Read idege EmọsịEmọ 4 Bible Online

EmọsịEmọ 4 - idege bible

EmọsịEmọ 4

¹Anụ ke ụrụ kanụ wo ẹla ọlẹ mẹ, anụ anyang nya ala ịSameriya ịlẹ kanụ kụ uhye nya ịgbọdọ, anụ angịlẹ kanụ ri ang lụmẹ du kanụ hye ri ịtụka lala ịna nya alepweji nya ịBachan. Anụ kpa angị dẹwụ-dẹwụ nmaa-nmaa, anụ tụ ikpechika pyịpyị. Anụ byi ọrụnụ nyị kpa ere wẹ ịwa nwa.

²Ọngọlahị Amkpaa ọngọlẹ kọ gbe odehe wuu nwa iro la Ịgọgọ nyamwụ yẹkẹẹ, jẹ myị̀myị mẹ, ẹnụtụrụ juwa warị chịnụ ọgụ, kị ka ya ori junu o-omyi lala iyo juwa gbileenu kpịla-kpịla kpa rụ, dọmwụ kpá tụ anyị ịtụma ihyẹẹkpẹ-ẹkpẹ nyanụ, ị ka kpa ọkụja o-wu iyo gbilaa kpa rụ ịnyịnyị.

³Iwa-iwa nya egwalọ anụ ka kpehe bwu rụnyẹ rụ lẹlẹ. Ị kpa ọng myị ọng nya ọnyang nyanụ rụ kpụrụrụ. Ị ka goonụ chị ka Ọgbọdọ nya ịHaamọn. Ẹla ọlẹ kọ kpehe bwu ọnụ nya Amkpaa a wẹ lẹlẹ.

⁴Ọ́ haanụ lẹ, anụ kẹwẹ wẹ ịBẹtẹlụ kanụ họ ang onyobyi ụ-ụwa mẹ, kanụ kele ka iGiligalụ, kanụ myịmyị họ ang onyobyi da ọọwa u-uhye mẹ. Anụ kpa iya ọkịlaakịla ọ-rụ ila lụtụrụ ẹnụ myị ẹnụ kanụ kpa ịtayịtị warị ka nwụ ẹnụtụrụ ọhata-ọhata mẹ.

⁵Kanụ kpa iya ọkịlaakịla nya obe ojiji ka ju ila kanụ ya ọhaha ọlẹ kọ ri o-hu ha bwu ẹpwụ nya ọkịlẹtụ ọgbagbịla nyanụ dodehe gbogboogbo ká aluche nya angịnyị wuu ā wo kpá odu mẹ, anụ ala Isirẹlụ ọlịnyị à tị́ haanụ lụmẹ lẹ. Ịnyị Ọngọlahị Amkpaa a ya lẹ.

⁶Amkpaa myịmyị yẹkẹẹ, m̀ họ ká imyị nwụnụ la ugbẹpwụ nyanụ da hwoo, họ uhi ji ọtụka-ọtụka ji epweji nyanụ datị-datị, ma ánụ myị nyà tịrẹkpẹ chịm ọgụ ka.

⁷Ụka kọ hi ọya ịta kanụ juwa ka du ang-ẹrụ nyanụ lẹ, m̀ ka wu enyi ododo kpa hiinu. M̀ ka do enyi ha epweji ịhyẹ, epweji ịkịla ka hi. Epweji ịlẹ kam do enyi ha, ọpyị nyaa kpụ chwẹẹchwẹẹ. Ịpyị nya alepweji ịlẹ ká enyi do ka wẹẹ nwụ ọnwụ kịragba.

⁸Ụka kọ lịnyị, epweji imiiye lee epweji ịta kaa ga kele ka epweji ọlẹ ká enyi do ha, kọ la enyi ọnwanwa ọchịchị. Enyi ọ-ga ka chịchị ọlịnyị á wunu ẹpwụ ka. Ma, ánụ tị myị nyà tịrẹkpẹ chịm ọgụ ka. Ịnyị Amkpaa a ya lẹ.

⁹M̀ du igbachịwụ ọ-chị ila pwuu ẹrụ họ ká ang-ẹrụ ịlẹ kanụ wu gbu womboooo bala ẹdụrụ nya ịpawụda. Ịyịrị ri ang ịlẹpwụ nya iku nyanụ wuu tụ egbe nya ikiledu bala alakọnụ bala olivu nyanụ. Ma, ọlẹ kpá kọ lịnyị la lẹ, ánụ myị tịrẹkpẹ nyà bam ka. Jaabwọ ká Amkpaa ya a wẹ lẹ.

¹⁰M̀ du ẹdụrụ ọlala ọlẹ kọ jụ alọpyị nya Ijipiti wẹ uhye nyanụ. M̀ nwụ anjwo ikolobya nyanụ ọ-ọgbẹwụ la ẹma nya ẹwụ. M̀ go anyịrẹ nyanụ kpa rụ. M̀ họ ká okwinyi nyanụ myị la oru nya egu igbugbu ụ-ụwa epwolodehe ọ-chị kụ nyanụ. Kpọkpọọkpọ, anụ myị nyà tịrẹkpẹ bam ka. Amkpaa a ya ịnyị lẹ.

¹¹M̀ ta angịhyẹ nyanụ ayịreji jaabwọ kam ta ịSọdọm bala iGomora ayịreji. Ụka ọọwa, anụ angịlẹ kanụ be bwu ẹpwụ nya akama ọwẹ, anụ lala ekpijịwụ ịlẹ kị kaa gba bwu ẹpwụ nya ila chị e-eji. Ma, ánụ tị myịmyị tịrẹkpẹ chịm ọgụ ka. Amkpaa a ya ịnyị lẹ.

¹²Chajị nya ọọwa, jaabwọ kam lẹẹ ka họnụ anụ ala Isirẹlụ a lẹẹ lẹ. M̀ ka yẹnụ anụ ala Isirẹlụ akama pyii lẹ, lẹ anụ nwụlanọ kanụ tọm am Ohe Oluhye nyanụ, kahị ka la eje bala ahị mẹ.

¹³Chajị anụ yẹ wẹẹ! Ohe Oluhye ọlẹ kọ họ ịgbọdọ bala ikiti, ọngọlẹ kọ họ igbachịwụ da ọhụ nya olegu nyamwụ ju ọngịnyị ehe ọngọlẹ kọ ya irya nyamwụ dodehe je ọngịnyị ehe, họ ọngịnyị jẹ irya nyamwụ. Ọngọlẹ kọ họ ahịgboo nya ẹnụ bala ukpowu nya odu. Ọngọlẹ kọ kaa ya atiye-atiye nyamwụ rịrị ẹ-ẹga ịlẹ kị la uhye gụ am odehe ọlẹ wuu. Ẹnyị nyamwụ a ri Amkpaa Ohe Oluhye Agụgụ lẹ.