Read idege EmọsịEmọ 1 Bible Online

EmọsịEmọ 1 - idege bible

EmọsịEmọ 1

¹Ụka ọhẹ, Ohe Oluhye wụrụ ala ịlẹ mẹjẹ Emọsị a-arụrụ. Ohe Oluhye maa jọọ lala ẹka imiiye ene nya ọpyị ọ-hụ́ jigi-jigi ọhẹ kọ ji lụka ọọwa. Usaya-à ri adịrahụ i-iJuda ụka ọọwa lẹ. IJerobowam ọnyị nya iJehowachị tịtị ri Adịrahụ nya ala Isirẹlụ lụka ọwẹ ịnyịnyị. Emosị ayịdang bwu epweji nya iTekowa ọ-ọpyị nya iJuda. Ọ ri ọngọgbikpịlọ.

²Ọọwa, Emọsị à yẹkẹẹ, “Amkpaa kpụ ịkata bwu uhye nya Ọgbọdọ nya ịSayọn, ọ ya ẹla bwu iJerusalẹm lomyi o-gboo lala ịkpala. Amẹ ilekpo ịlẹ ká ịkpịlọ ka ri nwọnwụ bwụgẹ-bwụgẹ, ịla Ọgbọdọ nya ịKaamẹlụ ịnọ kịị yẹgile ka, ị gbu wombooo wuu lẹ!”

³Amkpaa yẹkẹẹ, “Ala ịDamasịkọsị họ ang onyobyi, ị họ mahọ kịlahị-ịlahị. Lẹẹlẹ, ḿ ka yaa chịng kaka. Ḿ ka dayi la ọ-yaa akama kaka lẹ. Ị tụ ala iGiliyadị pyị eji, ha hikpi-hikpi.

⁴M̀ ka chajị nya ọọwa du ila ẹrụ ka ẹpwa nya adịrahụ ịHasẹlụ, kọ ka ẹga ọ-kpụ ịbaa ọnyọọngịrị nya adịrahụ ịBẹnhadadị.

⁵M̀ ka tụrụ ogirigba nya epweji nya ịDamasịkọsị ju eji; M ka ta angịlẹ kị kụ Ọkpọọ nya Avẹn ayịreji, bala ọngọ kpa ọgọdọ nya adịrahụ ụ-ụbwọ bwu ẹpwa nya olegbeju ịBẹtị-edin; angịnyị nya ala iSiriya ka myịmyị-ị̀ tịrẹkpẹ kele ka ri anyịhị ụ-ụwa e-epweji nya iKii.”

⁶Amkpaa yẹkẹẹ, “ịGasa họ ang onyobyi, ị họ mahọ kịlahị-ịlahị, ḿ ka dayi la ọ-yaa akama kaka. Ị go angịnyị nyam wuu lẹpwụ-lẹpwụ ha ala Ẹdọm ra.

⁷Lẹẹlẹ, m̀ ka do ila ka uhye nya ugulọ nya epweji nya ịGasa, ebe ịnyịịngịrị nyaa wuu ka rụ ila kpụ obyi.

⁸M̀ ka ta alepweji nya Achịdọdụ ayịreji, bala adịrahụ nya ala Achịkẹlọn. M̀ ka yẹ epweji nya Ẹkịrọn akama, angị ịmanyị-ịmanyị nya ala iFilisitiya ịlẹ kị hi ka gbu.”

⁹Amkpaa yẹkẹẹ, “Ala ịTaya họ ang onyobyi, ị họ mahọ kịlahị-ịlahị. Ḿ ka dayi la ọ-yaa akama kaka, ị go ala Isirẹlụ wuu ha ala Ẹdọm ra nya anyịhị, deeri nya iro nyaa aanịna ọlẹ kị nwa.

¹⁰Ma, m ka do ila ka rụ egwalọ epweji nya ịTaya, ebe ịnyịịngịrị nyaa wuu ka rụ ila kpụ obyi.”

¹¹Amkpaa yẹkẹẹ, “Ala Ẹdọm họ ang onyobyi ị họ mahọ kịlahị-ịlahị. Ḿ ka dayi la ọ-yaa akama kaka, ị ku ala Isirẹlụ aanaa loge nyaa, ị kwaa la o-jujwo nyaa kpong-kpong ka, lagbama onyobyi-obyi.

¹²Lẹẹlẹ, m̀ ka du ila kaka rụ epweji nya ịTẹman, ebe ịnyịịngịrị ịla ịBọsịra wuu ka rụ ila kpụ obyi.”

¹³Amkpaa yẹkẹẹ, “Ala Amọn họ ang onyobyi, ị họ mahọ kịlahị-ịlahị, ḿ ka dayi la ọ-yaa akama kaka. Ị chẹjẹ kpá gu anyang ịlẹnyị ẹpwụ ene e-epweji nya iGiliyadị, lụka kịị dẹwụ nyọka pyẹ ọpyị nyaa ẹpwụ maaa.

¹⁴Lẹẹlẹ, m̀ ka du ila kaka rụ egwalọ nya epweji nya ịRaba, ebe ịnyịịngịrị nyaa ka rụ ila wuu. Ụkwa ọchịchị ọtụka-ọtụka ka kpeji ẹnụ nya ẹwụ, ẹwụ ka nyi ang wuu epepe lala ịgbachịwụ ọtụka.

¹⁵Ị ka gbile adịrahụ bala alegbeju nyaa kpịla-kpịla, kpaa kele kaka ri anyịhị.”