Read idege EmọsịEmọ 5 Bible Online

EmọsịEmọ 5 - idege bible

EmọsịEmọ 5

¹Anụ ala Isirẹlụ, anụ ke ụrụ wo eje nya ida ọbaba ọlẹ kam lẹẹ mwu rụụnụ mẹ.

²Ahyu! Ẹpwụma nya ala Isirẹlụ ọlẹ ịnọ kọ ri onjwo ọyẹẹnọ ọlẹ kọ jẹ ọlẹng ẹnẹhẹ lẹka pyii! Ọwa-à mileji wẹ, ọ ka jẹ-ẹ̀ wuleji myị kaka lẹlẹ. Ọ nọnọ ị-ịpyị lẹ, ọng myị ọng deeri hyọọ ọ-ọpyị nya ịlọmwụ, kpá la ọngọngọhẹ-ẹ́ juwa ka wulọọ eji kaka.

³Ánụ yẹ-ẹ̀ wẹ ka-á, Ọngọlahị Amkpaa ya epweji nyanụ ọhẹ am̀ Isirẹlụ nyị du ịsọja ụnọ (1,000) ẹrụ kpehe ka ọgbẹwụ, angị ohu (100) nyaa kẹnẹ-kẹnẹ à tị nyà tịrẹkpẹ lẹ. Epweji ọkịla du angịnyị angị ohu (100) kpehe, ma angị iwo chiriri kem à tịrẹkpẹ nyà myị lẹ.

⁴Chajị ịịlẹ Amkpaa a wẹẹ ya ta ala Isirẹlụ lẹ. Anụ kẹwẹ kanụ tịtọ nyam mẹ aalẹ, anụ ka gbu kaka lẹ.

⁵Ma, ánụ kele kaka kpụ ijiga ịBẹtẹlụ ka. Anụ tị ju kele ka iGiligalụ lee o-kpoye kele ka iBiyẹchẹba koo, chajị ala iGiligalụ juwa ka yẹ ri anyịhị ịlẹ kị ka wu kpa rụ bwu ọgbẹwụ lahị-lahị wẹẹ. Ụka ọọwa, ịBẹtẹlụ ka ta ayịreji kpá gbanggbang yẹ ka ri ododu.

⁶Anụ tịtọ nya Amkpaa kanụ nyà tịrẹkpẹ bọọ, chajị kanụ hị mẹ. Ó-ri kanụ nyà wẹ ẹga nyam ká aalẹ, anụ ka jẹ jaabwọ ká ila nya ogo kaa la. O-ri kanụ kele ka ẹga nya Ohe Oluhye ka tụbwọ aalẹ, ọ ka hireji warị lala ila ọtụka a juwa rụ. Ọ ka rụ ẹpwa nya iJosẹfụ ọlẹ kị ka ye ọngọ mịrọọ-mịrị myị ka.

⁷Iyoo juwa hanụ anụ angịlẹ kanụ kaa pyị eje nya abwẹla ọnyịịla kanya-kanya, họ ká abwẹla ọnyịịla mwẹẹkpẹ lujujwo lala ụpyị. Anụ juwa họ angịnyị ri lọ naa ang ọlẹ kọ ri nyaa lụbwọ-lẹta, tụụbwọ hi abwẹla ọnyịịla deeji.

⁸Anụ tịtọ nya Ọngọlẹ kọ họ ogu nya ịdịchụ irwiye. Ịdichụ ịlẹ ká ahịgboo nyaa ka hụ myịra-myịra gụ wuu. Ọ họ ká ukpowu okpori-kpori nya epwodu yẹ ka ri ahịgboo nya ụtụrụ, ri ahị ọpyẹpyẹ. Ọ tị họ ká ahịgboo nya ẹnụ yẹ ka ri ukpowu lodu. Ọ be ẹkọ wụrụ enyi ịlẹpwụ nya ihu ịtụka, ọ yaa la enyi ododo, yaa hụ ịpyị u-uhye bwọọọ. Ẹnyị nyamwụ a ri Amkpaa lẹ.

