbaba ọkịla wurum-m ịnyịnyị. Egu nyaa ka mama nyí oru pwuu yịrị ẹga yịrị.” Ang ịtụka Amkpaa-à họ ịnyịlẹhị lẹ!

²¹Anụ alọpyị ọlẹ ee! Ānụ ju uhi kaka. Anụ chị ọkẹkẹnị lẹẹlẹẹ mẹ, chajị ang ịtụka Amkpaa-à họ hanụ lẹ!

²²Anụ iyo ịlẹpwamẹ, anụ chị uko kaka. Edamẹ juwa ju jwọọjwọọ, ekeji tị juwa nwụ egbe ịnyịnyị lẹ, ikiledu bala alakọnụ nwụ egbe nyọ́ọ̀nyọọ lẹ.

²³“Anụ ala ịSayọn ee, anụ chị ọkẹkẹnị mẹ, anụ chị ọkẹkẹnị ju Amkpaa Ohe Oluhye nyanụ, chajị ọ họnụ ọnahị bwula o-do enyi nya ọgbanyẹ hanụ. Ọ do enyi ọgwọgụ hanụ, enyi nya ọgbanyẹ bala enyi ohyẹẹkpẹ juwa do lala olene-ene lẹ.

²⁴Ang-ẹrụ ka myị ẹga i-ru ajẹ nya ang nyanụ lẹ. Ere ka dịda ẹ-ẹga ị-chị ere, anụ ka ye ida myị ang pwẹẹpwẹẹ ẹ-ẹga i-hwo ida nyanụ lẹ.

²⁵“M̀ ka kunu iwa nya ang-ẹrụ nyanụ ịlẹ ká ịyịrị ta ayịreji ẹ-ẹpwụ nya ẹka lụmẹ-lụmẹ kam ka ẹkpẹ. Ekpilo nya ịyịrị ịịwa be ang-ẹrụ ri bala ọ-nẹ ang-ẹrụ kịrẹm-m. Am à daa chịnụ ọgụ lala alẹwụ lẹ.

²⁶Anụ ka ye ang ri wu ẹpwụ nwa ịlọnụ. Ọọwa, ānụ ka gwogbo ha Amkpaa Ohe Oluhye nyanụ ọlẹ kọ họ ụkụrwọ ịlẹbyẹbyị ịlẹ hanụ lẹlẹ. Oyoyi ọlịịlẹ-ẹ́ ka myịmyị-ị̀ junu anụ angịnyị nyam kaka.

²⁷Ụka ọọwa, anụ ala Isirẹlụ ka jẹ kam jam ẹ-ẹpwarịrị nyanụ. Anụ ka jẹ ịnyịnyị kam̀ kẹnẹ-kẹnẹ à ri Amkpaa Ohe Oluhye nyanụ, ọngọkịla ọhẹ-lọhẹ-ẹ́ ji dalam kaka.

²⁸“Ụka kam do enyi hanụ kpá ịịwẹ, m̀ tị̀tị̀ ka do Olegu nyam lala enyi hụ angịnyị wuu. Anyị alẹng bala anyị anyang nyanụ ka yẹ ọmwụ, angịgbahị ịlẹpwụ nyanụ ka la alaa, alụjụ ịlịnyanụ ka yọyị a-arụrụ.

²⁹Ọ ka la kpá kpuu, alẹng bala anyang ịlẹ kị dọmwụ ri anchẹ ri-í ka hi deeji ka! M̀ ka do Olegu nyam hwaa ịnyịnyị ụka ọọwa.

³⁰“M̀ ka họ ang i-wu ejiri mẹjẹ u-uhye-ọgba bala odehe lụka ọọwa, ịwọ ka chị cheji, chajị ila bala ịmwụ-ila ka nyí kpunáaa.

³¹Ẹnụ ka chị owu kpịlẹẹẹ, ọya ka gọmịla lala ịwọ ene ká ẹnụtụrụ ọtụka oluhi-uhi nya Amkpaa ka pwụ eji.

³²Ụka ọọwa, ọng myị ọng kọ bịlẹ ụbwọ ọdada bwu ẹga nya Amkpaa ka chịda. Angịhyẹ ịlẹ kị juwa ọ-Ọgbọdọ nya ịSayọn i-iJerusalẹm ka be myị, chajị Amkpaa myị ọnụ ya angịịwa nyaa ri angịlẹ kọọwa nyị chụ kịị nyị ka hi lọhịhị lẹ.”