Read idege IJUWẸLỤ 3 Bible Online

IJUWẸLỤ 3 - idege bible

IJUWẸLỤ 3

¹Ọọwa, Amkpaa-à yẹkẹẹ, “Ụka ọọwa, m̀ ka họ ká iwe-ahụrụ nya ala iJuda tụ ịnya ala iJerusalẹm ka kịlahị hiigu-hiigu.

²M̀ ka tụ alụma ọnyị myị ọnyị wuu guru, M̀ ka kpaa wẹ Ọkpọọ Oleje[1]. M̀ ka laa eje ụ-ụwa chajị nya ang onyobyi ịlẹ wuu kị họ angịnyị nyam. Ị nyí ala Isirẹlụ epepe pwụụpwụụpwụụ ju ka ẹpwụ nya ụma ịkịla, ị gu ọpyị nyam ókpó gịla awụlẹ.

³Ị da iwo ju angịnyị nyam kị ka go angịlẹ ká iwo wu kpa ka ri anyịhị nya ịlaa, ị go anyị alẹng nya angịnyị nyam ra, ya okpoko ọọwa nwụ alakpara uri. Ị go anyị anyang nya angịnyị nyam ra, ya okpoko ọọwa ra ere nwa.

⁴“Ẹla-ịyẹ anụ ala ịTaya bala ala ịSayịdọn tụ aloye nya iFilisitiya wuu à tị́ wẹẹ kpa jahị dam kpong-kpong-ǹg? Anụ juwa maga nyọka họm kwiwa nya ẹla ọhẹ kám họnụ nalọ-ọ́? Ó-ri ịnyị aalẹ, m̀ ka hịrọọ danụ anụ ka yẹ.

⁵Anụ go okpoko onyoowuru bala okpoko ịgọm tụ ang-ụdụ ịlahịchịng nyam kpa rụ kaka ju e-ebe nya ijiga nyanụ.

⁶Anụ go ala iJuda bala ala iJerusalẹm kpa rụ hwẹẹ hi ọpyị nya ịlaa. Anụ waa ha ala iGirisi ra.

⁷“Anụ wo mẹ, m̀ juwa ka kpaa nyà bwu ẹga myị ẹga kanụ waa ra kà. M̀ ka họnụ kwiwa nya ang ịtịpyọ ịlẹ wuu kanụ haa.

⁸M̀ ka go anyị alẹng bala anyị anyang nyanụ ha ala iJuda ra. Ị tịtị ka yaa kpáta ha ala Arebyiya[2] ịlụrụ-lụrụ ịlaanyị ra. Am Amkpaa kpangga à ya ẹlẹwẹ lẹ.

⁹“Ya ẹla ọlẹ dodehe ẹ-ẹpwụma datị-datị yẹkẹẹ, ‘Anụ nwụlanọ nyọka dẹwụ, kanụ wụrụ angị ri ọgẹwụ nyanụ kpehe, ká angịdẹwụ nyanụ wuu ā hị ọgba nyọka dẹwụ mẹ!

¹⁰Anụ go alẹ nyanụ kanụ ya hyà oge, kanụ go ịma ị-kpa ma ekeji abwọ nyanụ hyà ịkpachị mẹ. Anụ mẹjẹ angị dẹwụ-dẹwụ kị ri angịdẹwụ ịnyịnyị.

¹¹Anụ alẹpwụma iloye ọnyị myị ọnyị ee! Anụ chị agaga warị páaa, kanụ tụ ịlọnụ guru u-ụwa ọ-ọkpọọ mẹ.’ ” Amkpaa ee, Wụrụ angịdẹwụ nyang kpehe mẹ.

¹²“Alẹpwụma datị-datị ā nwụlanọ, kị warị wẹ Ọkpọọ Oleje[3] mẹ. Ụ-ụwa m̄ ka la alẹpwụma iloye ọnyị myị ọnyị eje lẹ.

¹³Alẹpwụma ịwẹ họ ang onyobyi nwa lẹ. Ị lala ang-ẹrụ ịlẹ kị ga nwa ọchịchị lẹ, anụ tụrwaa chị e-eji lala igbi mẹ! Ị lala alakọnụ ịlẹ kị ga nwa ọ-pyịpyị lẹ, anụ pyaa yịrá-yịrá jaabwọ kịị pyị alakọnụ mẹ! Ang onyobyi ọhọhọ nyaa myị ẹga myị ẹga pwẹẹpwẹẹ lẹ!”

¹⁴Iru nya ụnụnụụnọ nya angịnyị juwa ọ-Ọkpọọ Oleje. Ẹnụtụrụ nya eje ọlala nya Amkpaa ju ụwa chwẹẹ lẹ.

¹⁵Ẹnụ bala ọya ka chị owu kpịlẹẹ, ịdịchụ-ụ́ ka hụ́ kaka.

¹⁶Amkpaa ka kpụ ịkata Ọgbọdọ nya ịSayọn, Ọ ka ya ẹla lomyi gboo bwu iJerusalẹm, odehe bala uhye-ọgba ka hụ́ jigi-jigi. Amkpaa ka chẹwụ ke angịnyị nyamwụ, Ọwa-à ka ri ẹga ká ala Isirẹlụ angịnyị nyamwụ ka kpịbaa lẹ.

¹⁷“Ụka ọọwa, anụ ka jẹ kam̀ à ri Amkpaa Ohe Oluhye nyanụ. M kụ ẹpwa ị-ịSayọn ọgbọdọ ọlịgọgọ nyam. IJerusalẹm ka ri epweji nyam lụbwọ-lẹta, alẹwụ nya alụma ịkịla-á ka dẹwụ kụrwọọ myị gụ ọwẹ kaka.

¹⁸“Ụka ọọwa, ịgbọdọ ka ri ẹrụ-ẹrụ nya alakọnụ nya ala Isirẹlụ, ịna ka myị ikiti ọnyị myị ọnyị juwa ye ang ri, enyi ka dịda ị-ịbá nya ala iJuda wuu. Enyi ka juwa mwụ kpehe bwu Ube nya Amkpaa kaka ju Ọkpọọ nya Akechiya[4] ká ụwa ka la hyẹ̀hyẹ.

¹⁹Ọpyị nya Ijipiti ti ka da luhwo-luhwo, ọpyị nya Ẹdọm ka kpụ egwawụ-egwawụ, chajị ị mwẹla ta ala iJuda, ị nwụ alụwa ịlẹ kị da ẹlẹlẹhẹ ka.

²⁰Ma, angịnyị ka kụ iJuda bala iJerusalẹm gbe oyi myị oyi.

²¹M̀ ka hịnyọhi ang ịtịpyọ ịlẹ ká angịnyị nyam họ kám tị hịnyọhi ene lẹka, m̀ ka kụ ẹpwa ọ-Ọgbọdọ nya ịSayọn.”