⁹Ọwa-à ri ọngọlẹ kọ họ ká ayịreji ọtata wuru hwoohwoo lala apya ọchịchị warị wẹ uhye nya angị ịnyịịngịrị bala ẹga ị-kpụ ịbaa nyaa lẹ.

¹⁰Ọng myị ọng ọlẹ kọ danụ uya ẹ-ẹpwa nya abwẹla onyobyi nyanụ kọ ya ẹla nya ịlẹhị wuu jaabwọ kọ la u-ube oleje, ọwa kaa wụụnụ ẹjẹ lẹ, anụ mwẹẹkpẹ chị eji bọọ lẹlẹ.

¹¹Chajị nyọlẹ kanụ wẹẹ tụ ikpehika pyịpyị juwa chaa ata kiti-kiti bala o-juwa naa ajẹ nya igbi bala ịrayịsị lagbụrụ, chajị nya ọọwa lẹ, ebe ịwẹ kpá kanụ me la ajwọ-ajwọ wuu wẹẹ, ánụ ka nọ une ẹ-ẹpwụ nyaa ka. Ẹrụ ịlẹ kanụ bá iku ju wu há ka gbeng wẹẹ, ánụ ka ryaa kpong-kpong ka.

¹²Chajị m̀ jẹ jaabwọ ká ang inyibyi ịhọhọ bala ịhọbịrị nyanụ ju iru ka ba.

¹³Lẹẹlẹ, ọngọlẹ kọ jẹ ẹla tụ ọnụ pịrị hu ujiji kpini-kpini ụka ká akama-á wẹ ẹga nya angịnyị inyibyi.

¹⁴Anụ tịrẹkpẹ nyà kanụ họ ang ọnyịịla ọkọkọ nya ang onyobyi ọhọhọ mẹ. Anụ tịtọ nya ang ọnyịịla kanụ họ, kanụ kpụba la ang onyobyi ọhọhọ mẹ aalẹ, anụ ka hị. Ụka ọọwa lẹ, Amkpaa ọlẹ kọ ri Agụgụ ka hụ tanụ jaabwọ kanụ ya nyị ka họ hanụ ụka myị ụka ene-ene.

¹⁵Anụ myị ká ang onyobyi ā wụụnụ ẹjẹ, ká ang ọnyịịla ā haanụ, kanụ myị ká eje nya abwẹla ọnyịịla ọlala a ji ịkọọtị nyanụ. Amkpaa Agụgụ ka yẹ ahyẹẹrwẹrwa nya anyị ịtụma nya iJosẹfụ angị ịmanyị-ịmanyị ịlẹ kị hi jam odehe ọlẹ wẹẹ.

¹⁶Chajị nya ọọwa lẹ, ịịlẹ Amkpaa a ya lẹ, ida ọbaba bala ida ojeje nya ang ọjụjụ ka ji agbayị ichiche bala ịtụka tụ opeje nya epweji ọnyị myị ọnyị ọlẹ ká iru nya angịnyị ka juwa chị eko yẹkẹẹ, “Chaahohoo! Chaahohoo.” Ị dọmwụ ka be ẹkọ wụrụ angị wu ẹrụ kị bida chajị kị bida nya angị gbugbu bala angịlẹ kị diroo-diro lokpoko kị jẹ ang chajị nya ida ọbaba ene-ene kị ka bida.

¹⁷Ẹ-ẹpwụ nya ẹrụ nya ọng myị ong wuu ida ọbaba ka juwa chajị m̀ juwa ka chịpwụrụ bwu ẹpwarịrị nyanụ kam ka yẹnụ akama. Amkpaa a ya ịnyị lẹ.

