Read idege EmọsịEmọ 3 Bible Online

EmọsịEmọ 3 - idege bible

EmọsịEmọ 3

¹Anụ ala Isirẹlụ, anụ wo ẹla ọlẹ ká Amkpaa ya u-uhye nyanụ anụ ẹpwụma ọlẹ kọ gba kpehe bwu ọpyị nya Ijipiti wẹẹ. Ọ yẹkẹẹ,

²“Ẹ-ẹpwụ nya ụma olodehe wuu, anụ kẹnẹ-kẹnẹ m̄ chụ, kpahị ju gụgụ wuu lẹlẹ. Ịnyị à du kam ka yẹnụ akama, chajị nya ang inyibyi ịlẹ kanụ họ wuu lẹ.”

³Ugbọnụ oluhye bala oleji-í pwoku awụlẹ ka, ukpọọnyịrẹ kaa rụ ala-á?

⁴Ugẹbẹ kaa warụ i-ipyinu ododu ka, kẹnẹ-kẹnẹ ọ́ ye ang juwa ka wu ri lẹ mẹ ịnyị. Ụgba nya ugẹbẹ kaa marụ ẹ-ẹga ọmwịịnyọ nyamwụ ka, kẹnẹ-kẹnẹ ó-ri kọ wu iyo ọkịla kpa ụ-ụwa lẹ mẹ ịnyị.

⁵Anụ ya ká ọchịnụ ka jẹ-ẹ̀ wu ụnya ó-ri ká ang ọ-chẹhị gbọgbọ ọhẹ-lọhẹ-ẹ́ ju ụnya ka-á? Ụnya kaa kụ ịlọmwụ-ịlọmwụ da ó-ri ká ịngịngịhyẹ-ẹ́ kpụ ẹpwụ nyamwụ ka-á?

⁶Ị ka chị opyike nya ẹwụ e-epweji, angịnyị-ị́ ju uhi ka-á? Akama ka jẹ-ẹ̀ chị epweji ọgụ ó-ri ká Amkpaa-á ya ẹga da ka-á?

⁷Ẹla nya ịlẹhị ịnyị, Ọngọlahị Amkpaa-á kaa họ ịngịngịhyẹ la ọ-chị ẹla ọlẹ kọ me obyi nyamwụ ehe je alọmwụ anchẹ nyamwụ ka lẹ ka.

⁸Ugẹbẹ-ẹ́ warụ, oowo tị́ ka hi la uhi ojuju kpá wẹ-ẹ̀? Ọngọlahị Amkpaa-á ya ẹla, ọlọmwụ oyina à tị́ ka pwa o-ya ẹla ọọwa dodehe ha aluche wo-ò?

⁹Anụ ya ẹrụ ọlẹ je alegbeju nya ala iFilisitiya bala Ijipiti mẹ. Byaa kị kele kaka tụ ịlaa guru ị-ịgbọdọ ịdagaga ju ịSameriya chajị kị kpẹhị nya ịlaa yẹ ang ojigi-jigi bala ang onyobyi ịlẹ ká alụwa juwa họ wẹẹ.

¹⁰Amkpaa yẹkẹẹ, “Angịwẹ-ẹ́ jẹ ang ọnyịịla ọhẹ-lọhẹ kaa họ kaka. Ẹpwang nyaa myị la iru nya ang ịlẹ kị go yoyi bala ang ịlẹ kị nu angịnyị lagbụrụ.”

¹¹Lẹẹlẹ Ọngọlahị Amkpaa yẹkẹẹ, “Oluji ọhẹ juwa ka warị ka dagaga ju epweji nyaa, ọ ka ta egwalọ ịnyịịngịrị nya epweji nyanụ ayịreji. Ọ ka nwụla ang-ụdụ nyaa kpa rụ wuu kpá kwẹngkwẹng.”

¹²Amkpaa yẹkẹẹ, “Jaabwọ ká ọngọgbikpịlọ kaa chị ata imiiye lee ụrụ nya ọkpịlọ pwụra bwu ọnụ nya ugẹbẹ, ịnyịnyị-ịnyịnyị ọ-ka la ụka ká ala Isirẹlụ ịla ịSameriya ka be lune nya okoji ọdahụhụ lee une nya ịbẹẹdị nyaa lẹ.”

¹³Ọngọlahị Amkpaa Ohe Oluhye Agụgụ yẹkẹẹ, Anụ wo ẹla ọlẹ kanụ da anyị ịtụma nya iJekọbụ ọna mẹ.

¹⁴Ẹnụ kam ka yẹ ala Isirẹlụ akama chajị nya ịhọbịrị nyaa, m̀ ka ta ogidi okiliya ịla ịBẹtẹlụ ayịreji. Ipyiye-pyiye nya ogidi ọnyị myị ọnyị ka chị eku, ị ka chabwọ chị ka ịpyị.

¹⁵M̀ ka ta ẹpwang ịlẹ kịị nọ lụka nya ogo ayịreji, tụ ẹpwang ịlẹ kịị nọ lụka nya ụrwẹnụ. Ẹpwang ịtụka-ịtụka nyaa wuu ka ta ayịreji, tụ ẹpwang ịlẹ kị kpa angịrị nya inyi họ ịnyangga.