Read idege EmọsịEmọ 2 Bible Online

EmọsịEmọ 2 - idege bible

EmọsịEmọ 2

¹Amkpaa yẹkẹẹ, “Ala iMowabụ họ ang onyobyi, ị họ mahọ kịlahị-ịlahị. Ḿ ka dayi la ọ-yaa akama kaka, ị ju ogu nya adịrahụ nya ala Ẹdọm ẹpẹ, bwula ọ-chị ekpinegu nyamwụ ila.

²M̀ ka du ila ka rụ ọpyị nya iMowabụ, ọ ka rụ ebe ịnyịịngịrị ịla iKeriyotu. Ala iMowabụ ka ta ayịreji lụka ká ọmọnyọ bala ipyike nya ẹwụ ka juwa tá iru.

³M̀ ka nwụ adịrahụ nya ala iMowabụ bala alegbeju nyaa wuu kpá kwẹngkwẹng.”

⁴Amkpaa yẹkẹẹ, “Ala iJuda họ ang onyobyi, ị họ mahọ kịlahị-ịlahị, ḿ ka dayi la ọ-yaa akama kaka. Ị pẹhi ọmẹjẹ nyam deeji, ị́ myị kpa ehile nyam ka. ijiga nya ịnịịkịla kpaa rụ hwahị lala adaa igogo anyị.

⁵Lẹẹlẹ, m̀ ka du ila kaka rụ iJuda, ebe ịnyịịgịrị ịla iJerusalẹm wuu ka rụ ila hụrụ.”

⁶Amkpaa yẹkẹẹ, “Ala Isirẹlụ họ ang onyobyi, ị họ mahọ kịlahị-ịlahị. Ḿ ka dayi la ọ-yaa akama kaka, ịị wu angịnyị ịkpẹẹkpẹẹ ra nya anyịhị, ịị wu alẹbyahị ra pịlẹtẹẹ lala ịnya nya ugbẹtẹ.

⁷Ị kpa alẹbyahị ẹkpa ri eji, kpa ata baa lala ọrụ nya ịpyị, họ ẹla kịrọrọ ẹ-ẹga nya angị ji ẹpwụ nya ọtụpyịpyị. Adịda bala ọnyị ọlẹng nyamwụ tụ aha nya ọnyang ookpokpo lawụlẹ, juwa kpa ibyi wẹ uhye nya ẹnyị nyam.

⁸Ẹ-ẹga nya ogidi ikiliya, ịị nọ u-uhye nya ịpwụ ịlẹ ká alẹbyahị ya bọkpa haa. U-ube nya Ohe Oluhye nyaa, ị juwa nwa ere ịlẹ kị ra bwula ọ-chị angịnyị ijwo.

⁹“Anụ yẹ wẹẹ, m̀ ta ala Amọ ayịreji, ịwa angị luhye kongkong lala ekeji nya isida ịwẹ, ị la ọngịrị kpá lala ekeji nya ooku ịnọ, m̀ tị taa ayịreji bwu uhye ju ka atẹ-atẹ nyaa.

¹⁰M̀ gbanụ kpehe bwu Ijipiti, kpẹhị rịrịịnụ ẹka iwo ine gbẹgbịlẹ u-ugbileji, ya ọpyị nya ala Amọ hanụ nya ang ọlala nyanụ lụbwọ-lẹta.

¹¹M̀ go anyị alẹng nyanụ ịhyẹ ri alọmwụ, m̀ go angịkịla ri ịnasịrayịtị.[1] Ịnyị ọ la ka-á? Am Amkpaa-à wẹẹ tọnụ wo lẹ.

¹²Anụ tị họ ịnasịrayịtị ịịwa juwa nwa ere, anụ byi alọmwụ nyam-m̀ nyị ya ẹla nyam pyẹ ka!

¹³M̀ ka gaanụ beji kpalị-kpalị jaabwọ ká okpolo ọlẹ kị ju olo nya ambakpa chụ kaa la.

¹⁴Angị la ata-ịmịla-á ka bebe myị ka, igirima ka kpụ ịrwẹmbẹ, angịdẹwụ ịtụka-á ka chị ịlaa da myị kpong-kpong ka.

¹⁵Aleda-á ka kụ ọhụ nya ẹwụ ọwẹ myị ka, angị la ata-ịmịla-á ka jẹ pwụ ẹgẹgẹhẹ ka, angị kụ anyịrẹ-ẹ́ ka kpa ịlaa be myị ka.

¹⁶Ẹnụ ọọwa-á pwụ, ọngọdẹwụ o-ju ugbodu gụgụ wuu ka pẹhi ang-abwọ nya ẹwụ gu e-eji, mwụ ata bịmwụ. Am Amkpaa-à ya ẹlẹwẹ lẹ.”