¹⁸Iyoo nya inyiribyi ọtụka ka juwa hanụ anụ angịlẹ kanụ kaa tịtọ kanụ ka yẹ ẹnụtụrụ nya eje nya Amkpaa! Ányị a tị́ du kanụ ka tịtọ nya ẹnụtụrụ nya Amkpaa? Ẹnụtụrụ ọọwa ri ẹnụ nya ukpowu ọtụka, ọ́ ri ẹnụtụrụ nya ahịgboo koo.

¹⁹Ọ la jaabwọ ká ọngịnyị kaa rụnyẹ hi ugẹbẹ, ká odọmwụu mwẹẹkpẹ warị tọọ ụ-ụgbẹyị. Lee ọ rụ kele ka ẹpwa nyamwụ yụbwọ ba ugulọ, ọgbịjị tị chọọ.

²⁰Ịyẹ ẹnụtụrụ nya Amkpaa a tị́ ri? Uukpowu okpem-kpem ka-á, ahịgboo ịnyị-ị́? Ehe, ukpowu ọtụka-ọtụka ịnyị, aahịgboo ka. Ahị ọ-họ hwee nya ahịgboo ọhẹ-lọhẹ á juwa ẹ-ẹpwụ nyamwụ ka.

²¹Amkpaa byaa yẹkẹẹ, Ang oriri nya ụya ọyaya nyanụ wuu bala ọjịra-jịra lala ọ-hụ limyi nyanụ wuu wụm ẹjẹ lụmẹ lẹ. Ọhẹ lọhẹ nya ang ịwẹ kanụ wẹẹ họ á kpụm ịpyọ ka.

²²Ọ́ dọmwụ riri kanụ kịla iya ọ-rụ ila ham bala ọ-kpa ọhaha nya ang iriri warị ka jim obe bala ọ-kpa eyo nya iyo bwu ẹpwụ nya iyo ịlẹ kị ju eyo gụ iyo nyanụ wuu ka kịla iya nya okpunyi ham, ḿ ka ye ọhẹ-lọhẹ nyaa ka. Ḿ dọmwụ ka chẹhị yaa ka.

²³Anụ tụ tuu kele him la emwuru nya eje ịmwumwu nyanụ ịwẹ mẹ. Ḿ juwa ke ụrụ lomyi ị-kpụ ịpyọ nya ẹnwụ idudu nyanụ ịwẹ kanụ wẹẹ du ka.

²⁴Ma, tụtụ ba ká eje nya abwẹla ọnyịịla a juwa mwụ nyà lee do lala ẹmwụ-enyi ọtụka, ka abwẹla ọnyịịla a juwa myị̀ biri ụ̄ka nya ogo lala ihu ọtụka ọlẹ kọ kaa nwụ kpá ẹnẹnẹhẹ kaka.

²⁵Bà wẹẹ, anụ ala Isirẹlụ ee, ụka ọlẹ kam kpanụ tụ ẹpwamẹ da u-ugbileji ẹka iwo ine (40) gbẹgbịlẹ lẹ, m̀ tịtọ nya iya ọkịlaakịla ọhẹ-lọhẹ bwu ẹga nyanụ kpong-kpong? Ehe!

²⁶Ma, lẹẹlẹẹ, chajị nyọlẹ kanụ hu ịnawụ nya ojiga nyanụ kpa dịrẹ ịlọnụ, ukpeku ịSakutu ọlẹ kanụ wụrụ adịrahụ nyanụ ịlẹ kanụ họ ha ịlọnụ wẹẹ, anụ ka myịmyị họ ịnyịnyị wẹ.

²⁷Ajị nya ọọwa a du kam ka tụụbwọ hi iwe da ha aluji nyanụ kị ka wunu kpa rụ bwu ọgbẹwụ lahị-lahị kpoye nya ịDamasịkọsị hwẹẹẹ kaka ri anyịhị ụ-ụwa lẹ. Ịnyị Amkpaa ọlẹ ká ẹnyị nyamwụ ri Ohe Oluhye Agụgụ ọlẹ kọ lọngịrị gụ ang wuu a ya lẹ.